ئارزۇ ۋە رېئاللىق

لى دۇڭمېي
دىلئارام باھاۋىدىن تەرجىمىسى

ئەرلەرنىڭ ئارزۇسىدىكى بىر كۈن
 

10:00 دا ئورنىدىن تۇرۇپ چېچىنى ياسىسا؛
10:10 دا ھاجەتخانىغا كىرىپ گېزىت كۆرسە، ئاندىن ساقىلىنى ئالسا؛
11:00 دە كارىۋاتتىلا ناشتا قىلسا، ناشتىسىدا كالا گۆشى، تورت ۋە قەھۋە بولسا؛
11:30 دا ئېسىل پىكاپىدا ئولتۇرۇپ تەنتەربىيە سارىيىغا بېرىپ، پۇتبول مۇسابىقىسى كۆرسە، ئۆزى ياخشى كۆرىدىغان كوماندا 7:0 نەتىجە بىلەن غەلىبە قىلسا؛
14:00 تاماقتىن كېيىن، بۇ يىللىق دۇنيا گۈزىلى بىلەن دېڭىز ساھىلىدا ئاپتاپقا قاقلىنىپ، مۇڭداشسا؛
15:00 تە شىركەت خادىمى شىركەت پاي چېكىنىڭ يەنە ئىككى ھەسسە ئۆرلىگەنلىكى توغرىسىدىكى مۇھىم ھۆججەتنى ئەكېلىپ ئۇنىڭغا قول قويغۇزسا؛
16:00 دا چېنىقىش كۇلۇبىغا بېرىپ، بەدەن چېنىقتۇرسا، ئۇنىڭ تولغان مۇسكۇللىرى ھەممىنى ھەيران قالدۇرسا، قىزلار ئۇنىڭ ئەتراپىغا ئولىشىۋېلىپ تېلېفون نومۇرىنى سورىسا؛
17:00 دە ئاغىنىسىنىڭ تەكلىپى بىلەن ساننا مۇنچىسىغا بارسا، ئۇ يەردە قىزىل ھاراق ئىچكەچ تايلاندچە ئۇۋىلاشتىن بەھرىمەن بولسا؛
18:30 دە شەخسى ئايروپىلانىغا ئولتۇرۇپ لاسۋىگاسقا بارسا؛
19:00 دا خىلتون مېھمانسارىيىغا بېرىپ غىزالانسا؛
19:30 دا قىمارخانىغا بېرىپ قىمار ئوينىسا، ئۇتقان پۇلى تاغدەك دۆۋىلىنىپ كەتسە؛
22:00 دە كەچلىك خەۋەرلەرنى، پۇتبول چولپانلىرى توغرۇلۇق ئۇچۇرلارنى كۆرسە؛
23:00 تە ئۈچ ساھىبجامال بىلەن رومانتىك يۇيۇنۇپ چىقسا؛
00:30 دا گۈزەل كۈتكۈچى قىز بىر ئىستاكان پىۋە ئەكىرىپ بەرسە؛
01:00 دە راھەتلىنىپ ئۇيقۇ دېڭىزىغا غەرق بولسا؛
ئەرلەرنىڭ رېئال بىر كۈنى
06:00 دە سائەت قوڭغۇرىقى جىرىڭلايدۇ. بۇ نەرسىنى قايسى جىن تەپكەن ساراڭ ئىجاد قىلغان بولغىيدى؟!
06:30 دا كېچىكىپ قالغانلىقىنى بىلىپ، كارىۋاتتىن سەكرەپلا قوپىدۇ.
06:40 تا دەرھال ئىشتىنىنى كىيىدۇ، ئالدىراشچىلىقتا قەھۋەنى ئىستاكانغا تۆكۈپ، قايناقسۇنى كۈلدانغا قۇيىدۇ، ئىچكەندىن كېيىنلا ئاندىن تەمىنىڭ باشقىچە ئىكەنلىكىنى ھېس قىلىدۇ.
06:50 تە پاكىز پايپىقىنى تاپالمايدۇ، ئايىغىنىڭ ئىچىدىكى مۈشۈك پوقىنى كۆرۈپ ئاچچىقىدا مۈشۈكنى بىر تېپىدۇ.
07:00 دە ساقىلىنى ئالغاندا كېسىۋالغان يېرىگە چاپلاش ئۈچۈن پىلاستىر ئىزدەيدۇ.
07:30 دە ئۆيدىن ئۇچقاندەك يۈگۈرۈپ چىقىپ بېكەتتە ئاپتوبۇس ساقلايدۇ، ئۇزاققىچە ساقلىسىمۇ ئاپتوبۇس كەلمەيدۇ.
08:00 ئاپتوبۇسقا قىستىلىپ ئاران چىقىۋالىدۇ، ئاپتوبۇستا ئولتۇرىدىغانغا ئەمەس تۇرىدىغانغىمۇ جاي چىقمايدۇ.
08:30 دا ئاپتوبۇستىن ئاران چۈشۈۋېلىپ، ھاسراپ-ھۆمۈدەپ ئىشخانىغا كىرىپ، مۇھىم بىر ھۆججەتنىڭ ئۆيدە قالغانلىقىنى ئېسىگە ئالىدۇ.
13:00 تە چۈشلۈك دەم ئېلىشتا، دۇكاندىن ئالغان بولكىسىنى چىشلىگەچ ئەمدىلا تور ئويۇنىنى ئېچىشىغا، غوجايىننىڭ ئارقىدا تۇرغىنىنى كۆرىدۇ. غوجايىن قاپىقىنى تۈرۈپ ئۇنىڭغا ۋەزىپىنى تېزرەك پۈتكۈزۈشنى تاپشۇرىدۇ ۋە بۇ ئايلىق مۇكاپاتنى تۇتۇۋالىدىغانلىقىنى ئېيتىدۇ.
17:00 دە بىر كۈنلۈك خىزمىتىنى تۈگىتىپ «ئۇف» دەيدۇ.
17:30 دە كومپيۇتېرغا ۋىرۇس كىرىپ، بىر كۈن يۈرەك قېنىنى سەرپ قىلغان ئىشى يوق بولىدۇ.
17:40 تا ئاغىنىسىنىڭ كەچلىك تاماقنى بىللە يېيىش تەكلىپىنى خۇشاللىق بىلەن قوبۇل قىلىدۇ، ئاندىن تۇيۇقسىزلا قېينئانىسىنىڭ ئۆيگە كېلىدىغانلىقى يادىغا يېتىدۇ.
18:00 دە ئۆيگە كېلىپلا ئايالىنىڭ كوتىلداشلىرىنى ئاڭلايدۇ، ئاندىن ئەخلەت تۆكىدۇ، پولنى سۈرتىدۇ.
19:00 دا قېيىنئانىسى كېلىدۇ، كۆڭلىدە: «مۇشۇ قېينئانا دېگەننى كىم ياراتقان بولغىيدى» دەپ ئويلايدۇ.
19:30 دا قېيىنئانىسى ئۇنىڭغا: «قىزىمنىڭ چىرايى سارغىيىپ كېتىپتۇ، كۆپرەك ساياھەتكە ئاپىرىڭ» دەيدۇ. يەنە تېخى نوركا پەلتۇ ئېلىپ بېرىشنى بۇيرۇيدۇ.
21:00 دە كەچلىك خەۋەردە ئۆزى ياخشى كۆرىدىغان پۇتبول كوماندىسىنىڭ 7:0 نەتىجە بىلەن ئۇتتۇرۇپ قويغانلىقىنى ئاڭلايدۇ.
22:00 دە ئولتۇرۇپ ماتېرىياللىرىغا قاراپ، مېڭىسى توختاپ قالغاندەك ھېس قىلىدۇ-دە، بىر بوتۇلكا پىۋا ئىچىدۇ.
00:00 دە قېيىنئانىسىنىڭ دەم ئېلىشى ئۈچۈن ياندىكى ئۆينى راسلاپ بېرىدۇ.
00:30 دە ئۇياققا ئۆرۈلۈپ، بۇ ياققا ئۆرۈلۈپ مىڭ تەستە ئۇخلاپ قالىدۇ.
مەنبە: ئۈرۈمچى كەچلىك گېزىتى