يول، مېنى نېمىگە قاندۇرماقچىسەن……………ۋاھىتجان ئوسمان
شېئىردىكى ئوت………………………………….قەيسەر تۇرسۇن
سېنىڭ ئۈچۈن ياشايمەن……………ئەركىن مۇھەممەت كامالىي
ۋىسال دەملىرى……………………………….ئەركىن داۋۇت ئوغۇز
ئۈچىنچى ناخشا………………………………..ئابابەكرى توختى
قانىغان يۈرەك…………………………….توختى مامۇت ئىزچى
ھەقىقىي مېھىردۇر ئۇلۇغلۇق دېگەن…………ئىبراھىم نىياز
ئون بەش يېشىڭدا…………………..ھاجى ئابدۇغوپۇر شەرىپى

ئالەم كەتتى ئالەمدىن يىراق،
ئىشىك بېشىغا ئېسىلدى پىراق .
تاڭ ساھەردە مەكتەپكە ماڭدى ،
تېخى ئاخشام ئىڭرىغان بوۋاق .
بۇلاق بەلكىم تىلسىز بىر شاھىد
كېچە كۆرگەن ئۇنتۇلغان بىر چۈش
ئەسلىمىنىڭ تۇنجى بېتى ئۇ .
بۇلاق شۇنداق سۆيگۈچان تارىخ .

تەنھالىقنىڭ سۆيدۈم مەڭزىگە ،
تەشنا بولۇپ سوغۇق لىۋىگە .
بىزگە مەنسۇپ بۇ گۈزەل دۇنيا ،
ماڭا مەنسۇپ بۇ رەزىل دۇنيا .
تەنھالىققا ئەگەشتىم تەنھا ،
مەيلىڭ بولسا تارتقىن قېشىڭغا.

چاچلىرىمنى سېغىنماس شامال،
چىقماس بەلكىم بۇ كېچە شامال .
مەن ياشايمەن ئەتىمۇ يەنە،
قىسمىتىمگە ئىزدىگەچ ئامال.
قار ياغمىدى چېچەككە ئوخشاش،
ۋەھىم سېلىپ تەنھا رومكىغا .
ئېسەدەيدۇ سۆيۈملۈك باتناش،
مەيلىمىكىن كۈلسەم زورىغا؟

كۈنلەرنىڭ پەرقى يوق ئۆتكەن كۈنلەردىن،
مەن يەنە سەھەردە جىمجىت ئويغاندىم.
نېسىۋەم بار تۇرۇپ نازلىق ئۈنلەردىن،
تاراملاپ تۆكۈلدۈم، يالغۇز مۇڭلاندىم.
گۈللەرنىڭ ھىدى يوق ئۈزگەن گۈللەردە،
مەن يەنە سىرىمنى سايەمگە تۆكتۈم.

تۇغۇلمىقىم نۇرانە ھېكمەت،
زورۇقىمەن ياشامدا رەت – رەت.
كۆز نۇرۇمغا قانماستىن بىر رەت ،
مەن نېمىگە ئىزدەيمەن قىممەت؟
بىلەلمىدىم يۈرەك ئۇ نېمە؟

يارىم قېنى مۇڭلۇق كۆزلىرىڭ ،
قوش كەپتەرنى چەككەن ياغلىقىڭ.
كوچىلاردا يۈرسەم تامادا ؟،
ماڭا دەرمان بولماس پاكلىقىڭ .
ئازاپ…ئازاپ… ھەممىسى ئازاپ،
ئىسەدەيسەن تۇرقۇمغا قاراپ.

مەن بۈگۈن بەستى شاھ، غالىپ قىياپەت،
غۇرۇرۇم چېچىلغاي ئالەمگە كۆزدىن.
مىڭ قەسەم-ۋەدىلەر بۈگۈن بىھاجەت،
جان قىيام بولغۇسى بىر ئېغىز سۆزدىن.
ۋىسالنىڭ دەملىرى يايغاندا ئېتەك،
ھەسەتتىن رەقىبلەر زۇۋانى ئۆچتى.

بىزنىڭ ئۆينىڭ ئىشىكى
ھېلىمۇ قارامدۇ چاقماق دەرياسىغا؟
خاتىرەمدىكى مەن
ھېلىمۇ ئەركىلەمدۇ بوۋىسىغا.
شۇ كۈنى
مەن ئايرىلغان توپىلىق يولدىن،
شۇ كۈنى
ئۇ قايتقانتى مېنىڭ ئىزىمدىن.

تۈن قاراڭغۇسى
ئالەم ئۇيقۇسى،
گۇمانىمدا ماڭىلا شەيدا
سىرلار قايغۇسى،
سۆزلەپ بەرسەم كىملەر قانغۇسى؟
مەن ھېچكىمگە دېمىدىم تېخى،
كۆزدىن تامدى دىلنىڭ تامچىسى.
مەن ئۆزۈمنى تىللىدىم راسا،
كۆزنى ئاچسام چۈشكەن ھەممىسى.
چۈشمۇ بۇ؟؟؟
چۈشقۇ بۇ!!!.