يانفوننى دائىم ئۆيدىلا ئىشلەتمەيمىز، ھازىرقىدەك تومۇز ياز كۈنلىرى قۇياش نۇرى تىك چۈشۈپ يەر-جاھاننى قىززىتىۋاتقان مەزگىلدە، كۆپىنچە سىرتلاردا كۈچلۈك قۇياش نۇرى يانفون ئېكرانىغا بىۋاستە چۈشۈپ، ئېكراننى ئېنىق كۆرگىلى بولمايدىغان ئەھۋال ئېنىقلا مەۋجۇد(دائىم بىر قولىدا ئېكراننى توسۇپ يانفونغا قاراۋاتقانلارنى كۆرىمىزغۇ؟)، بۈگۈن كۆپچىلىك بىلەن ئالتە خىل ئەقلىي ئىقتىدارلىق يانفوننى كۆرۈپ ئۆتەيلى، قېنى زادى قايسى يانفون كۈن نۇرى ئاستىدا بەكرەك جۇلالىنىدىكىن؟

ئاۋال يانفوننىڭ ئېكران يورۇقلىقىنى ئەڭ يۇقىرى ھالەتكە تەڭشىۋالايلى ھەمدە يورۇقلۇقنى ئاپتوماتىك تەڭشەش تۈرىنى تاقىۋېتەيلى. سۈرەتكە ئېلىنغان مەزگىل قۇياش نۇرى تىك چۈشىدىغان چۈشتىن كېيىن سائەت بىرلەر ئەتراپى بولۇپ، يانفوننى تۇتۇپ تۇرغان ۋە سۈرەتكە تارتقان ئادەمنىڭ ئورنى مۇقىم، شۇڭا تۆۋەندىكى سىناقنىڭ ھەممىسى ئوخشاش شارائىتتا ئېلىپ بېرىلغان دېيىشكە بولىدۇ.

بۇ ئالتە دانە يانفون ئايرىم ئايرىم ھالدا: iPhone 4S/Samsung Galaxy SII/Samsung Galaxy S3/Nokia Lumia 900/HTC One X ھەمدە Sony Xperia S لاردىن ئىبارەت.

باشتىكى رەڭلىك سۈرەت بولسا ئۆي ئىچىدە بۇ يانفونلارنىڭ ئېكران يورۇقلىقىنى تۆۋەندىن يۇقىرىغا تەرتىپ بويىچە تەڭشەلگەن قاتاردا تىزىلغان، ئۈستىدىكى رەڭسىز سۈرەتتە بولسا، بۇ يانفونلارنىڭ ئېكرانىنىڭ ئىسسىق رەڭدە ياكى سوغۇق رەڭدە ئىكەنلىگى تېخىمۇ ياخشى يورۇتۇپ بېرىلگەن.

iPhone 4S

باشتىكى سۈرەت(ئۈستىدىن سانىغاندىكى 2-رەڭلىك سۈرەتنى دېمەكچى)تە، iPhone 4S نىڭ ئېكرانى ئەڭ يورۇق ھالەتتە بولۇپ، HTC One X نىڭ ئىسسىق رەڭدىكى ئېكرانىغا قارىغاندا، بۇ بىر كۆك رەڭنى ئاساس قىلغان سوغۇق رەڭدىكى ئېكران. بەلكىم ئېكراندىكى يوغان دانە دانە ئايكونلار بولغاچقىمىكىن، بىز ئېكراندىكى ئۇچۇرلارنى تېخىمۇ ياخشى كۆرەلەيمىز.

Samsung Galax S II

Galaxy S II نىڭ ئېكرانى ھەقىقەتەن ئانچە يورۇق ئەمەس، ئۆينىڭ ئىچىدە چاغدىمۇ شۇنداق، Galaxy SII ئىشلەتكەن ھەممىسى بۇنى ئوبدان بىلىدۇ، بولۇپمۇ قۇياش نۇرى ئاستىدا، ئېكراندىكى نەرسىلەرنى ئاساسەن ئېنىق كۆرگىلى بولمايدۇ دېيىشكە بولىدۇ.

Samsung Galaxy S III

بۇ ئالتە يانفون ئىچىدە بېشى ئەڭ يوغىنى مۇشۇ، ئەمما ئۇنىڭ ئەھۋالىمۇ بۇرادىرى بىلەن جىق پەرقلەنمەيدۇ، GS3 نىڭ قۇياش نۇرى ئاستىدا ياكى ئۆي ئىچىدىكى يورۇقلۇقى ئانچە ياخشى ئەمەس، شۇڭا بۇ يانفونلارنى ئامال بار ئاپتاپ چىقمىغان كۈنلىرى ئىشلەتكەن ياخشى ئوخشايدۇ…

NOKIA Lumia 900

رەڭ روشەنلىك دەرىجىسى يۇقىرى بولغان Lumia 900 نىڭ قۇياش نۇرى ئاستىدىكى ئىپادىسى ئىنتايىن ياخشى، شۇڭا Lumia 900 بەلكىم قۇياش نۇرى ئاستىدا ئىشلىتىشكە ئەڭ مۇۋاپىق كېلىدىغان يانفون بولۇشى مۇمكىن، قارىغاندا Microsoft ۋە NOKIA دىكى ئېنژېنىرلار ھەممىسى ئاپتاپقا قاقلىنىشنى ياخشى كۆرىدىغان ئوخشايدۇ.

ئاددىي ۋە ئىخچام لايىھەلەنگەن Metro كۆرۈنمە يۈز قۇياش نۇرى ئاستىدا ئۆزىنى تېخىمۇ ئاقسا تۇتقۇدەك.

HTC One X

4.7 سۇڭلۇق LCD ئېكران قۇياش نۇرىدىن قورققان ئەمەس، شۇڭا كۈن نۇرى ئاستىدا بىز sense كۆرۈنمە يۈزىدىكى ھەرقانداق تەپسىلاتلارنى ناھايىتى ئېنىق كۆرەلەيمىز. بۇ GS3 گە قارىغاندا نەچچە كوچا يولنى ئارتۇق مېڭىشقا يېتىدۇ.

Sony Xperia S

Xperia S كە بىر دانە ئىنتايىن قالتىس ئېكران سەپلەنگەن، شۇڭا ئۇنىڭ كۈن نۇرى ئاستىدىكى ئىپادىسىدىن ئەنسىرەش ھاجەتسىز، بىز كۈچلۈك قۇياش نۇرى ئاستىدا يانفوندا ئېلىپ بارىدىغان كۈندىلىك مەشغۇلاتلىرىمىزنى تولۇق تاماملىيالايمىز.

خۇلاسە

كىشىنى ئەجەپلەندۈرىدىغىنى شۇكى، Galaxy SII ۋە SIII نىڭ قۇياش نۇرى ئاستىدىكى ئىپادىسى كىشىنى ئۈمىدسىزلەندۈرىدۇ، بىراق، ناۋادا سىز سىرتقا ئانچە كۆپ چىقمايدىغان، كۆپىنچە ۋاقتىڭىز ئۆيدە ياكى ئىشخانىدا ئۆتىدىغان كىشى بولسىڭىز ئويلىشىپ بېقىشىڭىزغا ئەرزىيدۇ؛ ئىپادىسى ئەڭ ياخشى بولغىنى Lumia 900، ئۆزگىچە لايىھەلەنگەن Metro كۆرۈنمە يۈز بىر قاراشقىلا كۆزگە چېلىقىپ تۇرىدۇ.