دادامنىڭ قولى

    دادامنىڭ قولى ماينۇر توختى مېنىڭ دادام تولىمۇ مىھرىبان ، جاپاكەش ، كۆيۈمچان دادا . ئۇنىڭ قوللىرى جاپا – مۇشەققەت دەستىدىن يېرىلىپ كەتكەن بولۇپ ، باشقا ساۋاقداشلىرىمنىڭ داداسىنىڭ قولىدىن خېلى زور پەرقلىنىپ تۇرىدۇ . دادامنىڭ ئەنە شۇ قاداق باسقان قوللىرىنىڭ سىماسى ھەردائىم كۆز ئالدىمغا كېلىۋالغان چاغدا ، ئىختىيارىسىز كۆزۈمدىن ياشلار تاراملاپ چۈشىدۇ . بەلكىم ، بەزىلەر ئۆز دادىسىنىڭ بۇنداق قولىدىن نۇمۇس قىلىشى ، «مېنىڭ يۈزۈمنى چۈشۈردى» دەپ باتناپ يۈرۈشى مۇمكىن . ئەمما ، مەن ھەرگىزمۇ ئۇنداق ئەمەس . مەن دادامنىڭ قولىنى ياخشى كۆرىمەن ، ئۇنى يېنىچلاپ – يېنىچلاپ باغرىمغا قويغۇم ، يۈزۈمگە يېقىپ سۆيگۈم كېلىدۇ . چۈنكى ، دادام ئەنە شۇ قاداق باسقان قوللىرىغا تايىنىپ ، بىز بىر ئائىلە كىشىلىرىنىڭ تۇرمۇشىنى قامداپ كەلدى ، بىزنى باشقىلار ئالدىدا بويۇن قىسىپ يۈرگۈزمىدى . دادام - مېنىڭ ئۈلگەم . دادامنىڭ قاداق باسقان قولى - مەن ئۈچۈن تېخى ئۆتۈلمىگەن يېڭى دەرس . ئۇ ھەركۈنى ھاردىم – تالدىم دېمەستىن جاپالىق ئىشلەش ئارقىلىق بىزگە ھاياتنىڭ نەقەدەر قىممەتلىك ، گۈزەللىكىنى ھېس قىلدۇرۇپ كەلدى . دادامنىڭ قولى _ مېھرى – شەپقەتلىك قول . دادامنىڭ ئۆز قولى بىلەن بېشىمنى سىلاپ تۇرۇپ ئېيتقان ھەربىر سۆزى مەن ئۈچۈن دانالارنىڭ سۆزىدىن نەچچە ھەسسە ئارتۇق بىلىنىدۇ ، ئۇ قول ماڭا دۇنيادىكى كىشىلەر ئارىسىدىكى مېھرى – مۇھەببەت ، ئاقكۆڭۈللۈك توغرىسىدا دەرس سۆزلەيدۇ . مەن دادامنىڭ قولىنى ياخشى كۆرىمەن ، ئۇنى سۆيىمەن ، ئۇنىڭغا تەلپۈنىمەن . چۈنكى مېنىڭ تەقدىرىم ، ئېستىقبالىم دادامنىڭ قاداق باسقان ئەشۇ قوللىرىدىكى يول سىزىقلىرىغا تۇتاشقان .
يېتەكچى : قۇربانجان توختى ئازىق (ئاپتۇر _ ئاتۇش شەھەر ئازاق يېزا مەرگىزى مەكتەپ كىچىك مۇخبىرلار پونكىتىدىن)