بىرلەشمە سەھەر گېزىتى تورىنىڭ 25-دېكابر خەۋىرى: ب د ت بالىلار فوندى ۋە دۆلەتلىك ئىجتىمائىي كاپالەت نوپۇس مەسىلىسى تەتقىقات ئورگىنىنىڭ تەكشۈرۈشىدە كۆرسىتىلىشىچە، ياپونىيە ئۆسمۈرلىرىنىڭ بەخت كۆرسەتكۈچى 31 ئىلغار دۆلەت ئىچىدە 6-ئورۇندا تۇرغان، گوللاندىيە بىرىنچى ئورۇندا تۇرغان.
ياپونىيە ئاخبارات تورى خەۋەر قىلىشىچە، بۇ تۈردىكى تەكشۈرۈش ئۆسمۈرلەرنىڭ ساغلاملىقى، تۇرالغۇ مۇھىتى ۋە باياشاتلىق دەرىجىسى قاتارلىق كۆرسەتكۈچلەرگە ئاساسەن سېلىشتۇرما قىلغان. بۈگۈنگە قەدەر، ياپونىيەنىڭ سانلىق مەلۇماتى يېتەرلىك بولمىغانلىقتىن رەت تەرتىپكە كىرەلمىگەن، بۇ يىل تۇنجى قېتىم رەت تەرتىپكە كىرگەن.
ياپونىيە «مائارىپ» ۋە «كۈندىلىك تۇرمۇشتىكى خەۋپ-خەتەر» قاتارلىق ئىككى ساھەدە بىرىنچى بولغان. ئوتتۇرا، ئالىي مائارىپتا ئوقۇش نىسبىتى %88.6 بولغان، ئىشسىزلار نىسبىتى %4.1 بولغان. كۈندىلىك تۇرمۇشتىكى خەۋپ-خەتەر تۈرىدە، سېمىز بالىلار ھەمدە ھەپتىدە بىر قېتىمدىن يۇقىرى ھاراق ئىچكەنلەر ئىستاتىستىكىسى بارلىق دۆلەتلەر ئىچىدە ئەڭ تۆۋەن بولغان.
بۇنىڭدىن سىرت، ھەر كۈنى ناشتىلىق قىلىدىغان بالىلار ئەڭ كۆپ بولغان. ئەمما مەكتەپ زوراۋانلىقى ياكى بوزەك قىلىشقا ئۇچراپ باققان بالىلار %27.4 بولۇپ 12-ئورۇندا تۇرغان.
تەرجىمىدە: نەپرەت
