دادام كۆز يۇمۇش ئالدىدا ماڭا ئىنتايىن قىممەتلىك ، مەڭگۈلۈك بىر سوۋغا بەرگەنىدى . ئۇ قانداقتۇر ئالتۇن - كۆمۈش ، بايلىق ئەمەس . شۇ چاغدا ئۇ ماڭا تىكىلىپ قاراپ تۇرۇپ : « ئوغلۇم ، خىزمەتنى تىرىشىپ ياخشى ئىشلە ، ھەرگىزمۇ ھورۇنلۇق قىلما . ئادەم ئىشلىگەنگە ئۆلمەيدۇ ، بەلكى ھالال ئەمگىكى بىلەن كۆكلەيدۇ ، نومۇسقا ئۆلىدۇ . بىز بۇرۇن كۈن بويى ئىشلىسەكمۇ قورساق تويمايتتى ، ھازىر تۇرمۇشىمىز تولىمۇ ياخشى . سىلەر ھازىر بىر ئاي ئىشلەپ 1000 يۈەندىن ئارتۇق مۇئاش ئالىسىلەر . شۇڭا ، ئالغان مائاشقا لايىق ئىشلە ، ھۆكۈمەتنىڭ پۇلىنى ھالال ئال ، پۇلنى دوست تۇتما ، باشقىلار بىلەن ئىناق - ئىجىل ئۆت . ئۆيدە ئەر - خوتۇن ئۆز ئارا بىر - بىرىگە ، سىرتتا خىزمەتداشلارغا تايىنىدىغان گەپ . بىر دوستۇڭ كۆپ بولسا ، بىر يولۇڭ ئارتۇق بولىدۇ. كىشلىك مۇناسىۋەتتە پۇلغا بەك ھېرس بولما ، سەمىمىي ، ئىشەنچىلىك بول . كىشلەرگە ئللىق  مۇئامىلە قىل ، چوڭچىلىق قىلما ، قولۇڭدىن كەلسە باشقىلارغا ياردەم قىل ، ھاجەتمەننى ئۈمىدسىز قويما . سالامەتلىكىڭنى ئاسرا ، ئەمەلنىڭ چېكىگە يەتكىلى ، پۇلنى تېپىپ تۈگەتكىلى بولمايدۇ . نام - ئابروي قوغلاشما ، مال - دۇنيانى تۇغۇلغاندا ئېلىپ كەلگىلى ، ئۆلگەندە ئېلىپ كەتكىلى بولمايدۇ . بەتخەجلىك قىلما ۋە بايلىقنى ھەممىدىن ئارتۇق كۆرمە ، تۇرمۇشۇڭنىڭ ھاجىتىدىن چىقسىلا بولدى . تاماكا ، ھاراق - شاراپ ، شەھۋەتپەرەسلىككە بېرىلمە ، بولمىسا ئۆزۈڭنى ئۆزۈڭ ھالاك قىلىسەن ! تاپقان پۇلۇڭنى ھالال ئىشقا خەجلە ، قىيىنچلىققا يولۇقساڭ دەس ئورنۇڭدىن تۇر ، قەيسەر بول ، بولمىسا قىيىنچىلىق سېنى قورقىتىدۇ . كۆپ ھاللاردا ئۆزۈڭگە تايان ، ئۆزۈڭنى كۈچلەندۈر ، خىجالەتتىن خالاس بولىسەن ! » دېگەن ۋەزىنىلىك نەسھەتلىرىنى ئېيتتى .

      دۇرۇس ، بۇ نەسھەتلەر ماڭا كۆپ ئەسقاتتى ، تۈگىمەس بايلىقتەك يولۇمنى يورۇتتى . بۇ نەسھەتلەرنىڭ مەنىسى ناھايتى چوڭقۇر بولۇپ ، ئۇنى ئۆزۈمگە قىبلىنامە قىلىپ پايدىنى كۆپ كۆردۈم ۋە كۆرۈۋاتىمەن . دوستۇم ئەمدى ئۇنى سىزنىڭ نەزىرىڭىزگە سۇندۇم ، بۇنى بەلكىم سىزمۇ ئاڭلاپ قويسىڭىز ، كىشلىك تۇرمۇشتا سىزگىمۇ پايدىسى تېگىپ قالسا ئەجەپ ئەمەس .

ئەكرەمجان مەترۇسۇل ئۈمىدى