Godaddy بولسا نۆۋەتتە دۇنيادىكى نوپۇزلۇق چوڭ تور نامچىلىق شىركەتلىرىنىڭ بىرى بولۇپ، باھاسىنىڭ مۇۋاپىقلىقى، ئىشلىتىش ئۇسۇلىنىڭ قولايلىقلىقى بىلەن نۇرغۇن تورداشلىرىمىزنىڭ ئالقىشىغا ئېرىشكەن. شەخسەن كەمىنە ئۇيغۇربەگمۇ ئۆزۈمنىڭ شەخسىي تور ناملىرىنى مۇشۇ شىركەتتە ساقلاۋاتىمەن  ھەمدە بىر قىسىم بلوگگېر خېرىدارلىرىمنىڭ تور نامىنىمۇ مۇشۇ يەردىن تىزىملىتىپ بىرىۋاتقان ئىدىم، ھالبۇكى ئاخشامدىن باشلاپ بىر قىسىم ئوقۇرمەنلىرىم، شۇنداقلا بىر قىسىم خېرىدارلىرىم بەس-بەستە ئۇچۇر يوللىشىپ بلوگلىرىنىڭ ئېچىلمىغانلىقىنى ئېيتىشتى، توردىكى خەۋەرلەرگە كۆرە بىر قىسىم يەرلىك «شەرەپلىك» تېلىگراف ئىدارىسى Godaddyنىڭ تور نامىنى يىشىشكە ئاتىغان DNS مۇلازىمىتىرىنى چەكلەپ قويغانمىش، شۇنىڭ بىلەن قىسمەن جايلاردا بۈگۈن Godaddyدىن تىزىملاتقان تور نامىنى زىيارەت قىلغىلى بولماسلىق مەسىلىسى كېلىپ چىققان.

Godaddyنىڭ بۇنداق ئەھۋالغا دۇچ كېلىشى تۇنجى قېتىملىق ئەمەس، بۇنىڭدىن نەچچە يىل بۇرۇنمۇ مۇشۇنداق زىيانكەشلىك پات-پات سادىر بولۇپ تۇراتتى، گەرچە ھۆكۈمەت تەرەپ بۇنى «زىيانلىق ئۇچۇرلارنى توسۇش» دەپ تەسۋىرلىگەن بولسىمۇ، «چوڭ بوران»دا بىزدەك بىگۇناھ «كىچىك مايسىلار»نىڭمۇ قۇربان بولۇپ كېتىشى بىزنىڭ كاللىمىزدىن ئۆتمەيدىغىنى ئېنىق. قانداق قىلىش كېرەك؟ ئاتامانلارنىڭ تور ناملىرىنى ھەرگىزمۇ ئالدىراپ-تىنەپ Godaddyدىن دۆلەت ئىچىگە يۆتكەپ كېلىشىنى تەۋسىيە قىلمايمىز، بەلكى ئۈچىنچى تەرەپ تەمىنلىگەن NS يىشىش مۇلازىمىتىنى ۋاقتىنچە قوللىنىپ تۇرىشىنى تەۋسىيە قىلىمىز. نۆۋەتتە بۇنداق مۇلازىمەت تەمىنلەيدىغان بېكەتلەر خېلى كۆپ، دۆلەت ئىچىدىمۇ بۇنداق مۇلازىمەت تەمىنلەيدىغان بېكەتلەر خېلى نۇرغۇن. نۆۋەتتە ئۇيغۇربەگنىڭ كەپىسى شۇنداقلا كەمىنىنىڭ خېرىدارلىرىنىڭ مەسىلىسىنى بۇ خىل ئۈچىنچى تەرەپ ئارقىلىق ھەل قىلدىم، بۇ خىل مەسىلىگە يولۇققان تورداشلارنىڭ تۆۋەندىكى بېكەت ئارقىلىق تىزراق ھەل قىلىۋېلىشىنى سورايمىز.

مەنزىل:

https://www.dnspod.cn/