شاڭخەي قىران شىركىتىنىڭ باش دىرېكتورى مۇھەممەدئەلى ئەپەندىنى زىيارەت

شاڭخەي قىران سودا چەكلىك شىركىتىنىڭ باش دىرېكتورى مۇھەممەدئەلى ئەپەندىنى زىيارەت قىلىش خاتىرسى 
      (زىيارەت چ چ دا يېزىقچە سۆھبەت شەكلىدە ئېلىپ بېرىلغان)   

 ئۇنىۋېرسىتېتنى

ئەسسالامۇ-ئەلەيكۇم مۇھەممەدئەلى ئەپەندى، ئالدى بىلەن مەندەك ئالى مەكتەپنى پۈتتۈرۈپ  خىزمەت تاپالماي يۈرگەن ئاددى بىر ئىشسىزنىڭ زىيارىتىنى قوبۇل قىلغانلىقىڭىزغا چىن كۆڭلۈمدىن رەھمەت ئېيتىمەن. 
    ئالدى بىلەن سىزگە ئۆزەمنى تونۇشتۇرۇپ ئۆتەي، ئىسمىم مۇھەممەد ،سىزنىڭ ئىسمىڭىزغا ئوخشاپ قالىدۇ (خا–خا)،  شىنجاڭ ئۇنىۋېرسىتېتىنى پۈتتۈرگىلى 2 بولدى، ھازىر ئىشسىز. ئاساسى مەقسەتكە كەلسەك،  خىزمەت مەسىلىسى نۆۋەتتە ئالىي مەكتەپنى پۈتتۈرۈۋاتقان سىتۇدىنتلار ئۈچۈن بىر چوڭ مەسىلە بولۇپ قالدى،  سىزمۇ ئوقۇغۇچىلىق تارىخىڭىزنى باشتىن كەچۈرۈپ، تېزلا شېركەت قۇرۇپ كۆرۈنەرلىك نەتىجىلەرنى قولغا كەلتۈرۈۋېتىپسىز، تىرىشچانلىقىڭىزغا بارىكاللا، ئەلۋەتتە مەنمۇ شىركىتىڭىزنىڭ تېخمۇ روناق تېپىپ دۆلەت ئىچى ۋە سىرتىغا يۈزلىنىشىنى، مۇۋەپپەقىيىتىڭىزنىڭ تېخىمۇ زور بولۇشىنى ئۈمىد قىلىمەن. سىز، بارلىق سىتۇدېنتلىرىمىز ئۈلگىسى بولۇش سۈپىتىڭىز بىلەن شىركىتىڭىز ۋە شىركەت قۇرۇش جەريانىڭىز ھەققىدە سۆزلەپ بەرسىڭىز. شۇنداقلا نۆۋەتتە ئىش كۈتۈپ تۇرۇۋاتقان ياكى ئوقۇش پۈتتۈرۈش ئالدىدا تۇرغان سىتۇدېتنلارغا قانداق كۆڭۈل سۆزلىرىڭىز بار ئاڭلاپ باقساق دېگەن ئۈمىدتە.

مۇھەممەدئەلى ئەپەندى:  ئەسسالامۇ ئەلەيكۇم، ئالدىنقى كۈنى سىزنىڭ ماڭا تېلفون قىلىپ مەندىن، مەن ۋە شىركەت ھەققىدە ئەھۋال سورىغانلىقىڭىزغا ھەم شۇنداقلا مېنى زىيارەت قىلماقچى بولغانلىقىڭىزغا چىن  كۆڭلۈمدىن تەشەككۈرۈمنى بىلدۈرىمەن. 

سوئال: مۇھەممەدئەلى ئەپەندى ئالدى بىلەن ئۆزىڭىزنى بىر تونۇشتۇرۇپ ئۆتكەن بولسىڭىز؟ 8adnw |  
جاۋاب: ئىسمىم مۇھەممەدئەلى ئوسمان، 1980-يىلى 6-ئاينىڭ 26-كۈنى قەشقەر ۋىلايىتىنىڭ قاغىلىق ناھىيىسدە بىر دوختۇر ئائىلىسىدە  تۇغۇلغان. ئائىلىمىزدە 6  ئوغۇل 1  قىز پەرزەنت بولۇپ مەن بالىنىڭ ئالتىنجىسى، بەش ئاكام بىر سىڭلىم بار. بۇ يىل 29 ياشقا كىرگەن بولساممۇ تېخىچە بويتاق خىزمەت ھەلەكچىلىكىدە).  
   مەن باشلانغۇچ ۋە ئوتتۇرا مەكتەپلەرنى قاغىلىقتا تاماملىدىم، 1999-يىلى 9–ئايدا ئەلا نەتىجە بىلەن شىنجاڭ ئونىۋېرسىتېتى ئېلېكترون قاكۇلتىتىنىڭ «خەۋەرلىشىش قۇرۇلۇشى» كەسپىگە قوبۇل قىلىندىم، 2004-يىلى شىنجاڭ ئونىۋېرسىتېتىنى پۈتتۈردۈم.  

سوئال: ھازىر سىتۇدېنتلار ئونىۋېرستىتېنى پۈتتۈرگەندە ئالدى بىلەن خىزمەت ئىزدەيدۇ،  سىزمۇ ئۇنىۋېرسىتېتنى پۈتتۈرگەندىن كېيىن شىنجاڭدا خىزمەت ئىزدەپ باقتىڭىزمۇ؟ نېمە ئۈچۈن شاڭخەيگە بېرىپ ئوقۇدىڭىز؟  

 جاۋاپ: مەنمۇ ئەينى ۋاقىتتىكى ساۋاقداشلىرىم ۋە باشقا دوستلىرىمغا ئوخشاش خىزمەت تېپىش ئۈچۈن ئىزدىنىپ باقتىم، ھەم ھۆكۈمەت مەمۇرى ئورگىنىدىن خىزمەتمۇ تاپالىدىم، لېكىن ئەينى ۋاقىتتا تاپقان خىزمىتىمنىڭ ئۆزەمگە ماس كەلمەيدىغانلىقىنى ھەم شۇنداقلا بۇ خىزمەتنى داۋاملىق ئىشلىسەم ئۆز غايىلىرىمنىڭ ئەمەلگە ئاشمايدىغانلىقىنى ھېس قىلىپ، بۇ خىزمەتتىن ۋاز كەچتىم، شۇنداقلا ئۆزەمنىڭ غايىسى ئۈچۈن چوڭقۇر ئويلاندىم ۋە ئىزدەندىم، ھەم  ئونىۋېرستىتېتنى پۈتتۈرۈپلا شاڭخەيگە چەتئەل تىلى ئۆگىنىش ئۈچۈن كەلدىم، «شاڭخەي چەتئەل تىلى ئونىۋېرسىتېتى» ۋە «تۇڭجى ئونىۋېرسىتېتى» دا ئىنگىلىز تىلى ۋە گىرمان تىلى ئۆگەندىم.
   سوئال: سىز شاڭخەيدىكى چەتئەل تىلى ئوقۇشنى تاماملىغاندىن كېيىن نېمە ئىشلارنى قىلدىڭىز؟ نېمە ئۈچۈن شاڭخەيدە شېركەت قۇرماقچى بولۇپ قالدىڭىز؟
   جاۋاپ :  بۇيەردىكى ئوقۇشۇم ئاخىرلاشقاندىن كېيىن، شاڭخەيدىكى بىر قانچە شىركەتلەردە خىزمەت قىلدىم ھەتتا بىر ئۇيغۇر رېستورانىدا دىرېكتور بولۇپمۇ ئىشلەپ باقتىم. مانا بۇ مەزگىللەردە ئىگىلىك تىكلەش، يىڭىلىق يارىتىشقا ئائىت نۇرغۇن بىلىملەرنى ئىگەللىدىم، نۆۋەتتە شاڭخەي دۆلىتىمىزنىڭ ئىقتىساد ۋە سانائەت مەركىزى بولۇپلا قالماستىن، دۇنيادىكى خەلقئارالىق سودا شەھىرى، ،شاڭخەيدە ئىگىلىك تىكلەپ تەرەققى قىلىش پۇرسىتى باشقا شەھەرلەرگە  سېلىشتۇرغاندا نىسبەتەن كۆپ، (گەرچە جاپالىق بولسىمۇ) شۇڭا مەن شاڭخەيدە شېركەت قۇرۇشنى قارار قىلدىم. 2007– يىلنىڭ ئاخىرىدا بىر ئۇيغۇر ئاكىمىز بىلەن بىللە «شاڭخەي نىلۇپەر خەلقئارا سودا شىركىتى» نى قۇرۇپ ئىش باشلىدۇق، ۋە كۆرۈنەرلىك نەتىجىلەرگە ئېرىشتۇق، بۇ جەرياندا سودىغا ئائىت نۇرغۇن ئەمەلىي بىلىملەر ئۆگەندىم ۋە نۇرغۇن تەجرىبىلىك بولۇپ قالدىم. 2008 - يىلنىڭ ئاخىرىدا مەن بىرگە شېركەت قۇرغان ئۇيغۇر ئاكىمىز ئۆزىنىڭ شىنجاڭغا قايتماقچى بولغانلىقىنى، شېركەتنىڭ رەسمىيەتلىرىنى شىنجاڭغا يۆتكەپ، شۇ يەردە داۋاملىق تاشقى سودا بىلەن شۇغۇللىنىپ تەرەققى قىلىش ئارزۇسىنىڭ بارلىقىنى ئېيتقاندىن كېيىن مەن شېركەتنىڭ رەسمىيەتلىرىنى  ئۇ ئاكىمىزغا قايتۇرۇپ بەردىم، ئىككىمىز ھېساۋاتنى ئايرىپ چىرايلىق ئايرىلدۇق، شۇنىڭدىن كېيىن ئۆز ئالدىمغا شىركەت قۇرۇشنى قارار قىلدىم.

سوئال؛ شىركىتىڭىز قاچان قۇرۇلغان؟ شېركەت قۇرۇشقا كەتكەن خىراجەتنى قانداق ھەل قىلدىڭىز؟  سىزنىڭ شىركىتىڭىز بىلەن تونۇشۇپ ئۆتسەك!   

جاۋاب: شېركىتىمىزنىڭ ئىسمى «شاڭخەي قىران سودا چەكلىك شىركىتى»،شىركەت 2009-يىلى 2 ئاينىڭ 4-كۈنى قۇرۇلغان. شېركەت قۇرۇشقا كەتكەن مەبلەغنى ئاساسەن دادام -ئاپاملار بەردى،  مەنمۇ ناھايىتى ئقتىسادچانلىق بىلەن بۇ پۇللارنى ئۆزجايىغا ئىشلىتىپ كېتىدىغان خىراجەتنى ئازايتىپ ئاتا-ئانامغا چۈشىدىغان ئىقىسادى بېسىمنى ئىمكانىيەتنىڭ بارىچە يېنىكلەتتىم. شىركىتىمىزنىڭ ئاساسلىق تىجارىتى ئىمپورت –ئېكسپورت سودىسى بولۇپ، مەن شىركەتتە مەملىكىتىمىزدىكى تۇنجى «مۇسۇلمانلار مۇلازىمەت مەركىزى» نى قۇرۇپ چىقتىم، بىزنىڭ مۇسۇلمانلار مۇلازىمەت مەركىزىمىز شاڭخەي شەھەرلىك ئىسلام جەمئىيتى (上海市伊斯兰教协会)، شاڭخەي شەھەرلىك مىللەت ۋە دىن ئىشلىرى كومىتېتى (上海市民族宗教委员会)، شاڭخەي شەھەرلىك ئاز سانلىق مىللەتلەر كومىتېتى (上海市少数民族委员会) قاتارلىق ئورۇنلارنىڭ ئېتىراپ قىلىشى ۋە قوللىشىغا ئېرىشتۇق. 
   مۇسۇلمانلار مۇلازىمەت مەركىزىمىز مەخسۇس شاڭخەيگە سودا، ساياھەت ۋە باشقا ئىشلار بىلەن كەلگەن دۆلەت ئىچى سىرتىدىكى مۇسۇلمانلارغا ياتاق، مۇسۇلمانچە تاماق (ئۇيغۇرچە تاماق، تۈركچە تاماق، ئەرەبچە تاماق، پارسچە تاماق، پاكىستانچە تاماق)، قاتناش (ماشىنا ئىجارىگە بېرىش، ئايروپىلان بېلىتى، پويىز بېلىتىنى ۋاكالىتەن ئېلىپ بىرىش)، مال سېتىۋېلىش، كۆرگەزمىگە قاتنىشىش، جىددى ياردەم (ئوغرى - بۇلاڭچىلارغا ئۇچراپ پاسپورت، كىملىكلىرىنى يوقىتىپ قويغان ياكى تۇيۇقسىز ھەرخىل كېسەللىرى قوزغىلىپ قالغان ئەھۋالدىكى ئالاھىدە ياردەم) ساياھەت، (شاڭخەيدە ساياھەت قىلدۇرۇش، چەتئەللىك مۇسۇلمانلاردىن ساياھەت ئۆمىكى تەشكىللەپ شىنجاڭغا ساياھەتكە ئاپىرىش)، سودا ئۇچۇرلىرى بىلەن تەمىنلەش قاتارلىق بىر يۈرۈش مۇلازىمەت بىلەن تەمىنلەيمىز، ئۇنىڭدىن سرت مۇسۇلمانچە يېمەكلىك ۋە مۇسۇلمانلارنىڭ  كۈندىلىك تۇرمۇش بۇيۇملىرىنى مۇسۇلمان دۆلەتلىرىگە ئېكسپورت قىلىش تىجارىتى بىلەن شۇغۇللىنىمىز.  
   شىركىتىمىز قۇرۇلۇپ ئۇزۇن ئۆتمەي  «شاڭخەي شەھەرلىك شىنجاڭ سودا جەمئىيىتى» (上海市新疆商会) گە ئەزا بولدۇق، مەن ھازىر شاڭخەي شەھەرلىك شىنجاڭ سودا جەمئىيتىنىڭ دائىمىي ئىشلارغا مەسئۇل ھەيئەت ئەزاسى (上海市新疆商会常务理事 )بولۇپ ئىشلەۋاتىمەن.
   سوئال؛ سىز قانداق قىلىپ مۇسۇلمانلار مۇلازىمەت مەركىزى قۇرۇشنى ئويلاپ قالدىڭىز؟  
   جاۋاب: مەن  2006–يىلى 5-ئاينىڭ مەلۇم بىركۈنى كەچ سائەت 5 لەر ئەتراپىدا پۇدۇڭدا كېتىۋاتسام ئالدىمغا بىر ئەرەب ئۇچرىدى ۋە مەندىن ئىنگىلىزچە «سىز مۇسۇلمانمۇ؟» دەپ سورىدى، مەن ئۇنىڭغا «ئەلھەمدۇلىللا» دەپ جاۋاپ بېرىشىمگە، ئۇ ئەرەب كۆزىگە ياش ئالغان ھالدا مەن بىلەن قۇچاقلىشىپ كۆرۈشتى ۋە ماڭا ئۆزىنىڭ شاڭخەيگە كەلگىنىگە 10 سائەتتىن ئاشقانلىقىنى، تېخىچە ھېچنەرسە يېمىگەنلىكىنى ئېيتىپ، مېنىڭ ئۆزىنى بىر مۇسۇلمانچە رېستورانغا باشلاپ بېرىشىمنى ئۆتۈندى، مەن ئۇنى تاكسى بىلەن  «شاڭخەي پامىر رېستورانى» غا باشلاپ ئاپاردىم، تاماق يەپ بولغاندىن كېيىن ئۇ يەنە مېھمانخانىغا ئورۇنلاشتۇرۇپ قويۇشۇمنى ئېيتتى، مەن ئۇ ئەرەبنى پامىز رېستورانىنىڭ يېنىدىكى بىر 4 يۇلتۇزلۇق مېھمانخانىغا ئورۇنلاشتۇرۇپ قويدۇم، ئۇ ياتاققا ئورۇنلىشىپ بولغاندىن كېيىن، ئۇنىڭ بىلەن خوشلۇشۇپ قايتاي دېگەندە، ئۇ زورلاپ يانچۇقۇمغا پۇل سېلىپ قويدى، سرتقا چىقىپ قارىسام نەخ 100 دوللار ئىكەن. پۈتۈن جەريانغا بىر سائەت ۋاقىت كەتتى، مەن كەچتە ياتىقىمغا قايتىپ ئۆزەمنىڭ مۇشۇ 100 دوللارنى قانداق تاپقانلىقىم ھەققىدە ئويلاندىم، شۇ ئىش يۈز بىرىپ ئۇزۇن ئۆتمەي مەن بىر ئۇيغۇر رېستورانىدا دىرېكتور بولۇپ ئىشلدىم، بۇرېستورانغا كېلىدىغان چەتئەللىكلەر نىسبەتەن كۆپرەك ئىدى، نۇرغۇن چەتئەللىك مۇسۇلمانلار شاڭخەيگە كەلگەن بىر قانچە كۈندىن بېرى مۇسۇلمانچە رېستوران تاپالماي خەنزۇلارنىڭ رېستورانلىرىدىن گۆشسىز سەي بىلەن مىفەن يېگەنلىكىنى، يەنە بەزىلەر بىر قانچە كۈندىن بېرى مىۋە- چېۋىدىن باشقا ھىچ نەرسە يېمىگەنلىكىنى ئېيتتى، مەن شۇ
چاغدىن باشلاپ شاڭخەيدە بىر مۇسۇلمانلار مۇلازىمەت مەركىزى قۇرۇشنىڭ زۆرۈرلۈكىنى ھېس قىلدىم ۋە يىرىم يىل ۋاقىت سەرپ قىلىپ پىلان يازدىم. بۇ جەرياندا ھەر يىلى شاڭخەيگە كېلىدىغان مۇسۇلمانلارنىڭ نەچچە مىليوندىن ئاشىدىغانلىقىنى، بۇ ساننىڭ يىلدىن يىلغا چوڭىيىۋاتقانلىقىنى، نۆۋەتتە شاڭخەيدە 40 مىڭدىن ئارتۇق ھەرخىل رېستورانلارنىڭ بارلىقىنى مۇسۇلمانچە رېستوراننىڭ بولسا  (ئەرەبچە، تۈركچە، پارسچە، پاكىستانچە رېستورانلارنى قوشۇپ ھېسابلىغاندا) 70 گىمۇ يەتمايدىغانلىقىنى، شاڭخەيگە كەلگەن چەتئەللىك مۇسۇلمانلارنىڭ %99 نىڭ مۇسۇلمانچە رېستورانلارنى تاپالماي كۆپ قىسىم  مۇسۇلمانچە ئەمەس  رېستورانلاردا چوشقا مېيى ئىشلىتىدىغانلىقىنى بىلمەي ئاشۇ رېستورانلاردا  گۆشسىز تاماق يەۋاتقانلىقىنى بىلدىم، ھەمدە چوقۇم مۇسۇلمانلار مۇلازىمەت مەركىزى قۇرۇپ ئاشۇ مۇسۇلمانلار ئۇچراۋاتقان بىرقاتار مەسىلىلەرنى ھەل قىلىپ بېرىش قارارىغا كەلدىم.   ئۇنىڭ ئۈستىگە ھازىر مۇسۇلمان دۆلەتلىرىنىڭ مۇسۇلمانچە يېمەكلىكلەرگە ۋە كۈندىلىك تۇرمۇش بۇيۇملىرىغا بولغان ئېھتىياجى بارغانسېرى ئېشىپ بېرىۋاتىدۇ، شۇڭا، بىز مۇسۇلمانلار مۇلازىمەت مەركىزىدىن سرت مەخسۇس مۇسۇلمانچە يېمەكلىك ۋە مۇسۇلمانچە تۇرمۇش بۇيۇملىرىنى ئېكسپورت قىلىش بىلەن شۇغۇللانماقچى.  
   سوئال: شېركىتىڭىزنىڭ خىزمەتچىلىرى كىملەر؟   
   جاۋاب: شېركىتىمىزنىڭ  خىزمەتچىلىرى شاڭخەيدىكى ئالىي مەكتەپلەردە ئوقۇۋاتقان شىنجاڭلىق ئازسانلىق مىللەت ئوقۇغۇچىلىرى ۋە بىرقىسىم چەتئەللىك مۇسۇلمان ئوقۇغۇچىلار، ئۇلارنىڭ ئىچىدە ئەرەب، تۈرك، پارس ۋە بىرقىسم ئافرىقىنىڭ مۇسۇلمان دۆلەتلىرىدىن كەلگەن ئوقوغۇچىلار بار،چەتئەللىك مۇسۇلمان ئوقۇغۇچىلار ئاساسلىق ئۆز دۆلەتلىرىدە بىزنى تەشۋىق قىلىش ۋە شۇ دۆلەتتىن كەلگەن ساياھەت ۋە سودا ئۆمىكىنى كۈتۈۋېلش ۋەزىپىسىنى ئۆتەيدۇ. شىنجاڭلىق ئوقۇغۇچىلار شىنجاڭ، گەنسۇ، نىڭشىيادىن ۋە بىر قىسىم چەتئەلدىن كەلگەن مۇسۇلمانلارنى كۈتۈۋېلىش ۋەزىپىسىنى ئۆتەيدۇ، يەنە بىر قىسىم ئۇيغۇر ئوقۇغۇچىلار مەخسۇس شىنجاڭدىن كەلگەن سودىگەرلەرنى كۈتۈۋېلىش ۋە ئۇلارنىڭ مال سېتىۋېلىشىغا ياردەملىشىش ۋەزىپىسىنى ئۆتەيدۇ.  
    سوئال: ھازىر سىلەردە قانداق قىيىنچىلىقلاربار؟   
   جاۋاب: بىزنىڭ شېركىتىمىز يېڭىدىن قۇرۇلغان بولغاچقا بىزدە مەبلەغ جەھەتتە ئازراق قىينچىلىق بار، ئەمما بۇ ۋاقىتلىق مەسىلە، بۇنىڭ ھەل بولۇپ كېتىدىغانلىقىغا ئىشىنىمىز، چۈنكى ھازىر بىر قانچە ئۇيغۇر سودىگەرلىرىمىز بىزگە مەبلەغ سېلىپ ھەمكارلىشىش توغرىسىدا بىز بىلەن سۆھبەت ئۆتكۈزۈۋاتىدۇ، بىز يەنە بىلەن ھەمكارلىشىشنى خالايدىغان ئۇيغۇر سودىگەرلەرنىڭ كۆپىيدىغانلىقىغا ئىشىنىمىز. ئەمەلىي خىزمەت ئېھتىياجىنىڭ ئېشىشىغا ئەگىشىپ، بىز تېخىمۇ كۆپ جاپاغا چىداپ يېڭىلىق يارىتىش روھىغا باي ئىختىساس ئىگىلىرىگە ئېھتىياجلىق بولۇۋاتىمىز. ئۇنىڭدىن سرت بىز شىنجاڭدىكى مۇسۇلمانچە يېمەكلىك ئىشلەپچىقىرىدىغان كارخانىلارنىڭ بىز بىلەن ھەمكارلىشىشىنى ئۈمىد قىلىمىز، بىزمۇ شىنجاڭدىكى مۇسۇلمانچە يېمەكلىك ئىشلەپچىقىرىدىغان كارخانىلارنىڭ مەھسۇلاتلىرىنى دۇنياغا يۈزلەندۈرۈش ئۈچۈن پۈتۈن كۈچىمىز بىلەن تىرىشىمىز.   
   سوئال سىزنىڭ ھازىر يەنە قاندق پىلانلىرىڭىز بار؟   

جاۋاب: شېركىتىمىزنىڭ بىرقانچە ياخشى پىلانلىرى بار بولۇپ، بۇلارنىڭ ئىچىدە، شاڭخەيدىكى شىنجاڭلىق ئوقوغۇچىلاردىن تەشكىللىگەن «تەرجىمان ئىجارىگە بېرىش مەركىزى» مىزدە ئىش باشلىنىپ بولدى، ھازىر شاڭخەيدە ئىنگىلىز تىلى، ياپنن تىلى، فرانسۇز تىلى، نېمىس تىلى قاتارلىق چوڭ تىللارنىڭ تەرجىمانلىرى تەمىنلەش  ئىھتىياجدىن ئېشىپ كەتكەن ھالەتتە، ئىش ھەققىمۇ باشقا كىچىك تىللارغا سېلىشتۇرغاندا كۆپ تۆۋەن، بىز شاڭخەيدىكى ھۆكۈمەت ئورۇنلىرى، ساياھەت كوپېراتىپلىرى، كۆزگەزمە مەركەزلىرىنى ئەرەب تىلى، تۈرك تىلى، رۇس تىلى، قازاق تىلى، ئۆزبىك تىلى، قىزغىز تىلى، تاجىك تىلى، ئەزەربەيجان تىلى، تۈكمەنىستان تىلى، پەنجاپ تىلى قاتارلىق كىچىك دۆلەتلەر تىلى تەرجىمانلىرى بىلەن تەمىنلەيمىز، ھازىر شاڭخەيدە ئىنگىلىز تىلى تەرجىماننىڭ بىر كۈنلۈك ئىش ھەققى 200 يۈەندىن ئاشمايدۇ، ئەمما قازاق، قىرغىز، ئۆزبىك تىللىرى تەرجىمانىنىڭ كۈنلۈك ئىش ھەققى 400-500 يۈەن، ھەتتا ئۇنىڭدىنمۇ كۆپرەك بولىدۇ، بىزدە بۇ خىل ئېھتىياج ئۇچۇرلىرى بار بولۇپ بۇ ئۇچۇرلار ئارقىلىق شاڭخەيدىكى شىنجاڭلىق ئوقۇغۇچىلارغا ئوقۇپ تۇرۇپ خىزمەت قىلىپ ئائىلسىىگە بولغان ئىقتىسادىي بېسىمنى يىنىكلىتىش پۇرسىتى بىلەن تەمىنلەيمىز، يەنە، بىز ئۆزىمىز كۈتۈۋالغان چەتئەللىك مۇسۇلمانلاردىن ساياھەت ئۆمىكى تەشكىللەپ شىنجاڭغا ساياھەتكە ئەۋەتىپ شىنجاڭ ساياھەتچىلىكىنىڭ گۈللىنىشى ئۈچۈن تۆھپە قوشىمىز. بىزنىڭ يەنە، مۇسۇلمانلار مۇلازىمەت مەركىزىنىمۇ باشقا چوڭ شەھەرلەرگە كېڭەيتىش پىلانىمىز بار،  بۇلاردىن باشقا بىرقانچە پىلانىمىز تېخى ئىش باشلىمىغان ھەم مەبلەغ سېلىپ ھەمكارلاشقۇچىلار بىلەن سۆھبەتلىشىۋاتقان بولغاچقا بۇلار سودا مەخپىيەتلىكىگە كىرىدۇ، شۇڭا ۋاقتىچە بۇلارنى سىزگە ئېيتىپ بېرەلمەيمەن.

سوئال: سىزنىڭ ھازىرقى ئالى مەكتەپنى پۈتتۈرۈپ خىزمەت تاپالمايۋاتقان  ۋە ئالى مەكتەپنى پۈتتۈرۈش ئالدىدا تۇرغان سىتۇدېنتلارغا قانداق كۆڭۈل سۆزىڭىز بار؟  
   جاۋاب: مېنىڭ ئەمدى ئالىي مەكتەپ پۈتتۈرگەن ياكى پۈتتۈرۈش ئالدىدا تۇرۇۋاتقان سىتۇدېنتلارغا دەيدىغان كۆڭۈل سۆزلىرىم:   
   1: دۆلەت مەمۇرىي بولۇش نۆۋەتتە ئالى مەكتەپ ئوقوغۇچىلىرىنىڭ بىردىن بىر چىقىش يولى ئەمەس. 
   ھەرقانداق بىر ئادەمنىڭ چوقۇم باشقىلار ئورنىنى باسالمايدىغان ئالاھىدىلىكى بولىدۇ، شۇنداق بولغانىكەن ھازىرقى ئالىي مەكتەپ ئوقۇغۇچىلىرى دۆلەت مەمۇرى بولۇشنى ئۆزىگە بىردىن بىر نىشان قىلىۋالماي ئۆزىدىكى ئاشۇ ئالاھىدىلىكنى بالدۇر بايقاپ ھەم شۇنداقلا ئۇنى جارى قىلدۇرۇپ جەمئىيەتتىن ئۆزىنىڭ بىر كىشىلىك ئورنىنى تېپىشى كېرەك.

2: ھازىر شىنجاڭدىكى ئالى مەكتەپ ئوقوغۇچىلىرىدا ئەڭ ئېغىر بولغان مەسىلە، ئۆزىگە ئىشەنمەسلىك، ئاتا-ئانىسىغا يۆلىنىۋىلىش.   ئادەمدە يۈكسەك بىر ئىرادە ھەم شۇ ئىرادىگە لايىق تىرىشچانلىق بولىدىكەن،بۇ دۇنيادا قىلغىلى بولمايدىغان ئىش يوق، شۇڭا مېنىڭ شىنجاڭدىكى ئالى مەكتەپ ئوقۇغۇچىلىرىغا تەكلىپىم: ئۆزەڭلارغا ئىشەنگەن ھالدا، ئۆزەڭلارنىڭ ئارزۇسى ئۈچۈن تىرىشچانلىق كۆرسىتىڭلار، گۈزەل كەلگۈسى سىلەر ئىزدەنگۈچىلەرگە مەنسۈپ!!!
   مەن ئىگىلىك تىكلەش ئارزۇسى بار سىتۇدېنتلارنىڭ ھەر ۋاقىت مەن بىلەن ئالاقىلىشىپ مەسلىھەت سورىشىنى ھەم دائىم پىكىر ئالماشتۇرۇپ تۇرۇشىنى ئۈمىد قىلىمەن، چەتئەلگە ئوقۇشقا چىقىش ئارزۇسى بار سىتۇدېنىتلار مەن بىلەن ئالاقىلاشساڭلار بېجىرش قىيىن بولغان (ئوقۇشقا قوبۇل قىلىش چاقىرىقى، پاسپورت، ۋىزاقاتارلىق) رەسمىيەتلەرنى بېجىرىشكە ياردەم بېرىمەن.  

   www.muslimserv.cn  ۋەwww.muslimonline.cn 

رەھمەت سىزگە مۇھەممەدئەلى ئەپەندى، سىزنىڭ ئىشلىرىڭىزنىڭ تېخىمۇ ئۇتۇقلۇق بولۇشىنى، شىركىتىڭىزنىڭ تېخىمۇ روناق تېپىشىنى ئۈمىد قىلىمەن. 
 

ئۆرلە بلوگىدىن ئېلىندى.