1
نەسەبتە كۈللى ئالەم ئىتراپىلىق مىللىتىم باردۇر ،
ئۇغۇز پۇشتى _مۇقامى كاتتىلىقتا زىننىتىم باردۇر .

يۈسۈپ ، مەخمۇت كىتابىغا يىزىلغان نىي باھادارلىق ،
يەنە تاڭ قامۇسىدا قەيىت ئەجىرلىك مېنىتىم باردۇر .

يىپەك ، قاشتاش ، گىلەم ، بۇغداي ، بېدە ، قەغەز . . . گە بىز ھەغدا ،
(بۇنى جاڭ چىيەنمۇ تەستىقلايدۇ تۆھپەم ، قىممىتىم باردۇر .)

قەدىم تۆھپە _ يىراق ئۆتمۈشكە تالىق ، ماختىناي قانداق ،
قۇياشلىق تاڭدا يۈكسەلمەككە تاغدەك ھىممىتىم باردۇر .

مىنىڭ بۇ مىللىتىم شۇنداق ” قېرى” ، ياق ،نەۋجىۋان مىللەت ،
بۇ مىللەتنىڭ بۈگۈن ، ياق ، ئەتىسىدە تەم _ تېتىم باردۇر .

مىنىڭ بۇ مىللىتىم ” پەگاغا ” چۈشكەن ، <>گىمۇ چىققان ،
بۇ ھەقتە سۆزلىسەم شان شەۋكىتىم گاھ ئىللىتىم باردۇر .

ئۆزىنىڭ مىللتىنى يەرگە ئۇرماس ھىچ كىشى زىنھار ،
مېنىڭ بۇ ”تىللىشىم”دا تەكتى ھۆرمەت ، خىزمىتىم باردۇر . . .
2
بۇ مىللەت شەنىنى يايغان جاھانغا ئۆم ئۇيۇشقاقلىق ،
ھالا ئەمدى چېچىلدى قۇم كەبى ، تەستەك قۇيۇشماقلىق .(1)

ھەسەتلىك دىل ، ھەسەتلىك گەپ ، ھەسەتلىك كۆز . . . شۇڭا دائىم ،
ئارام تاپمايدۇ ”كولاش” تا ، تېخى كۆپ تويۇشماقلىق .

خىيالىدا ئىلىم _ئىرپان ئەمەس جاڭجال ، رىيا ، پىتنە . . .
ئەدەپ ئەخلاقنى يەم قىلدى قىزىل كۆزلۈك ئۇرۇشقاقلىق .

كىچىكلەر چوڭلارغا بىھۆرمەت ، ئەپۇنى خالىماس چوڭلار ،
ئۇدۇم بوپ قالدىغۇ چۈجە _ خۇرازدەك تەڭ تۇرۇشماقلىق .

” مۇھەببەت سۆيگۈدە گۈللەيدۇ ئالەم ، زىتلىشىش نەسلىك ،
بۇ نەسلىك يولنى تار قىلغاي ” نى ھېچ ئويلاپ قۇيۇشماقلىق .

كىشىنىڭ چىن ۋاپا ، ئىخلاستىن ئارتۇق غەمخۇرى نەدە ،
بۇ مىللەت ئۇشبۇ غەمخورلۇق بىلەن سۆھبەت قۇرۇشماقلىق .

ئىلىم _ پەن راك بىلەن ئەيدىزگە تاپتى _ تاپقۇسى مەلھەم ،
بۇ مىللەت خەۋپى راك يەڭلىغ مىجەزىنى تۇنۇشماغلىق .
3
بۇ مىللەتتە ” ساقاللىقلار ” ناماز خانلىققا يۈزلەندى ،
” ساقالسىزلار ” لاغايلاشقا ، مەمەدانلققا يۈزلەندى .

ئۇيۇنپەزلەر سوقۇپ تاش بىرلە تاشنى كۆڭىلىنى ئاچسا ،
”كارا OK” ، ” تانسىكەش” نىڭ ۋاقتى بىزمانلىققا(2)يۈزلەندى .

جاھان نەدە ، ئۆزى نەدە ؟ بۇنى ئويلايدىغانلار ئاز ،
ئەجەپ ئىش ، پەيلى خۇيىدا بەخىرامانلىققا كۆندى .

پاسۇن – مودا كىيىم ، چاچ نۇسخىسى سۆھبەتتكى ماۋزۇ ،
ياسانماقنىڭ غېمى ھالى پەرىشانلققا يۈزلەندى .

”يېرى كەڭ ، بايلىقى مول ، خەلقى ئەمگەكچان” ئاتالغان يۇرت ،
ھۇرۇنلىقتا كۈنى ، ئىسىت ، خەيرى – ئېھسانلىققا يۈزلەندى .

بۇ مىللەت ئىلمۇ…ئىرپان ، كەشىپ ئىجادتا تۆھپىكار مىللەت ،
نېمىشقا ئەمدى ”ئەقلى كالتە ئىنسان” لىققا يۈزلەندى ؟

بۇ مىللەتنىڭ غېمىدە تۇرسا دەۋران ، يۆلىسە ھەدەپ ،
نېمىشقا يۆلىگەنچە سالپۇ سەرسانلىققا يۈزلەندى ؟ . . .