1. بالىغا سۇ ئۈزۈشنى ئۆگىتىشنىڭ ئەڭ مۇۋاپىق ياش چېكى

 

مۇتەخەسسىسلەرنىڭ كۆرسىتىشىچە، 4 ياشتىن 8 ياشقىچە بولغان مەزگىلى سۇ ئۈزۈشنى ئۆگىنىشنىڭ ئەڭ ياخشى مەزگىلى ھېسابلىندىكەن. سۇ ئۈزۈشنى يېڭى ئۆگىنىدىغان بالىلارغا نىسبەتەن سۇنىڭ تېمپېراتۇرىسى 30 سىلسىيە گىرادۇس بولسا ئەڭ مۇۋاپىق. بالا ئانىنىڭ قورسىقىدىكى ۋاقتىدا نەپەس ئالماي تۇرۇش ئىقتىدارى بولىدۇ، ياشنىڭ چوڭىيىشىغا ئەگىشىپ، بۇ ئىقتىدار چېكىنىدۇ، ئۇنتۇلىدۇ. 4 ياشتىن 8 ياشقىچە بولغان بالىلاردا مەيلى بەدەن ئەھۋالى، ئۆگىنىش ئىقتىدارى، ئۆگىنىشكە بولغان ھەۋەس جەھەتلەردە بولسۇن، نىسبەتەن زور ئىلگىرىلەشلەر بولىدۇ. نەپەس ئالماي تۇرۇش ئىقتىدارىنى پۈتۈنلەي ئۇنتۇلۇپ كەتمەيدۇ، بۇ مەزگىلدە سۇ ئۈزۈشنى ئۆگەتسە، ئاسان ئۆگىنىۋالىدۇ.

 

2. سۇ ئۈزۈشنىڭ بالىغا بولغان پايدىلىق تەرەپلىرى

 

1) سۇ ئۈزۈشتىن ئىبارەت بۇ مۇرەككەپ ھەرىكەت چوڭ مېڭىنىڭ يېتەكچىلىكىدە تاماملىنىدۇ. سۇ ئۈزۈش جەريانىدا چوڭ مېڭىنىڭ ئىقتىدارىمۇ ئاشىدۇ، بۇ سىرتقى مۇھىتقا بولغان ئىنكاسى تېزلىشىش، ئەقلىي ئىقتىدارى تەرەققىي قىلىش جەھەتتە ئىپادىلىنىدۇ.

 

2) يۈرەك مۇسكۇلى تەرەققىي قىلىدۇ، ماددا ئالمىشىش راۋانلىشىدۇ، يۈرەك سوقۇشى ئوخشاش ياشتىكى باشقا بالىلارغا قارىغاندا ئاستىلايدۇ ۋە كۈچلۈك سوقىدۇ، بۇنىڭ بىلەن بەدەن ساپاسى تېخىمۇ يۇقىرى بولىدۇ.

 

3) نەپەسلىنىش سىستېمىسىنىڭ ئىقتىدارى كۈچىيىدۇ، ئۆپكىسىنىڭ نەپەس سىغىمچانلىقى ئېشىپ، نەپىسىنى قىسىپ تۇرۇش ۋاقتى ئۇزىرايدۇ.

 

4) بەدەندىكى ئارتۇقچە ياغ ئازىيىدۇ، بەدەننىڭ ھەرقايسى قىسىملىرىدىكى مۇسكۇللار ھەرىكەتلىنىپ، بەدەن شەكلى گۈزەللىشىدۇ.

 

5) سوغۇققا چىدامچانلىقى ۋە كېسەلگە تاقابىلچانلىقى ئاشىدۇ.

 

3. پەرھىزلەر

 

1) بەدىندە يارا، تېرە كېسىلى، كۆز كېسىلى قاتارلىقلار كۆرۈلگەندە، زۇكامدىغاندا، ئاغرىپ قالغاندا، بىئاراملىق ھېس قىلغاندا ياكى بەدىنى ئاجىز مەزگىلدە سۇ ئۈزمەسلىكى كېرەك.

 

2)‌ سۇ ئۈزۈش جەريانىدا باشقا بالىلار بىلەن ئازارلىشىپ قالماسلىقى، بەك ئېگىز جايدىن سەكرەپ ئوينىماسلىقى كېرەك.

 

3) سىرتتا سۇ ئۈزۈشتە، چۈش ۋاقتى ھاۋا تازا ئىسسىغاندا سۇغا چۈشمەسلىكى لازىم. يەنە بەدىنىگە كۈن قالقىنى سۈرۈپ، تېرىسىنىڭ ئاپتاپتىن زەخىملىنىشىنىڭ ئالدىنى ئېلىش كېرەك.

 

4)‌ سۇ ئۈزۈشتىن بۇرۇن بەك تويۇنۇپ غىزالانماسلىقى ياكى ئاچ ھالەتتە سۇغا چۈشمەسلىكى، ئەڭ ياخشىسى غىزالىنىپ بولۇپ بىر سائەتتىن كېيىن سۇغا چۈشۈشى كېرەك، بولمىسا پېيى ئاسان تارتىشىپ قالىدۇ.

 

5) ھاۋا تېمپېراتۇرىسى تۆۋەن، سۇ بەك سوغۇق بولسا، بالىغا ماس كەلمەيدۇ. شارائىت بولسا، ئۆي ئىچى سۇ ئۈزۈش كۆللىرىگە بېرىپ سۇ ئۈزسە بولىدۇ، ئادەتتە بۇنداق جايلاردىكى سۇنىڭ تېمپېراتۇرىسى 26 – 29 سىلسىيە گىرادۇس بولسا بولىدۇ.

 

6) بالىنىڭ ھەر قېتىملىق سۇ ئۈزۈش ۋاقتى بەك ئۇزۇن بولۇپ كەتمەسلىكى كېرەك. ئەگەر، بالىدا چىراي تاتىرىش، تىترەش ياكى ئالىقان، تاپانلىرىدا قورۇق بولۇش ئەھۋاللىرى كۆرۈلسە، سۇ ئۈزۈش ۋاقتىنىڭ ئۇزىراپ كەتكەنلىكىنى بىلدۈرىدۇ، بۇ خىل ئەھۋالدا دەرھال ئارام ئېلىش كېرەك. بالىلارنىڭ سۇ ئۈزۈش ۋاقتى يېرىم سائەت ئەتراپىدا بولسا مۇۋاپىق.