ئەڭ ئاخىرقى ماددا  

ئۇنىڭ خەجلەپمۇ تۈگىتەلمىگۈدەك پۇلى بار بولۇپ ، ھەقىقەتەن باي ئاياللاردىن ئىدى. بالىسى ئىككى ياشقا كىرگەن يىلى بولسا ھەممە نەرسىدىن زېرىككەندەك بولۇپ قالدى. بالا ئۇنىڭ بارلىق ۋاقتىنى ئىگىلىۋالغان بولۇپ ، ئىجتىمائىي سورۇنلارغا بارالمىغىنىغا خېلى زامانلار بولۇپ قالغان ئىدى . ئۇ بالىسىنى ئېلىپ شەھەردىكى ئەڭ ياخشى بالىلار باغچىسىغا يېتىپ كەلدى. بۇ باغچىنىڭ شارائىتىدىن قۇسۇر ئىزدەپ تاپقىلى بولمايتتى . باغچا تەربىيەچىلىرىنىڭ ساپاسى يۇقىرى ، مۇكەممەل بالىلار ئوقۇشلۇق دەرسلىكلىرى بار ، يېمەك–ئىچمەكتىكى ئوزۇقلۇقمۇ نورمال تەڭشەلگەن ئىدى . بۇ يەر ئۇنىڭ بالىسىنىڭ جىسمانىي ۋە روھىي جەھەتتىن ساغلام ئۆسۈپ يېتىلىشىگە كاپالەتلىك قىلالايتتى .

   ئۇ باغچا باشقۇرغۇچىسىغا :

  ــــ سىلەرنىڭ شارائىتىڭلار ھەقىقەتەن ياخشىكەن ، مەن بالامنى بۇ يەرگە بېرىشنى قارار قىلدىم، - دېدى.

   باشقۇرغۇچى تولىمۇ خۇشال ھالدا ئۇنىڭ بالىسىنى ئېلىپ قالدى ۋە:

   ــــ بىز يېرىم يىلدا بىر قېتىم توختامغا قول قويۇشساق بولىدۇ ، توختامدىكى ھەر بىر ماددىغا ياخشىراق قاراپ چىققايسىز، - دېدى .

   باي ئايال توختامغا ئالدىراپ كۆز يۈگۈرتۈۋەتكەندىن كېيىن:

 ــــ پۇل مۇھىم ئەمەس ، ھازىرلا ئاغدۇرۇپ بەرسەممۇ بولىدۇ . ئەمما توختامنىڭ ئەڭ ئاخىرقى ماددىسىنى بىر ئاز چۈشىنەلمەي قالدىم ، - دېدى.

   ــــ شۇنداق ھۆرمەتلىك خانىم ، باغچىمىز بالىڭىزنى قوبۇل قىلىش ئۈچۈن ، چوقۇم دائىم كىيىدىغان كىيىمىڭىزدىن بىرنى بۇ يەرگە قويۇپ كېتىشىڭىز كېرەك . چاپان ، مايكا ياكى كۆينەك، قايسىسى بولسا بولىۋېرىدۇ ، بۇنىڭغا چوقۇم ماقۇل دېيىشىڭىز كېرەك ، - دېدى باشقۇرغۇچى .

   ــــ بىراق ، مەن سىلەر بېكىتكەن بارلىق ھەقلەرنى تۆلەپ بولدۇم ، يەنە نېمىشقا كىيىمىمدىن بىرنى ئېلىپ قالىسىلەر؟ - دەپ سورىدى ئايال ھېچنىمىنى چۈشەنمىگەن ھالدا .

   ــــ چۈشلۈكى بالىلار ئۇخلاشقا ئۇنىمايدۇ ، بىراق ئۇلارغا ئانىسى كىيگەن كىيىمنى يېپىپ قويساق ، بالىلار تىنچلىنىپ ئۇخلاپ كېتىدۇ ، - دېدى باشقۇرغۇچى.

     باي ئايال گەپمۇ قىلالماي قالدى . ئۇ تېخىچە تاتلىق ئۇخلاۋاتقان بالىسىنى باغرىغا باسقىنىچە ، شەھەردىكى شارائىتى ئەڭ ياخشى بۇ بالىلار باغچىسىدىن چىقىپ كەتتى . شۇ تاپتا ئۇ ئانىنىڭ ئورنىنى ھېچكىمنىڭ باسالمايدىغانلىقىنى چوڭقۇر ھېس قىلغان ئىدى .