تەشنا تېخنىكا كۇلۇبى

IT ساھەسىگە قىزىقىدىغان ھەربىرىمىزنىڭ خەۋەر تاپقىنىدەك 4 - ئاينىڭ 2 كۈنىدىن 4- كۈنىگىچە ئامىرىكىنىڭ سانفىرانسىسكو شەھرىدە مىكروسوفىت Build 2014 ئاچقۇچىلار چوڭ يىغىلىشى ئۆتكۈزۈلدى. بۇ قېتىمقى يىغىلىشتا مىكروسوفىت شىركېتى پىروگرامما تۈزگۈچىلەر ۋە كەڭ ئىستىمالچىلارغا ئاز بولمىغان يىڭى ئۇچۇر ۋە مەھسۇلاتلارنى ئىلان قىلدى. بەزى كىشىلەر بۇ قىتىمقى يىغىلىشنى مىكروسوفىتنىڭ تەرەققىيات يۆنىلىشنى تەڭشەپ، ئىستىراتىگىيە بەلگىلىشىدىكى مۇھىم بۇرۇلۇش دەپ قارىدى. گەرچە بۇ قىتىم ئالاھىدە كۆپ يىڭى مەھسۇلات ئېلان قىلىنمىغان بولمىسىمۇ، كىشىلەرگە مىكروسوفىتنىڭ رىقابەتچىلىرىگە قارىتا قايتىدىن ھوجۇمغا ئۆتكەنلىكىدەك بىر ھەقىقەتنى بايان قىلىپ بەردى. خوش ئۇنداقتا بىزمۇ IT پاراڭلىرى سەھىپىمىزدە بۇ قېتىمقى يىغىلىش ھەققىدە قىسقىچە پاراڭ سوقايلى.
مىكروسوفىت بۇ قىتىمقى يىغىلىشتا رەسمىي ھالدا WP8.1 ۋە Winodws 8.1 نىڭ مۇھىم يىڭىلانما ياماقلىرىنى، Lumia930/630/635 تىپلىق ئۈچ يۈرۈش ۋېندوۋس سېستىمىلىق تىلىفۇنىنى ئىلان قىلغاندىن سىرىت تىلغا ئالغۇدەك يىڭى مەھسۇلات ئىلان قىلمىدى. تورداشلار تەلپۈنىۋاتقان Surface mini ھەققىدىمۇ ھېچقانداق ئۇچۇر ئاشكارلىمىدى. ئاساسلىق گەپلەر يەنىلا Windows تىن ئىبارەت قىرى ماركىنى چۆرىدىگەن ئاساستا بولۇندى.

[t]WP8.1 غا Cortana ئاۋازلىق ياردەم ئىقتىدارى سەپلىنىپ ئاندرويىد ۋە ئالمىلارغا جەڭ ئىلان قىلدى[/t]
Cortana نۆۋەتتىكى WP8 نىڭ ئىزدەش پىروگىراممىسى ئورنىغا دەسستىلىدىغان بولۇپ، پۈتكۈل تېلىفۇندىكى ھۆججەتلەرنى ئاۋازلىق بۇيرۇق بىلەن ئىزدەش ئەمەلگە ئاشۇرۇلغان. بۇ خىل قۇرۇلمىدىن پايدىلىنىپ، ئىشلەتكۈچىلەر تېلىفۇنلىرىدىكى ھۆججەتلەرنى قولاي ئىزدېگەندىن سىرىت، ئاۋازلىق بۇيرۇق بىلەن تېلىفۇن ئۇرۇش، قوبۇل قىلىش، ئۇچۇر يوللاش، خاتىرە يېزىش ۋە تەڭشەكلەرنى ئۆزگەرتىشتەك بىر تالاي مەشغۇلاتلارنى قىلالايدۇ. Cortana بىر خىل ئەقلىي ئىقتىدارلىق ئاۋازلىق بۇيرۇق قۇرۇلمىسى بولۇپ، ئىشلەتكۈچىنىڭ ئاۋازى، ئادىتى، ۋە قىززىق نوقتىلىرىغا ئاپتوماتىك ماسلىشىپ، ئىجرا ئۈنۈمىنى ئۈلۈكسىز ئاشۇرالايدۇ.

WP8.1 تېلىفۇنلىرىغا Cortana ئاۋازلىق بۇيرۇق قۇرۇلمىسى سەپلەنگەندىن سىرىت تۆۋەندىكىدەك بىرقاتار يىڭىلىقلار قوشۇلدى:
يىڭىچە ئىكىران قۇلۇپپىسى ئالماشتۇرۇلدى.
يىڭىچە ئۇچۇر مەركىزى تەمىنلەندى.
كارخانىچىلارغا خاس بولغان VPN ئىقتىدارى سەپلەندى.
ئەپ دۇكىنى پاسون ئۆزگەرتىپ، ئىشلەتكۈچىلەرگە تېخىمۇ قولايلىقلاشتۇرۇلدى.
يىڭىچە Wi-Fi Sense ئىقتىدارى قوشۇلۇپ، دوسىتلار ئارا WiFi پارولىنى بەھىرلىنىش ئەمەلگە ئاشۇرۇلدى.
Skype رەتلىنىپ، ئاۋازلىق ۋە سۈرەتلىك پاراڭلىشىش ھالىتىنى ئالماشتۇرغىلى بولىدىغان قىلىندى.
كونۇپكىلىق كىرگۈزۈش جەھەتتە يەنىمۇ ئىلغارلاشتۇرۇلدى.
IE11 دا «مەخپىي زىيارەت» ۋە «ئوقۇش ھالىتى» دىكى زىيارەت ئىقتىدارى سەپلەندى.

[t]مىكروسوفىت ئۈسكۈنىلەر ئارا سېغىشچانلىقنى ئەمەلگە ئاشۇرۇپ، ئىكىرانلىق ئۈسكۈنىلەرگە مونۇپۇللىقنى باشلىۋەتتى[/t]
Windows 8.1 Update بۇ قىتىم ئاساسلىق كۈچنى ئىشلەتكۈچى - ئۈسكۈنە ئوتتۇرىسىدىكى مۇناسىۋەتنى قولايلاشتۇرۇشقا قاراتتى. ئىلگىرى نۇرغۇن كىشىلەر Windows8 نىڭ كومپىيوتېردىكى ھالىتىگە تازا كۆنەلمىگەنلىكىنى، ھەتتا بىر قىسىم كومپىيوتېر شىركەتلىرى بۇ ھەقتىكى ئوچۇق ئەيىبلەشلىرىنى ئوتتۇرىغا قويغان ئىدى. مىكروسوفىت تاختا يۈزلۈك ئۈسكۈنىلەرنى نەزەردە تۇتۇپ، ئۈستەل يۈزلۈك ئۈسكۈنىلەردە ئىشلەتكۈچىلەر تەسىراتىغا سەل قارىغانلىقىنى ئىتىراپ قىلىپ، Windows 8.1 Update ماۋۇس ۋە كونۇپكا تاختىسى ئىقتىدارلىرىنى كۈچەيتىپلا قالماي، Modern UI ئۇسلۇبىدىكى مىترو كۆرۈنمىلەرنىڭ ئۈنۈم دائىرىسىنى تېخىمۇ كىڭەيىتتى.Windows 8.1 Update نىڭ يىڭىلاش يامىقى 4 - ئاينىڭ 8 - كۈنى رەسمىي تارقىتىلىدۇ.
مىكروسوفىت Windows ئەپلىرىنىڭ ئۈستەل يۈزلۈك كومپىيوتېر، تاختا كومپىيوتېر، تېلىفۇن ۋە Xbox One مۇھىتىدا نورمال ئىجرا بولىدىغانلىقىنى ئىلان قىلدى. يەنى، بۇنى ئىكرانلىق ئۈسكۈنىلەرنى بىرلىككە كەلتۈرۈش دەپ چۈشەنگىنىمىزدە بۇنىڭ دەۋىر بۆلىگۈچ قىممەتكە ئىگە بىر يىڭىلىق ئىكەنلىكىنى ئىتىراپ قىلماي تۇرالمايمىز. دېمەك، كېيىنكى يۈزلىنىشتە ۋېندوۋس سېستىمىلىق ھەرقانداق ئۈسكۈنە ئارا بارلىق ئەپلەر سېغىشچانلىققا ئىگە بولىدۇ. دېتال ئاچقۇچى تەرەپنىڭ يۈكى زور دەرىجىدە يىنىكلەيدۇ.

بۇنىڭدىن سىرىت Windows نىڭ قولى ھازىر ئەڭ قىززىق نوقتا بولىۋاتقان كائىنات تورى(物联网- مەن شۇنداق ئالدىم)غىمۇ سوزۇلغان بولۇپ، تۇنجى Windows سېستىمىلىق پىئانىنونى مەيدانغا كەلتۈردى. يەنى بۇخىل پىئانىنوغا Windows سېستىمىسى قاچىلانغان بولۇپ، Windows ئەپلىرى نورمال ئىجرا بولىدۇ ۋە پىئانىنونى تەڭشەش، چالغۇچىنىڭ خاتالىقىنى تۈزۈتۈش ئىقتىدارىغا ئىگە.

[t]ئۈچ يۈرۈش يىڭى تىپتىكى تېلىفۇن بازارغا سېلىندى، WP8.1 غا كۆچمەسلىككە باھەنە قالمىدى[/t]

مىكروسوفىتقا قوشىۋېلىنغان نوكىيا يىقىندا بايراقدار مەھسۇلاتى بولغان Lumia 930 نى بازارغا سالدى(ئەمەلىيەتتە ئۇ بۇرۇنلا بازارغا سېلىنغان بولۇپ، Lumia ICON نىڭ خەلقارالىق نۇسخىسىدىن ئىبارەت). Lumia 930 گە 5 سۇڭلۇق 1080P ئىكىران، MSM8974 تۆت يادرولۇق 2.2GH چاستوتىلىق بىرتەرەپ قىلغۇچ، 20 مىليۇن پېكىسللىق ئاپپارات سەپلەنگەن بولۇپ PureView تېخنىكىسىنى قوللايدۇ. بۇ تىپلىق تېلىفۇننىڭ ئاق، قارا، ئاپلىسىن، يىشىل رەڭلىك نۇسخىلىرى بار، تاشقى قۇرۇلمىسىغا مىتال قاپچۇق ئىشلىتىلگەن، سىمسىز توك قاچىلاش ئىقتىدارى سەپلەنگەن.

Lumia 930 دىن سىرىت نوكىيا يەنە يىڭىدىن ئىككى يۈرۈش ئوتتۇرا تەننەرىخلىك Lumia 630/635 تېلىفۇنلىرىنى بازارغا سالدى. بۇ تىپتىكى تېلىفۇنلارغا 4.5 سۇڭلۇ 800x480 پېكىسىل ئېنىقلىقتىكى ئىكىران، 1.2GH چاستوتىلىق يۇقىرى سۈرئەتلىك بىر تەرەپ قىلغۇچ، 1GB RAM+8GB ROM ئىچكى سىغىم ۋە ساقلىغۇچ، 5 مىليۇن پېكىسىللىق ئاپپارات سەپلەنگەن.
Lumia 930 بۇ يىل 6 - ئايدا ياۋرۇپا ۋە ئاسىيا بازارلىرىغا سېلىنىدۇ، نۆۋەتتىكى بىكىتىلگەن باھا 599 دوللار(3721.587 يۈەن) . Lumia 630/635 تىپلىق تېلىفۇنلار 5 - ئايدا ئاسىيا بازارلىرىغا سېلىنىدۇ ۋە ئۇلاپلا ئوتتۇرا شەرىق ياۋروپادا سېتىلىشقا باشلايدۇ.نۆۋەتتىكى بېكىتىلگەن باھا 189دوللار(1172 يۈەن) ئەتىراپىدا بولىدۇ.

خەۋەرلەردىن كۆرە، بۇندىن كېيىن يىڭى تىپتىكى Windows تېلىفۇنلىرىغا WP8.1 قاچىلىنىدۇ، 4- 5 - ئاي ئىچىدە WP8.1 چۈشۈرۈشكە تەمىنلىنىدۇ، ئېلىگىرى سېتىۋالغان WP8 تېلىفۇنلىرىنى بىردەك WP8.1 نەشر كۆتۈرۈشكە بولىدۇ.
خولاسە كالام
مىكروسوفىت بۇ قىتىم رىۋايەتلەردىكى Surface mini ھەققىدە ھېچقانداق ئۇچۇر بەرمىدى، بىراق بۇندىن كېيىن 9 سۇڭدىن كىچىك كۆچمە ئۈسكۈنىلەرگە Windows سېستىمىسىنىڭ ھەقسىز تەمىنلىنىدىغانلىقىنى ئىلان قىلدى. ئىلگىرىكى تور غەيۋەتلىرىگە كۆرە، مىكروسوفىتنىڭ كېيىنكى يۆنىلىشى سەزمە ئىكىرانلىق ئۈسكۈنە سېستىمىلىرىغا يۈزلىنىدۇ دەپ قارالغان بولسىمۇ، بۇ قىتىمقى يىغىلىشتىن شۇنداق خولاسە چىقىرىشقا بولىدۇكى: مىكروسوفىت ھەرزامان Windows نى مەركەز قىلغان ھالدا ئىش ئېلىپ بارىدۇ، Windows سېستىمىسىنى ئۈسكۈنىلەر ئارا سىغىمچانلىققا ئىگە قىلىنىپ، IOS, Android ھەتتا Linux سېستىمىلىرىغا تاقابىل تۇرىدۇ ۋە بازار ئىگەللەيدۇ. دېمەك Windows ھامان مىكروسوفىت قولىدىكى گۆھەرلىك ئورنىنى يوقاتمايدۇ.

ئەسكەرتىش: مەزكۇر يازما ئىجادىي بولۇپ خەۋەر توربەتلىرىگە مەنبەسىنى ئەسكەرتمەستىن چاپلىنىپ قالسا يىنىك بولغاندا ئەخلاقسىزلىق، ئىغىر بولغاندا نۇمۇسسىزلىق قىلمىشىغا چۈشىدۇ. بلوگداشلارنىڭ بۇ قىتىمقى يىغىلىش ھەققىدە كەڭ كۇشادە پاراڭغا جۈر بولىشىنى ۋە نەزەردىن چۈشۈپ قالغان يىڭىلىقلارنى ئىنكاس شەكلىدە بەھىرلىنىشىنى ئۈمۈد قىلىمىز!