«يەر شارى تورى خەۋىرى» نۇر تورى تەرجىمىسى: فىرانسىيە «فىگارو گېزىتى»نىڭ  13-مارت فىرانسىيە ئاخبارات ئاگېنتلىقىنىڭ خەۋىرىنى نەقىل قىلىشىچە، گىرېتسىيەنىڭ شۇ يەر ۋاقتى 13-مارت، ب د ت مۇساپىرلار ئىشلىرى ۋالىي مەھكىمىسى، گىرېتسىيە بىلەن ماكېدونىيە چېگراسىغا جايلاشقان ئىدمايىن مۇساپىرلار لاگېرىنىڭ كىشىنى بىئارام قىلىدىغان شارائىتىنى تەنقىد قىلغان.

خەۋەرگە قارىغاندا، شۇ يەر ۋاقتى 3-مارت، ب د ت مۇساپىرلار مەھكىمىسىنىڭ باياناتچىسى بابار بالوچ يۇقىرىدا بايان قىلىنغان مۇساپىرلار مەھكىمىسىنى تەنقىد قىلىپ:«ياۋروپادىكى ئىنسانپەرۋەرلىك ئاپىتى چەككە يەتتى، ئىدمايىن مۇساپىرلار لاگېرىنىڭ شارائىتىدا كىشىنىڭ تۇرمۇش كەچۈرمىكى بەك تەس» دېگەن. ئۇ يەنە سۆزىنى تولۇقلاپ:«مۇبادا يامغۇر يېغىپ قالسا ئۇ يەرنىڭ شارائىتىنى كىشى تەسەۋۋۇر قىلالمايدۇ، ئۇنىڭ ئۈستىگە بۇ كۈنسېرى يامانلاشماقتا، كىشىلەر قاتتىق دەرد-ئەلەم تارتماقتا» دېگەن.

خەۋەردە كۆرسىتىلىشىچە، ئىدمايىن مۇساپىرلار لاگېرىنىڭ داۋالاش شارائىتى ئىنتايىن ناچاركەن، ھەتتا ھاجەتخانىمۇ يوقكەن. يېقىنقى بىر قانچە كۈندىن بۇيان، نەچچە ئون بالا سوغۇق ئۆتۈپ قېلىش، نەپەس يولى كېسەللىكلىرى ۋە باشقا ھەر خىل كېسەللەر بىلەن دوختۇرخانىغا كىرىپ قالغان. گىرېتسىيە كېسەللىكلەرنىڭ ئالدىنى ئېلىش ۋە كونترول قىلىش مەركىزىنىڭ 12- مارت دېيىشىچە، سۈرىيەلىك توققۇز ياشلىق قىزچاق ئا تىپلىق جىگەر ياللۇغى بىلەن يۇقۇملىنىپ، دوختۇرخانىغا ئېلىپ بېرىلىپتۇ.

13- مارت، سۈرىيەلىك ۋە ئىراقلىقلاردىن تەشكىللەنگەن مۇساپىرلار يەنە بىر قېتىم ئىدمايىنغا كىرىش نامايىشى قىلغان، ئادەم سانى 200 گە يەتكەن. نامايىشچى مۇساپىرلار «چېگرانى ئېچىۋەتسۇن» دەپ قاتتىق توۋلىغان. خەۋەردە دېيىلىشىچە، بۇنداق نارازىلىق نامايىشى كۈندە دېگۈدەك يۈز بېرىپ تۇرىدىكەن.