بالىلاردىمۇ خامۇشلۇق كېسىلى كۆرۈلىدۇ  خامۇشلۇق ئوتتۇرا ۋە ياشانغانلاردا كۆپ كۆرۈلىدىغان بىر خىل نېرۋا خاراكتېرلىك ۋە پىسخىلىق كېسەللىك، دەپ قارىلىدۇ، بىراق يېقىنقى يىللاردىن بۇيان 15 ياشتىن 18 ياشقىچە بولغان بالىلاردىمۇ بۇ خىل كېسەللىك كۆرۈلمەكتە. مۇخبىرنىڭ ئاپتونوم رايونلۇق خەلق دوختۇرخانىسى كىلىنكىلىق پىسخولوگىيەلىك داۋالاش بۆلۈمىنىڭ ۋىراچى گۈلبەھرەم ئابلادىن ئىگىلىشىچە، بالىلاردىكى خامۇشلۇق ئادەتتە تۇرمۇش رېتىمىنىڭ قالايمىقانلىشىشى، دائىم ئازار يېيىش، زەربىگە ئۇچراش، خورلىنىش، ئىجتىمائىي ئالاقە ۋە تۇرمۇش بېسىمىغا دۇچ كېلىش قاتارلىق ئەھۋاللار سەۋەبىدىن بولىدىكەن. بۇنداق كېسەللىككە گىرىپتار بولغان بالىلاردا تەنھالىق، كەيپىياتى ناچار بولۇش، چۈشكۈنلىشىش، ئىش خۇشياقماسلىق، مىجەزى چۇسلىشىش، ئۆزىنى كەمسىتىش، ئىرادىسىزلىك، ئۇيقۇسىزلىق قاتارلىق ئالامەتلەر كۆرۈلىدىكەن. ئېغىر بولغاندا تۇرمۇش مەنىسىز بىلىنىپ،ھاياتىدىن ئۈمىد ئۈزۈپ، ئاخىردا ئۆلۈۋېلىشتەك يامان ئاقىۋەت كېلىپ چىقىدىكەن. بۇ كېسەللىكنىڭ ئالدىنى ئېلىش ئېلىش ئۈچۈن، ئاتا-ئانىلار ۋاقىت ئاجرىتىپ بالىلار بىلەن كۆپرەك بىللە بولۇش، پىكىر ئالماشتۇرۇش، ئۇلارنى يالغۇز تاشلاپ قويماسلىق، ئۇلارنى بىرەر ئەھمىيەتلىك ئىشلارغا يېتەكلەش، مۇئامىلىدە ئېھتىياتچان بولۇش، قەلب دۇنياسىنى چۈشىنىشكە ئەھمىيەت بېرىشى كېرەك . « شىنجاڭ قانۇنچىلىق گېزىتى» دىن ئېلىندى.
|
