جاھان ئاگېنتلىقى 14-ئاپرېل خەۋىرى؛ لەگلەك تورى تەرجىمىسى: ئىئوردانىيەنىڭ بىرلەشكەن دۆلەتلەر تەشكىلاتى خەۋىپسىزلىك كېڭىشىگە سۇنغان ۋە بىر قىسىم ھۇسى رەھبەرلىرىگە قۇرال ئىمبارگوسى يۈرگۈزىدىغان قارار لايىھەسى بۈگۈن ئاۋازغا قويۇلىدۇ. قولتۇق دۆلەتلىرى ۋە ئىئوردانىيە، يەمەندە ھۇسىيلەرگە قارشى كۈرەشكە ب د ت خەۋىپسىزلىك كېڭىشىدىن چىقىرىلىدىغان قارار لايىھەسىنىڭ بولۇشى ئۈچۈن تىرىشىۋاتىدۇ. دىپلوماتىيە دائىرلىرىدىن ئېرىشكەن ئۇچۇرغا ئاساسلانغاندا، ئۆتكەن ھەپتە ئىئوردانىيە تەرەپتىن ب د ت خەۋىپسىزلىك كېڭىشىگە سۇنۇلغان قارار لايىھەسى بۈگۈن سائەت 10:00 دا ئاۋازغا قويۇلىدۇ. ئەمما بۇ قېتىملىق ئاۋازغا قۇيۇشتا روسىيەنىڭ پوزىتسىيەسى ھەل قىلغۇچ رول ئوينايدۇ.
لايىھەدە ھۇسىيلەرنىڭ شەرتسىز قۇرال تاشلىشى، زوراۋانلىقنى ئاخىرلاشتۇرۇشى ۋە كونترول قىلىۋالغان رايۇنلاردىن چېكىنشى، بۇلاڭ-تالاڭ قىلغان ھەربىي ئەشيالارنى قايتۇرۇشى، سىياسىي مەھبۇسلارنى ۋە بالا ئەسكەرلەرنى ئەركىن قۇيۇپ بېرىشى تەلەپ قىلىنىدۇ.
لايىھەدىكى قۇرال ئىمبارگوسى قىسىمىدا بولسا سابىق يەمەن پرېزىدېنتى ئەلى ئابدۇللاھ سالىھنىڭ ئوغلى ئەھمەد ئەلى سالىھ بىلەن ھۇسىي رەھبەرلىرىدىن ئابدۇلمەلىك ئەل-ھۇسىگە بىۋاستە ياكى ۋاستىلىق قۇرال تەمىناتى ۋە سېتىش-يەتكۈزۈش چەكلىنىدۇ.
لايىھەدە يەنە، ئەزا دۆلەتلەر، خۇسۇسەن يەمەننىڭ قوشنا دۆلەتلىرىدىن يەمەندە ئىمبارگو يۈرگۈزۈلگەن تەرەپلەرگە قۇرال يەتكۈزۈلگەنلىكىگە دائىر يىتەرلىك ئۇچۇر بولغان ئەھۋالدا ، ھاۋا، قۇرۇقلۇق ۋە دېڭىز ساھەسى ئارقىلىق تەكشۈرۈش ئېلىپ بېرىش تەلەپ قىلندى.