زادى كىم ئۆزگەردى؟

ئېرى دەيدۇ: خوتۇنۇم ئۆزگىرىۋالدى، كىچىككىنە ئىش ئۈچۈنمۇ كوتۇلداپ كېتىدۇ، بارغانسېرى ئانامغا ئوخشاپ قېلىۋاتىدۇ.

خوتۇنى دەيدۇ: ئېرىم ئۆزگىرىۋالدى، كۈن بويى ئويناشنىلا بىلىدۇ، ئۆينىڭ ئىشى بىلەن كارى يوق، بارغانسېرى ئوغلۇمغا ئوخشاپ قېلىۋاتىدۇ.

مۇئەللىم دەيدۇ: ئوقۇغۇچىلار ئۆزگىرىپ كەتتى، ساپاسى بارغانسېرى تۆۋەنلەپ كەتتى، كىچىكلا تۇرۇپ مۇھەببەتلىشىدۇ، دائىم دەرستىن قالىدۇ، ئاندىن ھەدەپ دەرستىن سىرتقى كۇرۇسلارغا يۈگۈرەيدۇ، ھەقىقىي تىرىشچاملىق كەمچىل.

ئوقۇغۇچى دەيدۇ: مۇئەللىملەر ئۆزگىرىپ كەتتى، پۇل تېپىشنىلا بىلىدۇ، دەرسنى چىن كۆڭلىدىن، ئەستايىدىل ئۆتمەيدۇ، نۇقتىلىق مەزمۇنلارنى دەرستىن سىرىتقى كۇرۇسلارغا قالدۇرىدۇ، بىزنىڭ قاتناشماي ئىلاجىمىز يوق، ھېيت-بايراملاردا يەنە«كۆڭلىمىزنى ئىزھار قىلمىساق بولمايدۇ».

دوختۇر دەيدۇ: بىمارلار ئۆزگەردى، ئۇلارغا تاقابىل تۇرۇش بارغانسېرى تەس بولىۋاتىدۇ، دورىنى كۆپرەك يېزىۋەتسەكلا، قويۇلۇپ كەتتىم دەيدۇ، كىچىككىنە چاتاق چىقسىلا ئەرز قىلىدۇ.

بىمارلار دەيدۇ: دوختۇرلار ئۆزگىرىپ كەتتى، «ئاق خالاتلىق پەرىشتىلەر»نىڭ ئالىيجاناپلىقىنى ئەمدى كۆرگىلى بولمايدۇ، ئۇلار ماشىنىغا تايىنىپ ئومۇميۈزلۈك تەكشۈرۈشتىن باشقىنى بىلمەيدۇ، يەنە تېخى «قىزىل بولاق» ئېلىشقا ئامراق.

سودىگەر دەيدۇ: ئىستېمالچىلار ئۆزگىرىپ كەتتى، بارغانسېرى مالدىن تولا ئېۋەن ئىزدەيدۇ، ھېچنىمىدىن-ھېچنىمە يوقلا ئىستېمالچىلار جەمئىيىتىگە ئەرز قىلىدۇ.

ئىستېمالچىلار دەيدۇ: سودىگەرلەر ئۆزگىرىپ كەتتى، بارغانسېرى پايدىنىلا كۆزلەيدىغان بولۇپ كەتتى، پۇل تېپىش يولىدا ھەر قانداق ۋاستىدىن باش تارتمايدۇ، مېلىغا ساختىلىق ئارىلاشتۇرۇپ پۇقرالارغا زىيان سالىدۇ.

رەھبەرلەر دەيدۇ: ئىشچى-خىزمەتچىلەر ئۆزگىرىپ كەتتى، ئىشتا ئاكتىپ ئەمەس، ئىلگىرىكىدەك جاپاغا چىداپ باش چۆكۈرۈپ ئىشلەيدىغانلار يوق، يەنە تېخى رەھبەرلەرگە يانىدۇ.

خادىملار دەيدۇ: رەھبەرلەر ئۆزگىرىپ كەتتى، ئىگىلىك يارىتىش مەزگىلىدىكى جاپاغا چىداش، تۆۋەندىكىلەرنىڭ دەردىگە دەرمان بولۇش دېگەنلەر تارىخقا ئايلىنىپ قالدى، ھازىر ئۇلار ئاسانلا خاپا بولۇپ چېچىلىدىغان، راھەت-پاراغەتكە بېرىلىدىغان بولۇپ كەتتى.

ئەمەلدارلار دەيدۇ: پۇقرالار ئۆزگىرىپ كەتتى، كىچىككىنە ئىش بولسىلا يۇقىرىغا ئەرز قىلىدۇ، ھەدىسىلا «بىنادىن ئۆزۈمنى تاشلايمەن» دەپ جامائەتنىڭ دىققىتىنى جەلب قىلىدۇ.

پۇقرالار دەيدۇ: ئەمەلدارلار ئۆزگىرىپ كەتتى، پۇقرالارغا ئاتىدارچىلىق قىلىدىغانلارنى تاپقىلى بولمايدۇ، كۈن بويى مەدھىيلىنىشلىنىلا بىلىدۇ، ئاتالمىش سىياسىي نەتىجىسىنى ئۆستۈرۈشنىلا قوغلىشىدۇ، ئاستىرتتىن بولسا پارا يېيىشنى، چىرىكلىشىشنى، ئاشنا تۇتۇشنىلا ئويلايدۇ.