بالىلاردا ئىتائەتمەنلىك تۇيغۇسى
قۇربانجان توختى ئازىق
نۆۋەتتە ، بىر قىسىم ئوقۇتقۇچىلار ئوقۇغۇچىلارغا ئۇستازلىق مېھرى - مۇھەببىتى بىلەن ئەمەس ، بەلكى باشقۇرغۇچى سالاھىيىتى بىلەن مۇئامىلە قىلىپ ، ئۇلارنىڭ قىزىقىشى ، ھەۋىسى ، غايىسى بىلەن قىلچە ھېساپلاشماي ، ھەددىدىن زىيادە قاتتىق قول بولۇپ ، ئۇلارنىڭ ساغلام ئۆسۈپ يېتىلىشى ، ئەتراپلىق تەرەققىي قىلىشىغا سەلبىي تەسىر كۆرسۈتۈۋاتىدۇ . بۇ شەك-شۈبىھىسىزكى پىسخولوگىيە ، پىداگوگىكا بىلىملىرى بىلەن قوراللىنىشى يېتەرسىز ، كەسىپكە لايىق بولمىغان ئوقۇتقۇچىلاردا ساقلىنىۋاتقان ، سەلبىي خاراكتېرگە ئىگە تەلىم-تەربىيە ئۇسۇلىدۇر . ئوتتۇرا-باشلانغۇچ مەكتەپ ئوقۇغۇچىلىرى فىزىئولوگىيە جەھەتتە ئۆسۈپ يېتىلىش ، تەرەققىي قىلىش باسقۇچىدا بولغاچقا ، ئۇلارنىڭ تاشقى دۇنيانى چۈشىنىش ، مەسىللەرنى تەھىلىل قىلىش ، بىلىش قابىلىيىتى دەسلەپكى باسقۇچتا بولۇپ ، ئاستا - ئاستا شەكىللىنىۋاتقان ، تەرەققىي قىلىۋاتقان بولىدۇ . بولۇپمۇ ئۇلارنىڭ ئوقۇتقۇچىلارغا بولغان ئىتائەتمەنلىك تۇيغۇسى يۇقىرى بولۇپ ، ئۇلارنى خۇددى ھەممىنى بىلىدىغان «ئەۋلىيا» ھېسابلايدۇ . ئۇلارنىڭ بۇ باسقۇچتىكى ئوقۇتقۇچىلارنىھۆرمەتلەش تۇيغۇسى بەزىدە ئۆز ئاتا-ئانىلىرىغا بولغان ھۆرمەتلەشتىنمۇ ئۈستۈن بولىدۇ . يەنە بىر جەھەتتىن ، بۇ باسقۇچتىكى ئوقۇغۇچىلاردا پىسخولوگىيىلىك جەھەتتىن ئۆزلىرىدىكى يۇشۇرۇن ئىقتىدار بارا-بارا ئاشكارلىنىدىغان ، كىمنىڭ قايسى تۈردە ئالاھىدىلىكى بولسا شۇ تۈرگە يۇقىرى ئىشتىياق باغلايدىغان ، شۇنىڭدا نەتىجە قازىنىشنى مەقسەت قىلىدىغان ھالەتلەر شەكىللىنىشكە باشلايدۇ . يەنى بەزى ئوقۇغۇچىلار رەسىم سىزىشقا قىزىقسا ، بەزى ئوقۇغۇچىلار مۇزىكىغا قىزىقىدۇ ، بەزىلىرى تەنتەربىيىگە ئالاھىدە ئىشتىياق باغلىسا ، يەنە بەزىلىرى فېزىكىغا قىزىقىپ ، ئائىلە ئېلېكتىر سايمانلىرىنى رېمونت قىلىشقا ئىشتىياق باغلايدۇ . قىسىقىسى ، ھەربىر ئوقۇغۇچى ئۆزىدە بار بولغان تالانتىنى جارى قىلدۇرۇشقا كۈچەيدۇ . شۇڭا ئۇلار بۇ ۋاقىتتا ئوقۇتقۇچىلارنىڭ ئۆز ئارتۇقچىلىقلىرىنى جارى قىلدۇرۇشىغا مەدەت بېرىشىنى ، ئۆزلىرىنى قوللىشىنى بەكمۇ ئۈمىد قىلىدۇ . لېكىن ئاشۇ خىلدىكى بىر قىسىم ئوقۇتقۇچىلار ئوقۇغۇچىلارغا بەكمۇ قاتتىق قول بولۇپ ، ئۇلارغا قىلچىمۇ تاللاش پۇرسىتى بەرمەي ، ئوقۇغۇچىلارنى نېمە دېسە شۇنى قىلىدىغان ، نېمە ئۆگەن دېسە شۇنى ئۆگىنىدىغان ، قىسقىسى ئۇلارنى ئۆز بۇيرۇقىنى شەرتسىز ئىجرا قىلىدۇرىدىغان «ماشىنا ئادەم» لەرگە ئايلاندۇرۇپ قويۇپ ، ئەركىن پىكىر قىلىشنى ، دادىل سۇئال سوراش ، ئۆز ئارتۇقچىلىقىنى جارى قىلدۇرۇشنى پۈتۈنلەي توسۇپ قويۇۋاتىدۇ . شۇڭا ، ئوقۇتقۇچىلار ئوقۇغۇچىلارنىڭ ئىتائەتمەنلىك تۇيغۇسىدىن پايدىلىنىپ ، ئۇلارنىڭ تەپەككۇرىنى بوغوپ قويماسلىقى ، ھەر ۋاقىت ئۇلارنىڭ «ئەۋلىيا»سىغا ئايلىنىشى كېرەك . مەنبە:تەڭرىتاغ ئۇيغۇر تورى
|
