2012-يىلى كېلەيلا دەپ قالدى.  بۇ يىل بولسا تورخۇمارلار كۇلۇبى ئۈچۈن تولىمۇ ئەھمىيەتلىك بىر يىل بولدى. ئاز-ئازدىن ئۆزگەرتىش، يازما يېڭىلاش، تورداشلار ئۈچۈن مۇقىم ۋە ئۆزگىچە پائالىيەت سورۇنى تەشكىللەش جەريانىدا نۇرغۇن ئىسسىق-سوغاقلارنى ئۆتكۈزۈپ مانا بۇ بىر يىلنىمۇ ئۇزىتىش ئالدىدا تۇرۇپتىمىز. تورخۇمارلار كۇلۇبى گەرچە بۇ بىر يىلدا كۆزگە كۆرۈنگۈدەك چوڭ نەتىجىلەرنى قولغا كەلتۈرمىگەن بولسىمۇ، بىراق بۇ بىر يىلدىكى تەرەققىيات نەتىجىسى خېلىلا ياخشى دەپ قارايمەن. ھېچ بولمىسا بىر قىسىم تورداشلارنىڭ قەلبىدە نادىر تور بېكەت، ئۇتۇقلۇق بلوگ دېگەن ناملاردا ئاتىلىشقىمۇ مۇيەسسەر بولۇپ ئۈلگۈرۈپتىمىز، بۇ تەرەپلەردىن مەن تولىمۇ خۇشال!

گەپكە كەلسەك، دائىم بلوگ ئارىلايدىغان، مۇنداقچە ئېيتقاندا تورخۇمارغا دائىم كىرىپ تۇرىدىغان تورداشلىرىمىز ئۈچۈن يىلدا بىر ئۆتكۈزىلىدىغان 10 چوڭ بلوگ باھالاش پائالىيىتى ئانچە ناتونۇش بولمىسا كېرەك؟ خۇددى يىللاردىكىدەكلا، بۇ يىلمۇ بۇ پائالىيەت ئۆز قەرەلىدە ئۆتكۈزۈلمەكچى! ئاڭلاشلارغا قارىغاندا بۇدا پائالىيەتكە قاتناشماقچى بولغان بلوگلار يىللاردىكىدىن سەرخىل، رىقابەت قاتتىق شىددەتلىك بولارمىش. يەنە ئاڭلاشلارغا قارىغاندا تورخۇمار ۋە تەدبىركار بلوگلىرىمۇ بۇ پائالىيەتكە قاتنىشىپ ئۆزىنىڭ تەلىيىنى سىناپ باقماقچى بولۇۋېتىپتۇ، تورخۇمارنى قوللايدىغان تورداشلىرىمىزنىڭ بۇ پائالىيەتكە قانداق پوزىتسىيەدە بولۇۋاتقانلىقىنى شۇ تاپتا ھەممەيلەننىڭ بىلگۈسى بارغۇ دەيمەن؟

شۇنداق! تېخىمۇ كۆپ تورداشلارنىڭ تورخۇمار ۋە تەدبىركار بلوگلىرىنى بىلىشى ئۈچۈن، بۇ يىلمۇ مەن ئۆز قەرەلىدە يۈكسەل بلوگى باشچىلىقىدا ئۆتكۈزۈلىۋاتقان 2011-يىلىق 10 چوڭ بلوگ پائالىيىتىگە قاتناشماقچى بولۇۋاتىمەن. ناۋادا سىز تورخۇمار ۋە تەدبىركار بلوگلىرىنى ياقتۇرسىڭىز، ئۇنىڭ تېخىمۇ يىراق كەلگۈسىگە، تېخىمۇ ئېگىزگە سەكرىشىنى ئۈمىد قىلسىڭىز، ئۇنداقتا ئازراق ۋاقتىڭىزنى چىقىرىپ تورخۇمار ۋە تەدبىركار بلوگلىرى ئۈچۈن بىردىن بېلەت تاشلاپ قويغايسىز(ھايال ئۆتمەيلا بېلەت تاشلاش باسقۇچىغا كىرىشىمىز مۇمكىن). سىزنىڭ ھەر بىر بېلىتىڭىز ۋە تورخۇمار ۋە تەدبىركار ئۈچۈن ھەرىكەتلەندۈرگۈچ بولۇپلا قالماستىن، يەنە سىزنىڭ تورخۇمار ۋە تەدبىركارغا بولغان ئېتىراپ قىلىشىڭىز شۇنداقلا ماڭا سۇنغان مەدەت بايرىقىڭىز بولۇپ قېلىشى مۇمكىن! بۇ يەردە تورخۇمار ۋە تەدبىركار بلوگىنى ياقتۇرىدىغان تورداشلارنىڭ مېنى ئىزچىل قوللاپ قۇۋۋەتلەپ كېلىۋاتقىنىغا يەنە بىر قېتىم سەمىمىي رەھمىتىمنى بىلدۈرىمەن…

بەلكىم كۆپ قىسىم تورداشلارغا مەزكۇر پائالىيەت تونۇشلۇق بولۇشى مۇمكىن. ئەگەر بۇ پائالىيەت ھەققىدە قەتئىي ئاڭلاپ باقمىغان بولسىڭىزمۇ ھېچقىسى يوق. چۈنكى بۇ 10 چوڭ بلوگنى، يەنى كۆپچىلىك ئۆزىنىڭ قەلبىدىكى نادىر نامزات دەپ قارىغان بلوگلارنى نامزاتلىققا كۆرسىتىدىغان ۋە بېلەت تاشلاش ئارقىلىق بلوگ ئىگىسىنىڭ بۇ پائالىيەتتە دەرىجىگە ئېرىشىشى ئارقىلىق ئۇنىڭ بىر يىلدىن بۇيانقى ئەجرى مۇئەييەنلەشتۈرىلىدىغان، يېڭى يىلدىن باشلاپ تېخىمۇ زور مەدەت ۋە ئىلھام، مۇھىمى يۈكسەك مەسئۇلىيەت بىلەن كەڭ ئوقۇرمەنلەر ئۈچۈن تېخىمۇ ياخشى بىر سورۇن ھازىرلايدىغان پائالىيەت!

يۈكسەل بلوگىدىكى 10 چوڭ بلوگ ھەققىدىكى باياناتلار

يېڭى بىر يىلدا كۆپچىلىك ياقتۇرىدىغان يېڭى يازمىلار، ئۆزگىچە ئۇچۇرلارنى داۋاملىق تەمىنلەش، تېخىمۇ كۆپ نادىر مەزمۇنلار ئارقىلىق تورداشلارنىڭ تور مەنىۋىيىتىنى بېيىتىش ئۈچۈن مەن كۆپچىلىكنىڭ ئۈمىدىنى يەردە قويماسلىققا داۋاملىق تىرىشىمەن! خوش، بۇ يەردە يەنە تەكەللۇپ سۆزلىرىنى قىلىپ ئولتۇرماي، تىرىشىشىم ئېنىق، پەقەت بۇ تىرىشىشنىڭ تېخىمۇ كۆپ تورداشلىرىمنىڭ ئېتىراپ قىلىشىغا ۋە مۇئەييەنلەشتۈرىشىگە ئېرىشىشىنى ئۈمىد قىلىمەن!

تورخۇمارلار كۇلۇبى:
تەدبىركار تور بېكىتى: http://www.tedbirkar.net

بېلەت تاشلاش ئۇسۇلى:

نۆۋەتتە نامزات بلوگلاردىن 20 بلوگ تىزىپ چىقىلغان بولۇپ، تورخۇمار ۋە تەدبىركار بلوگى ئايرىم-ئايرىم ھالدا 7 ۋە 13-ئورۇنغا تىزىلغان. بېلەت تاشلاش ئورنى بولسا ئىزدىنىش، مىسرانىم، بىلىك، نۇرقۇت ۋە كروران مۇنبىرىدە ئېلىپ بېرىلىدۇ. ناۋادا كۆپچىلىكنىڭ يۇقارقى مۇنبەرلەرگە تىزىملاتقان بولسا بېلەت تاشلاش ئورنىدىن كىرىپ ئايرىم-ئايرىم ھالدا 7-ئورۇندىكى تەدبىركار بلوگى ۋە 13-ئورۇندىكى تورخۇمار بلوگىغا بېلەت تاشلىسا بولىدۇ.

تولۇقلىما:

پائالىيەت ئوڭۇشلۇق ئاخىرلاشتى. تورخۇمار ۋە تەدبىركار بلوگلىرى تەرتىپ بويىچە 3- ۋە 7-بولۇپ، ئەلداۋا شىركىتى تەمىنلىگەن 600 يۈەن نەق پۇل بىلەن مۇكاپاتلاندى. ئاخىرىدا مېنى قوللىغان بارلىق تورداشلارغا بۇ يەردە يەنە بىر قېتىم سەمىمىي رەھمىتىمنى بىلدۈرىمەن!