پاكىستان مېدىيەلىرىنىڭ 20-يانۋاردىكى خەۋىرىگە ئاساسلانغاندا، پاكىستاننىڭ غەربىي شىمالىدىكى كايبېر-پاكتۇنكۋا ئۆلكىسىنىڭ چارسادا شەھىرىگە جايلاشقان پاشاخان ئۇنىۋېرسىتېتىدا 20-يانۋار تېررورلۇق ھۇجۇمى يۈز بېرىپ 19 ئادەم ئۆلگەن، 50 نەچچە ئادەم يارىدار بولغان. پاكىستان تالىبانلىرى بۇ قېتىمقى ھۇجۇمغا مەسئۇل بولىدىغانلىقىنى جاكارلىغان.

        يەرلىك دوختۇرخانىنىڭ دېيىشىچە، ئاز دېگەندە 19 جەسەت دوختۇرخانىغا ئېلىپ كېلىنگەن. رۇسىيە مېدىيەلىرىنىڭ خەۋىرىگە ئاساسلانغاندا، ئاز دېگەندە 25 ئادەم ئۆلگەن. كايبېر-پاكتۇنكۋا ئۆلكىسىنىڭ ئاممىۋى سەھىيە قۇرۇلۇش مىنىستىرلىكىنىڭ مىنىستىرى فارماننىڭ دەلىللىشىچە، 50 دىن ئارتۇق ئادەم يارىدار بولغان. بىر قىسىملىرىنىڭ يارىسى ئېغىر بولغانلىقتىن، ئۆلۈم-يېتىم سانى داۋاملىق ئېشىشى مۇمكىن ئىكەن.

       پاشاخان ئۇنىۋېرسىتېتىنىڭ مۇئاۋىن مەكتەپ مۇدىرى فايسالنىڭ دېيىشىچە، 20-يانۋار چۈشتىن بۇرۇن مەزكۇر مەكتەپ پاكىستاننىڭ داڭلىق سىياسىي رەھبىرى پاشاخاننى خاتىرىلەش پائالىيىتى ئۆتكۈزۈۋاتقان بولۇپ، بىر توپ سالاھىيىتى نامەلۇم قوراللىق مەكتەپ ئارقا تېمىدىن كىرىپ ھۇجۇم قوزغىغان. ئۇنىڭ دېيىشىچە، ئۆلگۈچىلەر ئىچىدە پرافېسسور، ئوقۇغۇچى، ئامانلىق ساقلىغۇچۇ ۋە ساقچىلار بار ئىكەن.

        يەرلىك مېدىيەلەرنىڭ خەۋەر قىلىشىچە، ھۇجۇم قىلغۇچىلاردا ئۆزىنى قوشۇپ پارتلىتىش قۇرۇلمىسى بولۇپ، ئۆز كۆزى بىلەن كۆرگۈچىلەر مەكتەپتىن قاتتىق ئېتىشىش ۋە نەچچە قېتىم پارتلاش ئاۋازى ئاڭلانغانلىقىنى ئېيتتى.

      پاكىستان ئارمىيەسىنىڭ باياناتچىسى ئاسىم سەلىم باجۋانىڭ دەلىللىشىچە، نۆۋەتتە 4 قوراللىق ئېتىپ تاشلانغان، بىخەتەرلىك خادىملىرى باشقا قوراللىقلارنى ئىزدەۋاتقان بولۇپ، ھۇجۇم قىلغۇچىلارنىڭ كونكرېت سانى ئېنىق ئەمەس ئىكەن.

      ۋەقەدىن كېيىن پاكىستان تالىبانلىرىنىڭ باياناتچىسى مەنسۇر بايانات ئېلان قىلىپ، تالىباننىڭ ھۇجۇم قوزغىغانلىقىنى، مەقسىتى پاكىستان بىخەتەرلىك قىسىملىرىنىڭ تالىباننىڭ ئادەملىرىنى ئېتىۋەتكەنلىكىدىن ئۆچ ئېلىش ئۈچۈن ئىكەنلىكىنى ئېيتقان.