90-يىلىدىن كېيىن تۇغۇلغان ئون نەچچە بالا تۆمۈريول تارماقلىرىنىڭ تامغىسىنى ئويدۇرۇپ، ساختا خىزمەت كىنىشكىسى ۋە مائاش خاتىرىسى ياسىتىپ، پۇل قەرز ئېلىش نامى بىلەن ئالدامچىلىق قىلغان. قىسقىغىنا يېرىم يىل ۋاقىت ئىچىدە جەمئىي سەككىز قېتىم ئالدامچىلىق قىلغان بولۇپ، دېلوغا چېتىشلىق ئومۇمىي سومما 300 مىليون يۈەنگە يەتكەن. بۇ جىنايەت گۇرۇھىدىكىلەرنىڭ جىنايەت سادىر قىلىش ۋاسىتىسى بىرقەدەر يېڭى، دېلوغا چېتىشلىق سومما زور بولغاچقا، ئۆلكىلىك جامائەت خەۋپسىزلىكى مىنىستىرلىقى نازارەت قىلىدىغان دېلو قاتارىغا كىرگۈزۈلگەن. يېقىندا ئەنتۇ ناھىيەسىدىكى ساقچىلار 12 نەپەر جىنايەت گۇماندارىنى قولغا ئالغان，سوراق جەريانىدا، 12 نەپەر جىنايەت گۇماندارى ئۆزلىرىنىڭ ئالدامچىلىق قىلمىشىنى ئەينەن ئىقرار قىلغان.

      يېقىندىن بۇيان قانات يايدۇرۇلغان «ئالدامچىلىققا زەربە بېرىپ خەلقنىڭ ئەمىنلىكىنى قوغداش» ھەرىكىتى جەريانىدا، ئەنتۇ ناھىيەلىك جامائەت خەۋپسىزلىكى ئىدارىسى 20 نەچچە ياشلىق يىگىتلەرنىڭ تۆمۈريول خادىمى سىياقىغا كىرىۋېلىپ، ئۆسۈم بېرىپ قەرز ئېلىشنى باھانە قىلىپ ناھىيە ئىچىدە كۆپ قېتىم دېلو تۇرغۇزغانلىقى، دېلوغا چېتىشلىق سوممىنىڭ زور ئىكەنلىكى توغرىسىدا يىپ ئۇچىغا ئېرىشكەن. ھەمدە يىپ ئۇچىغا ئاساسەن ئەنتۇ ناھىيەلىك جامائەت خەۋپسىزلىكى ئىدارىسىنىڭ مۇئاۋىن ئىدارە باشلىقى جىن دوڭخاۋ دېلو پاش قىلىشقا ئۆزى بىۋاسىتە قوماندانلىق قىلغان، دۆلەت مۇداپىئە چوڭ ئەترىتى، چارلاش ساقچى چوڭ ئەترىتى، لياڭبىڭ ساقچىخانىسى بىرلىشىپ مەخسۇس دېلو گۇرۇپپىسى تەشكىللىگەن. شۇنىڭ بىلەن بىرگە بۇ دېلو ئۆلكىلىك جامائەت خەۋپسىزلىكى مىنىستىرلىقى نازارەت قىلىدىغان دېلو قاتارىغا كىرگۈزۈلگەن.

     ساقچىلار تەكشۈرۈش ئارقىلىق، بۇ جىنايەت شايكىسىدا جەمئىي 12 ئەزا بارلىقى، ئۇلارنىڭ ئاساسىي جەھەتتىن 90-يىلىدىن كېيىن تۇغۇلغانلىقى، ساختا خىزمەت كىنىشكىسى ۋە مائاش خاتىرىسى، بانكا كارتىسىدىكى كىرىم خاتىرىسى ياسىتىپ، قەرز بېرىپ ئۆسۈم ئېلىشنى خالايدىغان ئادەتتىكى پۇقرالارنى ئالداش نىشانى قىلغانلىقىنى ئېنىقلىغان.

     بۇلارنىڭ جىنايەت سادىر قىلىش شەكلى ئۆزگىچە بولۇپ، ئۆلكە تەۋەسىدە بۇ خىلدىكى دېلو ئاز ئۇچرايدىكەن. دېلو بىجىرگۈچى خادىمنىڭ ئېيتىشىچە، شايكىنىڭ ئاساسلىق ئەزالىرى بولغان رېن، گو، شۈ، گې فامىلىلىكلەر تۆمۈريول خىزمەتچىسى سىياقىغا كىرىۋالغان، لى فامىلىلىك بولسا مەخسۇس ساختا خىزمەت كىنىشكىسى، مائاش تالونى، بانكا ھېساباتى ياساشقا مەسئۇل بولغان ئىكەن. رېن فامىلىلىكنىڭ ئىقرار قىلىشىچە، ئۇ ئەگر دۆلەت كارخانىسىدىكى خىزمەتچىلەر پۇل سورىسا باشقىلارنىڭ ئاسان ئىشىنىدىغانلىقى، ئىككى ئۈچ ئۈلۈش ئۆسۈم ئېلىشنى خالايدىغانلىقىنى بايقىغان، شۇنىڭ بىلەن ئۇ بىر قانچە كىشى بىلەن شېرىكلىشىپ تۆمۈريول خىزمەتچىسى سىياقىغا كىرىۋېلىپ ئالدامچىلىق قىلىشنى پىلانلىغان. باشقىلارنى تېخىمۇ ئېزىقتۇرۇش ئۈچۈن ئۇلار يەنە شايكىدىكى قالغان يەتتە كىشىنى تەكلىپ قىلىپ ئۆزىگە قوشۇۋالغان، بۇ يەتتە كىشى كېپىل بولغۇچى سۈپىتىدە توختامغا قول قويۇشقا مەسئۇل بولغان.

     پۇلنى ئالداپ ئالغاندىن كېيىن، ئاز بىر قىسىمىنى كېپىل بولغۇچىلارغا بېرىپ قالغان قىسىمىنى باش جىنايەتچىلەر ئالغان. 2014-يىلى 11-ئايدىن 2015-يىلى 6-ئايغىچە، بۇ ئالدامچىلىق شايكىسى مۇشۇ خىل ئۇسۇلنى قوللىنىپ كۆپ قېتىم ئەنتۇ ناھىيەسىدە باشقىلارنىڭ پۇلىنى ئالداپ ئېلىۋالغان.

      نۆۋەتتە، 12 نەپەر جىنايەت گۇماندارى جىنايى ئىشلار بويىچە توختىتىپ قويۇلدى.