ئۇيغۇرلاردا مىكروبلوگ

ھەممىمىزگە مەلۇم يېقىندا شىنجاڭ تېلېۋىزىيە ئىستانسىسى مەخسۇس مىكروبلوگ توغرىسىدا ئىككى قېتىملىق سۆھبەت خاتىرىسى ئۇيۇشتۇردى، ھەم كەڭ تېلېۋىزۇر كۆرگۈچىلەرگە مىكروبلوگنىڭ نېمىلىكى توغرىسىدا ، ئۇنىڭ بىزگە ئېلىپ كېلىدىغان ئەھمىيىتى ھەم كۈندىلىك تۇرمۇشىمىزدا ئوينايدىغان رولى توغرىسىدا بىر قەدەر تەپسىلى چۈشەنچە بېرىپ ئۆتكەن بولدى، بۇنىڭ بىلەن بىر قىسىم بلوگگېرلار ئارا مىكروبلوگ قۇرۇش قىزغىنلىقى بىر مەھەل پەيدا بولۇشقا باشلىدى، ھەم مىكروبلوگ توغرىسىدا بىر قاتار مۇلاھىزىلەرمۇ قىلىشقان بولدى، ئەمما بۇ جەرياندا مىكروبلوگ توغرىسىدىكى تۆۋەندىكى بىر قانچە خىل سۇئاللار شەكىللىنىشكە باشلىدى

ئۇيغۇرلارغا مىكروبلوگ قۇرۇش زۆرۈرمۇ؟ بىز مىكروبلوگنى نېمىگە ئىشلىتىمىز؟ مىكروبلوگ ئۇيغۇر تورداشلارنىڭ كۈندىلىك تۇرمۇشىدا قانچىلىك رول ئوينايدۇ؟ ئۇيغۇرچە مىكروبلوگلارنىڭ ئۇيغۇر تورچىلىقىدا تەرەققىياتى بارمۇ يوق؟

بەلكىم تېلېۋىزۇردا قويۇلغان بۇ ئىككى قېتىملىق پروگراممىنى كۆرگەن تور ھەققىدە ئاز تولا چۈشەنچىسى بار تورداشلار ياكى كۆرۈرمەنلەر كۆرۈپ يېتەلەيدۇكى، شىنجاڭ تېلېۋىزىيە ئىستانسىسىنىڭ ئالدىنقى قېتىملىق مىكروبلوگ توغرىسىدا يولداش ئالىم ئەھەت بىلەن بولغان سۆھبىتىدە گەرچە سۆھبەتنىڭ باش تېمىسى مىكروبلوگ توغرىسىدا بولغىنى بىلەن ئەمما تېلېۋىزىيە ئېكرانىدا پەيدا بولغىنى خەنلەرنىڭ شىنلاڭ مىكروبلوگىنى ھېسابقا ئالمىغاندا ئۇيغۇرلاردىكىسى مىكروبلوگ ئەمەس بەلكىم كۆپىنچە بلوگ بولغان بولدى، يەنى يۈكسەل ۋە تەدبىركار قاتارلىق بلوگلارنى چىقىرىپ قويۇپ تۇرۇپ مىكروبلوگ پارىڭىنى قىلماقچى بولدى دېيىشكە بولىدۇ، شۇنداقلا سۆھبەت مەزمۇنىغا دىققەت قىلساقمۇ پاراڭدا مىكروبلوگ بىلەن بىرگە بلوگ، مۇنبەر قاتارلىقلارنىڭ ھەممىسىلار بار، سۆھبەت مەزمۇنىمۇ ئاساسلىق يەنىلا بلوگ ئەتراپىدا چۆرگىلىدى دېيىشكە بولىدۇ، ئىككىنچى قېتىملىق مىكروبلوگ توغرىسىدىكى پروگراممىسىدا ئاندىن سۆھبەت مەزمۇنىنى مىكروبلوگقا بىر ئاز يېقىنلاشتۇرۇپ قىسمەت ۋە تەدبىركارنىڭ يېڭىدىن قۇرۇلغان مىكروبلوگى ئارقىلىق (گەرچە بۇلارنى ھەقىقى مىكروبلوگ دەپ ئېيتىشقا بولمىسىمۇ) مىكروبلوگ توغرىسىدا سۆھبەت ئېلىپ باردى، بۇنىڭدىن كۆرىۋېلىشقا بولىدۇكى گەرچە شىنجاڭ تېلېۋىزىيە ئىستانسىسى تۇيۇقسىزلا تۇلۇمدىن توقماق چىققاندەك مىكروبلوگىنىڭ پارىڭىنى سالغىنى بىلەن ئەمما ئۇيغۇر تورچىلىقىغا نەزەر سالساق مىكروبلوگ ئۇقۇمى ئۇيغۇر تورداشلارغا نىسپەتەن ھېچقانچە تۇنۇش ئەمەس يېڭىچە بىر ئۇقۇم، ھەتتا يېقىنقى بىر قانچە يىلدىن بېرى بىر قىسىم تورداشلار ئارىسىدا كۆتۈرۈلگەن بلوگ قىزغىنلىقى ۋە ئارقىمۇ ئارقا قۇرۇلغان ئۇيغۇرچە بلوگلارمۇ تېخى ئۇيغۇرلاردا بلوگ دېگەن ئۇقۇمنى تۇلۇق تۇنۇتۇپ بولالمىغان يەردە مىكروبلوگ توغرىسىدا ھازىر ئېغىز ئېچىش خېلىلا بالدۇر، دېمەك ھازىر ئۇيغۇر تور بەتچىلىكىدە تېلېۋىزىيە ئىستانسىسى ئايرىم تۇنۇشتۇرۇپ كەتكۈدەك بىرەر ئۇيغۇرچە مىكروبلوگ سۇپىسى ياكى شەخسى مىكروبلوگ قۇرۇلغىنىمۇ يوق، بۇنىڭدىن شۇنداق يەكۈن چىقىدۇكى تېلېۋىزۇردا كۈچەپ ئېيتىپ كېلىۋاتقان مىكروبلوگنىڭ تۇرمۇشىمىزدا ئوينىغان رولى، ئەھمىيىتى ھەققىدە قىلغان بايانلارنىڭ ھېچقايسىسى بىز ئۇيغۇرچە مىكروبلوگنىڭ ئۇيغۇر تورداشلارنىڭ تۇرمۇشىغا كۆرسەتكەن رولى بولماستىن ئەمەلىيەتتە ئۇچۇقىنى ئېيتساق سىنا (خەنزۇچە ئاتىلىشى شىنلاڭ بولۇپ تۆۋەندە ئۆزىنىڭ ئېنگىلىزچە ئىسمى بىلەن ئېلىنىۋېرىدۇ) مىكروبلوگىنىڭ تورداشلارنىڭ كۈندىلىك تۇرمۇشىغا، جەمئىيەتكە كۆرسىتىۋاتقان ئاكىتىپ تەسىرلىرىدىن ئىبارەت، سىنا بلوگىدىن پايدىلىنىپ كېلىۋاتقان ئۇيغۇر تورداشلارمۇ يوق ئەمەس ئەلۋەتتە، خوش، ئۇنداقتا خەنلەردە مىكروبلوگ نېمە ئۈچۈن بۇنچىلىك تېز تەرەققى قىلىپ كەتتى؟ ئەمىسە بىز ئالدى بىلەن ئۇيغۇرلاردىكى مىكروبلوگ كەلگۈسىگە  جاۋاب تېپىشتىن بۇرۇن خەنلەردە مىكروبلوگنىڭ نېمە ئۈچۈن بۇنچىلىك تېز تەرەققى قىلغانلىقىغا نەزەر سېلىپ باقىلى… تۆۋەندىكىسى ئۆزۈمنىڭ بۇ بىر قانچە كۈنلۈك بۇ قېرىنداش مىللەتلەرنىڭ تور دۇنياسىنى كۈزىتىش جەريانىمدا خەنلەرنىڭ مىكروبلوگىنىڭ شىددەت بىلەن ئۇمۇملىشى ۋە تەرەققى قىلىشىغا بولغان شەخسى كۆز قارىشىم:

1. خەنچە مىكروبلوگ (微博) ئاتالغۇسىنىڭ ئۇلاردا بىر خىل مودا ئاتالغۇسى بولۇپ قالغانلىقىدا

خەنلەر بىلەن ئازىراق باردى كەلدى قىلىشىدىغان ياكى ئۇلارنىڭ يېقىنقى زامان مەدەنىيىتىنى ئازىراقلا بىلىدىغان كىشىلەرنىڭ ھەممىسى خەنلەرنىڭ يېڭىچە ئاتالغۇغا بەك ئەھمىيەت بېرىدىغانلىقىنى، ئۇلارنىڭ ئىككى خەنچە خەتنى بىرىكتۈرۈپلا يېڭىچە ئاتالغۇدىن بىرنى پەيدا قىلىدىغانلىقىنى شۇنداقلا تىلىغا يېقىملىق ئاڭلىنىدىغان بىرەر سۆزنى ئىجاد قىلسىلا بىردەمنىڭ ئىچىدە مودىغا ئايلاندۇرىۋېتىدىغانلىقىنى ئوبدانلا بىلىدۇ، دېمەك مىكروبلوگ سۆزىنىڭ خەنچە ئاتىلىشى (微博) ئۇلاردا يېڭىچە مودا ئېقىمىنى شەكىللەندۈرگەن، ھەم ناھايىتى تېزلا ئۆزلىرىنىڭ كۈندىلىك سۆز ئىستىمالىغا ئايلاندۇرىۋېتىلگەن.

2.سىنا تورىنىڭ قولايلىقلىقى ۋە بارلىق ئاخبارات ۋاستىلىرىنىڭ كۈچەپ تەشۋىق قىلىشى

خەنلەرنىڭ مىكروبلوگىنىڭ تەرەققى قىلىشىدا سىنا تورىنىڭ كۆز يۇمغۇسىز تۆھپىسى بار دېيىشكە بولىدۇ، ئالدى بىلەن سىز ئەگەر ئۆزىڭىزنىڭ خەنچە بىرەر مىكرو بلوگىدىن بىرەرىنى قۇرماقچى بولسىڭىز ئۇنىڭغا ئايرىم تور نامى ياكى بوشلۇق ئېلىپ كود يېزىپ يۈرمەي پەقەتلا سىنا تورىغا كىرىپ ئادەتتىكى مۇنبەرگە كىرگەندەك ئۇنىڭغا تىزىملىتىپلا ئۆزىڭىزنىڭ مىكروبلوگىنى قۇرالايسىز، ھەم كۈندىلىك تۇرمۇشىڭىزدىكى ھەر قانداق ئىشلارنى، كۆرگەن بىلگەنلىرىڭىزنى كەڭ تورداشلار بىلەن ئورتاقلىشالايسىز، دېمەك سىنا تورى تورداشلارنىڭ ئۆز ئويلىرىنى ئەركىن بايان قىلىش جەھەتتە تورداشلارغا كۆپ قولايلىقلارنى يارىتىپ بەرگەن، گەرچە سىنا تورىدىن كېيىن خەنلەردە بىر قانچە مىكروبلوگ سۇپىلىرى بارلىققا كەلگەن بولسىمۇ ئەمما بۇنداق بولىشىنى ئالدىن كۆرۈپ يەتكەن سىنا تورى ئاللىبۇرۇن پۇل خەجلەپ ئاخبارات ۋاستىلىرىدا سىنا مىكروبلوگىنى تەشۋىق قىلدۇرۇپلا قالماستىن يەنە داڭلىق ناخشا، كىنو چولپانلىرىغا ئۆزلىرىنىڭ سۇپىسىدىن بىر كىشىلىك ئورۇن ئاجرىتىپ ئۇلارغا قىززىققۇچىلارنى سىنا تورىدىن ئىزدەيدىغان ھالەتنى شەكىللەندۈرۈش بىلەن بىرگە ئۆزىگە ھازىرقىدەك مۇستەھكەم ئاساس تىكلەشكە ئاللىبۇرۇنلا پۇختا تەييارلىق كۆرىۋالغان، دېمەك ئۇلارنىڭ دەسلەپتە ئېلىپ بارغان بۇنىڭغا ئوخشاش مەن بىلىدىغان ۋە بىلمەيدىغان بىر قاتار ئالدىن كۆرۈش تەدبىرلىرى ۋە تەرەققىيات پىلانلىرىنىڭ نەتىجىسىدە ھازىرقىدەك خەنلەر ئارىسىدا مىكروبلوگ پارىڭى چىقسىلا سىنانى كۆز ئالدىغا كەلتۈرىدىغان ھالەتنىڭ شەكىللىنىشىگە ئاساس بولغان، ھەم سىنا تورىدىكىلەرمۇ ئۆزلىرىنىڭ كۆزلىگەن نىشانىغا يەتكەن

3.ھەر قايسى ھۆكۈمەت ئورگانلىرىنىڭ ھەممىسىنىڭ ئۆزىنىڭ مىكروبلوگىنى قۇرۇشى

مىكروبلوگىنىڭ كۈچەپ تەشۋىق قىلىنىشى ھەم ئۇنىڭ كەڭ ئامما ئارىسىدا قىزغىن ئالقىشقا ئېرىشىشى نەتىجىسىدە خەلق ئاممىسى بىلەن يېقىنلىشىش ئۈچۈن يول ئىزدەۋاتقان ھەر قايسى ھۆكۈمەت ئورگانلىرىمۇ مىكروبلوگنىڭ ئۆزلىرىگە ئەڭ ياخشى تاللاش بولالايدىغانلىقىغا كۆزى يېتىپ، مەخسۇس ئۆزلىرىنىڭ مىكروبلوگىنى تەسىس قىلىپ ئاممىنىڭ رايىنى سىناش، خەلقىنىڭ پىكرىنى ئاڭلاش قاتارلىق ئىشلارنىڭ ھەممىسىنى مىكروبلوگ ئارقىلىق ئېلىپ بېرىشى خەنلەردە مىكروبلوگ دولقۇنىنىڭ يەنىمۇ بىر قەدەم كۆتۈرۈلىشىگە سەۋەب بولغان. (ئۆزىمىزنىڭ تىلى بۇيىچە ئېيتقاندا مىكروبلوگنىڭ خورىكىنىڭ ئۆسۈشىدىكى ئاساسلىق ئامىلمۇ مانا مۇشۇنىڭدىن ئىبارەت بولسا كېرەك)

دېمەك يۇقىرىدىكىلەر مېنىڭ خەنچە تور بەتلەرنى تەھلىل قىلىش جەريانىمدا ھېس قىلغان خەنلەرنىڭ ئارىسىدا مىكروبلوگ ئۇقۇمىنىڭ شۇنچە تېز ئۇمۇملىشىپ، تەرەققى قىلىشىدىكى ئاساسلىق سەۋەبلەردۇر، ئۇنداقتا بىز ئەمدى گەپنى ئۆزىمىزگە قايتۇرۇپ كېلىپ بېشىدا ئېيتىلغان شۇ سۇئاللارنىڭ جاۋابىنى ئىزدەپ كۆرەيلى

بىز ئۇيغۇرلارغا مىكروبلوگ قۇرۇش زۆرۈرمۇ؟ بىز مىكروبلوگنى نېمىگە ئىشلىتىمىز؟ مىكروبلوگ ئۇيغۇر تورداشلارنىڭ كۈندىلىك تۇرمۇشىدا قانچىلىك رول ئوينايدۇ؟ ئۇيغۇرچە مىكروبلوگلارنىڭ ئۇيغۇر تورچىلىقىدا تەرەققىياتى بارمۇ يوق؟

بۇ سۇئاللار زەنجىرسىمان سۇئاللار بولۇپ بىرسىگە جاۋاب بەرسىڭىز يەنە بىرسىگىمۇ جاۋاب بېرىشىڭىزگە توغرا كېلىدۇ، دېمەك بىرىنچى سۇئالغا بىز ئالدى بىلەن بىزلەردىمۇ مىكروبلوگ قۇرۇش زۆرۈر دەپ جاۋاب بېرىشىمىز مۇمكىن، لېكىن بىز مىكروبلوگ قۇرغاندىن كېيىن نېمىگە ئىشلىتىمىز؟ ھازىرغىچە قۇرۇلغان ئۇيغۇرچە مىكروبلوگلارغا نەزىرىمىزنى ئاغدۇرۇپ باقساق ئاساسى جەھەتتىن يەنىلا شۇ ئۇيغۇر بلوگچىلىقىنى تۇنۇتۇش ئۈچۈن كۈچ چىقىرىۋاتقان بلوگگېرلارنىڭلا بىر قانچە مىكروبلوگى قۇرۇلغاندىن باشقا ھېچقانداق مىكروبلوگ يوقلىقىنى كۆرىۋالالايمىز، ھەمدە بۇ مىكروبلوگلارمۇ شۇ بلوگگېرنىڭ كۈندىلىك خاتىرە سەيناسى ياكى تاققا تۇققۇ پاراڭ خاتىرىسىدىن ئىبارەت بولۇپ راستتىنى ئېيتقاندا شۇ بلوگگېرنىڭ بلوگى بىلەن سىلىشتۇرسا ئۇيغۇر تورداشلارنى جەلپ قىلغۇدەك ھېچقانداق تۈزۈك نەرسىنى ئۇچراتقىلى بولمايدۇ، (ئەلۋەتتە مەنمۇ ئىچىدە بار) ئۇنداق بولسا بىز قانداق قىلىپ ئۇيغۇر تورداشلاردا مىكروبلوگ قىزغىنلىقىنى شەكىللەندۈرەلەيمىز؟ ئۇيغۇرلاردا مىكروبلوگ قىزغىنلىقى شەكىللەندۈرىمەن دەيدىكەنمىز بىز ھەرگىزمۇ ئۆزىمىز قۇرىۋالغان تاقا تۇققا پاراڭ سەينالىرىمىز بىلەنلا بۇ نىشانغا يېتەلمەيمىز، بۇنىسى ناھايىتى ئېنىق، ئۇنىڭ ئۈستىگە ھەممىلا تورداش تور نام ۋە بوشلۇق ئېلىپ مىكروبلوگ قۇرۇشى ناتايىن، ئەمما بىرەر پىلان بۇيىچە ئىش كۆرسەك بۇنىمۇ ئىشقا ئاشۇرۇش مۇمكىن، شۇڭلاشقا بىزدىمۇ چوقۇم ئەتراپلىق بىرەر پىلان بولىشى كېرەك، يەنى خەنلەردىن بۇ توغرىسىدا ئۈلگە ئېلىشىمىز كېرەك، بلوگنىڭ ھازىرغىچە تېخى كەڭرى ئۇمۇملىشالمىغانلىقىدىكى سەۋەب نېمە؟  بۇنى ئوبدان ئويلىنىپ كۆرسەكلا بىز ھازىرقى قەدەمدە مېڭىۋەرسەك مىكروبلوگنىڭ بىزدىن تولىمۇ يىراقتا ئىكەنلىكىنى كۆرۈپ يېتەلەيمىز، ئۇنداقتا بىز قانداق شەكىلدىكى مىكروبلوگ قۇرىمىز؟ تۆۋەندە ئۆزۈمنىڭ خەنلەرنىڭ تورىنى كۈزىتىش جەريانىدا دەسلەپكى تۈزۈپ چىققان كىچىككىنە پىلانىمنى سۆزلەپ كۆرەي، ئەلۋەتتە بۇ پەقەتلا ئۆزۈمنىڭ كۆز قارىشى خالاس، قۇبۇل قىلىش قىلماسلىق تور ئاتامانلىرىنىڭ قولىدا

بىرىنچىدىن، بىز ئالدى بىلەن مۇۋاپىق ئىسىمدىن بىرنى تاللاپ ئۆزىمىزگە خاس ھەم سىنا تورىغا ئوخشاش ھەقىقى مىكروبلوگ سۇپىسىدىن بىرنى قۇرىشىمىز كېرەك (ئىككىسىمۇ بىزگە ئارتۇقچىلىق قىلىدۇ، ئۇز بلوگ بۇ توغرىسىدا ئويلىنىپ كۆرسە بولىدۇ) چۈنكى سىنا مىكروبلوگىغا ئوخشاش ياخشى ھەم قىسقا بولغان ئىسىم شۇ تورنىڭ روناق تېپىشىدىكى ئەڭ مۇھىم ئامىل

ئىككىنچىدىن، تورداشلارنى مۇشۇ مىكروبلوگ سۇپىسى ئارقىلىق ئۆزىنىڭ مىكروبلوگىنى قۇرۇشىغا چاقىرتىشىمىز كېرەك، بۇنىڭدا ئالدى بىلەن ھازىرقىدەك مىكروبلوگ قۇرغۇچىلارنىڭ مىكروبلوگ ئىسمىنى قالايمىقان قويۇشتەك قالايمىقانچىلىقنىڭ ئالدىنى ئېلىپ ئىسىمنى بىردەكلىككە ئېلىپ كېلەلەيمىز، ئۇنىڭ ئۈستىگە بەلكىم ھېلىقى قالايمىقان 主页(ئانا بەت) ئويناپ يۈرگۈچىلەردىن نۇرغۇنلىغان مىكروبلوگ ئەزالىرى چىقىشى مۇمكىن، ئۇنىڭدىن كېيىن مۇمكىن بولسا بىر قىسىم ئىككىلەمچى تور نامىنى ئېلىپ قېلىپ ئۇلارنى نامى چىققان شەخسلىرىمىزگە، ئارتىسلىرىمىزغا بېرىش يوللىرى بىلەن ئۇلارنى ئۆزىنىڭ مىكروبلوگىنى قۇرۇپ ئۆزىنىڭ يېڭى بايقاشلىرى، كۆز قاراشلىرىنى تورداشلار بىلەن ئورتاقلىشىشقا تەكلىپ قىلىشىمىز كېرەك، مېنىڭچە قالايمىقان غەيۋەتلەرگە تولغان، ئارتىس ۋە نامى چىققان شەخىسلىرىمىزنىڭ كەينىدىن تولا گەپ چىقىدىغان ھازىرقى ۋەزىيەتتە ئۇلارمۇ بۇنىڭ ئەشۇنداق كوچا پاراڭلىرىنىڭ ئالدىنى ئالالايدىغان ئۈنۈملۈك يول ئىكەنلىكىنى بىلسىلا ھەرگىزمۇ ياق دېمەيدۇ، ئەمدى ھار قايسى ھۆكۈمەت ئورگانلىرىنىڭ ئىشلىتىش ئىشلەتمەسلىك مەسىلىسىگە كەلسەك… ھەممە ئىشلار «قوش تىللىق» بولۇپ كېتىۋاتقان بۇ ۋەزىيەتتە بۇنى مەن بىر نېمە دېيەلمەيمەن،  ئۈچىنچىدىن، ئىقتىساد يار بەرسە ئاخبارات ۋاستىلىرى ياكى ئۇلىنىش بەتلىرىدە ھەقىقى ئۇيغۇر مىكروبلوگى سۈپىتىدە ۋاقىتلىق ئۇچۇر بېرىشىمىز ئەگەر يار بەرمىسە مۇشۇ ئۆزىمىزنىڭ بلوگىدا ھەقسىز بولسىمۇ ئۇزۇن مەزگىللىك ئېلان قىلىش ئارقىلىق تورداشلارنى بۇنىڭغا قىززىقتۇرىشىمىز كېرەك، چۈنكى بلوگ بىلەن مىكروبلوگ قېرىنداش نەرسە، بۇرۇن چىققان قولاقتىن كېيىن چىققان مۈڭگۈز ئىشىپ كېتىپتۇ دېگەندەك ھازىر گەرچە بىز بلوگ ئارقىلىق مىكروبلوگنى تەشۋىق قىلغىنىمىز بىلەن مىكروبلوگ ئەگەر ھەقىقى تەرەققى قىلىپ قالسا كېيىنچە مىكروبلوگ بىزنىڭ بلوگىمىزنى تەشۋىق قىلىدىغان ئەڭ ياخشى قۇرال بولۇپ قالىدۇ، (پەقەت شۇ مىكروبلوگنى قۇرغۇچى كۆزىنى ئېتىپلاۋالمىسا ھا، ھا) ئەگەر تەشۋىق يېتەرلىك بولسىلا مىكروبلوگ تەرەققىياتىنىڭ بلوگدىن تېز بولىشىغا ئىشەنچىم كامىل. تۆتىنچىدىن، مىكروبلوگ بىخەتەرلىكى ئۈچۈن «دېموكراتىيە» ۋە «دىكتاتورىنى» تەڭ ماس قەدەمدە ئېلىپ بېرىشىمىز كېرەك، يەنى بىر قانچە باشقۇرغۇچىلارنى تەشكىللەپ كۈندىلىك يوللانمىلارنى تەكشۈرۈپ تۇرىشىمىز ھەم چەكلەنگەن مەزمۇنلارنى ۋاقتىدا بىر تەرەپ قىلىپ تۇرىشىمىز، ئالاھىدە سۆزلەرگە نىسپەتەن «قارا تىزىملىك» ئىقتىدارىنى يۈرگۈزۈشىمىز كېرەك. (بۇنى تور بەت ئاتامانلىرى مەندىن بەكرەك بىلىشى مۇمكىن)

دېمەك بۇ مېنىڭ بۇ نەچچە كۈنلۈك كۈزىتىش جەريانىمدا ھېس قىلىپ يەتكەنلىرىم، ۋاقىت مۇناسىۋېتى بىلەن مۇشۇنچىلىك يېزىپ تۇردۇم، قالغانلىرىنى تورداشلار ئۆزلىرىمۇ پىكىر ئەيلەپ باقسا…