تونۇش: بۇ، ھەرخىل سەۋەبلەر تۈپەيلىدىن مېڭە ۋە نېرۋا خىزمىتى قالايمىقانلىشىپ، تۇيۇقسىز ئەس- ھوشى توسقۇنلۇققا ئۇچراش، پۈتۈن بەدەن تارتىشىش، ئېغىزىدىن كۆپۈك ئېقىش، چىشلىرى كىرىشىپ قېلىش قاتارلىق ئالامەتلەر بىلەن ئىپادىلىنىدىغان مىزاج بۇزۇش خاراكتېرلىك كېسەللىك.
پەرۋىش: بالىنىڭ كېسىلى تۇتۇپ تېخى ھوشىغا كەلمىگەن ھالەتتە، بالىنىڭ پۇت قوللىرىنى ھەرىكەتلەندۈرمەسلىك، مۇمكىن قەدەر قوپاللىق قىلماي بېسىپ تۇرۇش، ئاغزىدىن چىققان كۆپۈكنى سۈرتۈپ تۇرۇش ئارقىلىق تىلىنى چاينىۋېلىشتىن ساقلىنىش لازىم. بۇنىڭ ئۈچۈن بارماقتەك چوڭلۇقتىكى ياغاچقا ياغلىقنى يۆگەپ ئاغزىغا چىشلىتىپ قويۇش لازىم. چېكىسىنى ۋە بۇرۇن قانىتىنى ئۇۋۇلاپ بەرسە، بالىنىڭ تېزرەك ھوشىغا كېلىشىگە ياردىمى بولىدۇ. ھوشىغا كەلگەندىن كېيىن ئېغىزنى چايقىۋېتىپ بىر قوشۇق ئانار شەربىتى، بىر قوشۇق بېھى شەربىتى قوشۇلغان قىزىق چاي ئىچۈرۈپ قويسا، بالىنىڭ كۆڭلى ئېچىلىپ، ئەسەبلىرىدىكى كېسەللىك تەسىرىنىڭ تېز يوقىلىشىغا پايدىسى بار.
يەنى ئۇنىڭدىن باشقا ئوزۇقلۇق قۇۋۋىتى يۇقىرى يېمەك- ئىچمەكلەر بىلەن ئوزۇقلاندۇرۇش، زىيادە چارچاش، روھىي جىددىيلىشىش، ئاچچىقلىنىش، ئەقلىي ئەمگەك بىلەن زىيادە شۇغۇللىنىپ چارچاپ كېتىش، زىيادە تويۇنۇپ تاماق يېيىش، سوغۇق سۇنى كۆپ ئىچىش، قەۋزىيەتتىن ساقلىنىش، ئېگىز تاملارغا چىقىش، دەريا ۋە كۆل بويلىرىغا بېرىش، ئوت ئەتراپىغا بېرىش، قورقۇتۇش، تىلىنى چىشلەپ زەخىملەندۈرۈپ قويۇشلاردىن ساقلىنىش لازىم. نورمال ھەرىكەت قىلدۇرۇشقا ئەھمىيەت بېرىش، مۇۋاپىق دەم ئېلىش، يېمەك -ئىچمەك تەركىبى ۋە تەرتىپىگە دىققەت قىلىش، روھىي جەھەتتىن خاتىرجەم قىلىش، نەپەس يوللىرىنىڭ راۋانلىقىنى ساقلاش، مەنزىرىلىك جايلارنى ساياھەت قىلدۇرۇش قاتارلىقلارغا كاپالەتلىك قىلىش لازىم.
پەرھىز: تەستە ھەزىم بولىدىغان، غىدىقلىغۇچى، يەل پەيدا قىلغۇچى، زىيادە مايلىق ياكى زىيادە سوغۇق، ئىسسىق تەبىئەتلىك يېمەك- ئىچمەكلەردىن پەرھىز قىلىنىدۇ. بولۇپمۇ ئۆچكە، كالا ۋە ئات گۆشلىرىدىن پەرھىز قىلدۇرۇلىدۇ.