خەلق تورى ئۇيغۇرچە قانىلىنىڭ 18-ئىيۇل بېيجىڭدىن بەرگەن تېلېگراممىسى: ئەنگلىيەنىڭ بىر تەتقىقات تۈرىدە كۆرسىتىلىشىچە، ياش-ئۆسمۈر بالىلار ئۇخلىغاندا چىشىنى غۇچۇرلاتسا،ئۇ بەلكىم ئۇلارنىڭ كۈندۈزى مەكتەپتە تىل ھاقارىتىگە ئۇچرىغانلىقى بىلەن مۇناسىۋەتلىك بولۇشى مۇمكىن ئىكەن. شۇنىڭ ئۈچۈن، ئاتا-ئانىلار ياش-ئۆسمۈر بالىلاردىكى بۇنداق ئالامەتكە ئەھمىيەت بېرىپ، ئۇنىڭغا تاقابىل تۇرۇش تەدبىرلىرىنى قوللىنىشى كېرەك.

 

　　ئەنگلىيەدىكى مەلۇم بىر ژۇرنالدا ئېلان قىلغان تەتقىقات دوكلاتىدا دېيىلىشىچە، كۈندۈزى مەكتەپتە تىل ھاقارىتىگە ئۇچرىغان ياش-ئۆسمۈرلەرنىڭ كېچىسى چۈشىدە چىشىنى غۇچۇرلىتىش ئېھتىماللىقى %65 بولۇپ، بۇنداق بالىلار ياش-ئۆسمۈرلەرنىڭ تۆت ھەسسىسىگە توغرا كېلىدىكەن.

 

　　ئەنگلىيە پاراۋانلىق ئاپپاراتىنىڭ ئېغىز بوشلۇقى ساغلاملىقى فوندى جەمئىيىتى مۇنداق دېدى: چۈشىدە داۋاملىق چىشىنى غۇچۇرلاتسا، چىشى زەخىملىنىپ، ھەتتا چۈشۈپ كېتىشى مۇمكىن.مەزكۇر فوندى جەمئىيىتىنىڭ لىدىرى نىگېل كات مۇنداق دېدى: مەيلى بالىلار ياكى چوڭلار بولۇشىدىن قەتئىينەزەر، بېسىمغا ئۇچرىسا،ئۇلاردا چىشىنى غۇچۇرلىتىش ئەھۋالى كۆرۈلىدۇ، ئەمما مەكتەپتە بوزەك بولۇش بىر مۇھىم بېسىم ئامىلى ھېسابلىنىدۇ. ئۇ يەنە مۇنداق دېدى: بالىلار دۇچ كېلىدىغان نۇرغۇن مەسىلىلەر ئىچىدە چىشىنى غۇچۇرلىتىش جىددىي ئەھۋال بولماسلىقى مۇمكىن، لېكىن ئۇ بالىنىڭ ئىدىيە ھالىتىنى ئىگىلەشتىكى مۇھىم ئۇسۇلدۇر، يەنى، بۇنىڭ بىلەن، ئاتا-ئانىلار بالىسىنىڭ بوزەك بولغان ئەھۋالىنى بالدۇرراق ئىگەللەپ، شۇنىڭغا مۇناسىپ تەدبىر قوللىنىشىغا پايدىلىق.

 

　　كات يەنە مۇنۇلارنى دېدى: ئويغانغاندا، بېشى داۋاملىق تېلىپ ئاغرىسا ياكى ئېڭىكى ئاغرىسا، ئۇخلىغاندا چىشىنى غۇچۇرلاتقانلىقىدىن دېرەك بېرىشى مۇمكىن، بالىلار بۇ خىل ئەھۋالنى ئاتا - ئانىسىغا ئىنكاس قىلسا، ئاتاـ ئانىلار ئۇنىڭغا چوقۇم دىققەت قىلىشى ھەمدە ئەھمىيەت بېرىشى كېرەك.