ئۈلۈم ئەلچىسى

ئۆتمۈشتە بىر كىشى ئەزرائىل ئەلەيھىسسالام بىلەن دوست بۇلۇپ قاپتۇ. ئەزرائىل ئەلەيھىسسالام ئۇنىڭ قېشىغا كەلسىلا، -مىنى يوقلاپ كەلدىڭمۇ؟ ياكى جېنىمنى ئالغىلى كەلدىڭمۇ؟ - دەپ سورايدىكەن.

-        سېنى يوقلاپ كەلدىم، دەيدىكەن ئەزرائىل ئەلەيھىسسالام.

-        بىر كۈنى ھېلىقى كىشى ئەزرائىل ئەلەيھىسسالامغا : مەن سەندىن شۇنى ئۆتۈنۈپ سورايمەنكى، دوستلىقىمىزنىڭ يۈزىنى قىلىپ، ئەجىلىم توشقاندا جېنىمنى ئالغىلى كىلىدىغانلىقىڭنى ماڭا خەۋەر قىلىدىغان بىر ئەلچى ئەۋەتسەڭ.

-        چوقۇم دېگىنىڭدەك قىلىمەن، دەپتۇ ئەزرائىل ئەلەيھىسسالام.

-        بىر كۈنى ئەزرائىل ئەلەيھىسسالام ھېلىقى كىشىنىڭ قېشىغا كەپتۇ.

-        ئۇ كىشى ئەزرائىل ئەلەيھىسسالامغا مىنى يوقلاپ كەلگەنسەن ھەقىچان دەپتۇ .

-        ئۇنداق ئەمەس، بۇ قېتىم جېنىڭنى ئالغىلى كەلدىم، دەپتۇ.

-        مەن سەندىن جېنىمنى ئالغىلى كېلىدىغانلىقىڭدىن مېنى خەۋەرلەندۈرىدىغان ئەلچى ئەۋەتىشىڭنى ئۆتۈنگەن ئىدىمغۇ، دەپتۇ.

-        مەن دېگىنىڭدەك قىلدىم.

-        قېشىمغا سەن ئەۋەتكەن ئۇ ئەلچى كەلمىدىغۇ؟

-        كەلدى..... ئىلىپتەك قەددىڭ يادەك ئىگىلدى. قۇندۇزدەك قاپقارا چاچلىرىڭ ئۇچتەك ئاقاردى. گۈلدۈرمامىدەك چىقىدىغان ئۈنۈڭ ئىچىگە چۈشۈپ كەتتى. شۈنچە ئۆتكۈر كۆزلىرىڭ خىرەلەشتى. ئارزۇ- ئۈمۈدلىرىڭ ئۈزۈلدى. سەن مەندىن بىرلا ئەلچى سورىغان ئىدىڭ، مەن ساڭا ئەلچىدىن بىر قانچىنى ئەۋەتتىم، سەن يەنە ماڭا نىمە دەپ مالامەت قىلىسەن؟ دەپتۇ ئەزرائىل ئەلەيھىسسالام.

--------------