تۇرمۇش سۈپىتىنىڭ ئۆسۈشىگە ئەگىشىپ، دوستىخانىلىرىمىز موللىشىپ، غىزالىنىش ئادەتلىرىمىزدىمۇ روشەن ئۆزگىرىشلەر بولماقتا. ئەمما، « كېسەل ئېغىزدىن كىرىدۇ » دەيدىغان ئاتىلار سۆزىنى ئۇنتۇپ قېلىشقا بولمايدۇ، ئەلۋەتتە. خوش، ياشانغانلار غىزالانغاندا نېمىلەرگە دىققەت قىلىشى كېرەك؟

1. سۈپىتى يۇقىرى بولۇش
سۈپىتى يۇقىرى دېگەنلىك ھەرگىزمۇ باھاسى يۇقىرى دېگەنلىك ئەمەس. مەسىلەن، پۇرچاق ياسالمىلىرى، تۇخۇم، سۈت قاتارلىقلارنىڭ ھەممىسى يۇقىرى سۈپەتلىك ئوزۇقلۇققا كىرىدىغان بولۇپ، ياشانغانلارنىڭ دائىم ئىستېمال قىلىشىغا باب كېلىدۇ. يەنە، بېلىق تۈرىدىكىلەرنى كۆپرەك، گۆش تۈرىدىكى يېمەكلەرنى ئازراق يېيىش كېرەك. قەنت (شېكەر) نىڭ ئاساسلىق كېلىش مەنبەسى ئاساسىي غىزالار، كۆكتاتلار ۋە مېۋىلەر بولۇپ، قەنت، شېكەر، قارا شېكەر قاتارلىق ئىش قوشۇلغان شېكەر ياسالمىلىرىنى ئىمكانقەدەر ئاز ئىستېمال قىلىش لازىم.
2. تۈرى كۆپ بولۇش
ھېچقانداق بىر خىل يېمەكلىك ئادەم بەدىنى ئېھتىياجلىق بولغان ئوزۇقلۇق ماددىلارنىڭ ھەممىسىنى ئۆز ئىچىگە ئالالمايدۇ. شۇڭا، كۈنلۈكى دانلىق زىرائەت تۈرىدىكى يېمەكلىكلەر (بۇغداي-قوناق ئۇنى، گۈرۈچ)، سەي-كۆكتاتلار، مېۋە-چىۋىلەر، موگۇ-يۈسۈنلار (سۇ ئۆسۈملۈكى) قاتارلىقلارنى مۇۋاپىق ماسلاشتۇرۇپ ئىستېمال قىلىشقا بولىدۇ.