مۇقام
ئۆزقان
قەلبىم تۇپرىقىغا تېرىلغان ئۇرۇق،
گىياھ تۆت پەسىلدە چېچەكلەپ تۇرغان.
شىرىن مېۋىدۇركى يېتىلگەن بولۇق،
مەسۇم ئەقىدىگە قىلغان ئارمىغان.
قەدىم ئورمانزارنىڭ مۇڭلۇق تىۋىشى،
قۇياش ــ كەلگۈسىچۈن كۆيۈشكە تەييار.
زېمىن يۈرىكىدۇر، شائىر دىلكىشى،
دېھقان روھىناتىغا بولغان مەپتۇنكار.
سەۋدا چېچەكلىرى، روھلار تىلسىمى،
ئۈگۈت ــ نۇر يىپلىرى ھەر دىلغا تۇتاش.
قاداق قوللار ئارا يېشىلگەن شەرھى،
غالىپ ئەقىدىدىن پۈتكەن مەڭگۈ تاش.
1999-يىل مارت، قەشقەر
(«قەشقەر گېزىتى» نىڭ 1999-يىل 5-ئاينىڭ 8-كۈنى‹1292›16-سانىدا ئېلان قىلىنغان)
بىر ئۆلۈش نېسىۋەم باردۇر پەرۋازدىن
ئۆزقان
جەسۇرلۇق ساداسىن ياڭراتقۇچىمەن،
ئەڭ مۇدھىش ئازابمۇ تەزىمدە ئەنە.
ئادرېسسىز بولسىمۇ ۋىسال ھوجرىسى،
ئەرلىكنى ھەر ۋاقىت قىلدىم تەنتەنە.
تېنىگەن ئەقىدە ئەركسىز ھامان،
سىلىدىم ئۈمىدنىڭ يۇمران پېيىنى.
يۈرەكنىڭ تەكتىدە كۆيمەكتە ۋەتەن،
ئارمانلار شىركەيىپ قىلماقتا مېنى.
بىر ئۈلۈش نېسىۋەم باردۇر پەرۋازدىن،
قاناتلىق پەسىللەر تىۋىنما ماڭا.
مەنمۇ ھەم سەن كەبى كۆكلەپ تۇرغۇچى،
ماڭا تەل ئەل ئاتلىق سۇ، تۇپراق، ھاۋا.
1999-يىل مارت، قەشقەر
(«قەشقەر گېزىتى» نىڭ 1999-يىل 5-ئاينىڭ 8-كۈنى‹1292›16-سانىدا ئېلان قىلىنغان)
مەزكۇر بىلوگنىڭ قۇرغۇچىسى ئەمەتجان ساۋۇت ئۆزقان 1991-يىلى خوتەن پېداگوگىكا ئالىي تېخنىكومىنى، 2001-يىلى شىنجاڭ ئۇنۋېرسىتېتىنى پۈتتۈرگەن. ئۇ ئوتتۇرا مەكتەپتە ئوقۇۋاتقان چاغدىلا پەيدا بولغان ئىشتىياقنىڭ تۈرتكىسىدە، ئۆزىدىكى بەلگىلىك ئەدەبىي دىت ۋە ئەدەبىياتقا بولغان ئوتتەك قىزغىنلىق بىلەن ئىجادىيەتكە كىرىشىپ، ھازىرغىچە «تارىم»،«قەشقەر».«يېڭى قاشتېشى»،«جۇڭگو مىللەتلىرى»،«قۇمۇل ئەدەبىياتى»،«ئىشچىلار ھەرىكىتى»،«شىنجاڭ ياشلىرى»،«شىنجاڭ سەنئىتى»،«ئۈرۈمچى كەچلىك گېزىتى»،«ئىشچىلار ۋاقىت گېزىتى»،«قەشقەر گېزىتى»،«تۇرپان گېزىتى» قاتارلىق گېزىت-ژۇرناللاردا 120پارچىدىن ئارتۇق شېئىر، ھېكايە، نەسىر ۋە ئەدەبىي ئوبزورلارنى ئېلان قىلغان. 7پارچە ئەسىرى رايونىمىز تەۋەسىدىكى تۈرلۈك ئەدەبىيات مۇكاپاتلىرىغا ئېرىشكەن. ھازىر قەشقەر شەھەرلىك5-ئوتتۇرا مەكتەپتە ئىشلەيدۇ. qq:570098091
img src="../../wp-content/uploads/2011/11/未标题-5-150x150.jpg" alt=" ھەممەيلەننىڭ قۇربان ھېيتى">
