ئىلقۇت تورى يانبىلوگ نەشرى

ئايتۇرسۇن رۇسۇل 1990-يىلى سانائەت ئىنىستۇتىنىڭ يېمەكلىك كەسپىنى پۈتتۈرگەن. ئۇ 1993-يىلى «يېمەكلىك پىششىقلاپ ئىشلەش ۋە ساقلاش» ناملىق كىتابنى يېزىپ چىققان. بۇ كىتاب 1997-يىلى دۆلەتنىڭ كىتاب نەشر قىلىش پىلانىنىڭ ئىچىدە نەشردىن چىقىرىلغان بولۇپ، دىيارىمىزدىكى تۇنجى ئۇنىۋېرسال بولغان يېمەكلىكلەرنى پىششىقلاپ ئىشلەش ۋە ساقلاش ھەققىدىكى بىردىنبىر كىتاب بولۇپ قالغان. 

ئايتۇرسۇن رۇسۇل 1993-يىلى «يېمەكلىك پىششىقلاپ ئىشلەش ۋە ساقلاش» ناملىق كىتابنى يېزىپ تاماملىغاندىن كېيىن، 1994-يىلى ھاياتىدىكى چوڭ بىر قارارنى چىقارغان. يەنى ئۇ ئىشلەۋاتقان يېمەكلىكلەر تەتقىقات ئورنىدىن ئىستېپا بەرگەن. ئۇ دەسلەپتە ئېنگلىزچە تەرجىمانلىق بىلەن شۇغۇللىنىپ، بۇ جەرياندا 30 دىن ئارتۇق دۆلەتكە چىققان، ھەمدە تاشقى سودا ئىشلىرى بىلەن ئۇچرىشىشقا باشلاپ، ئاز تولا سودا قىلىپ 1 مىليوندىن ئوشۇق پۇل تاپقان.  

ئەمما كېيىن باشقىلارنىڭ ئالدامچىلىقىغا ئۇچراپ 1997-يىلىغا كەلگەندە 2 مىليون يۈەندەك زىيان تارتقان. بۇنىڭ بىلەن ئۇ بۇ چوڭ مەغلۇبىيەتتىن كېيىن دەسلەپتە ئاشخانىلاردا مۇلازىمەتچىلىك قىلغان، مال ساتقۇچى بولغان، ئائىلە ئېلېكتر سايمانلىرى (توڭلاتقۇ) قاتارلىقلارنى رېمونت قىلىش، ساغلاملىق مەھسۇلاتلىرىنى مەخسۇس سېتىش دۇكىنى ئېچىش قاتارلىق ئىشلار بىلەن شۇغۇللانغان. 2004-يىلغا كەلگەندە ئۇنىڭ ساغلاملىق مەھسۇلاتلىرىنى سېتىش دوكىنى 18 ئورۇنغا كۆپەيگەن.

ئۇ تەرجىمانلىق قىلىۋاتقان مەزگىلدە چەتئەلدىكى كارخانىچىلار بىلەن ئۇچرىشىش، ئالاقە قىلىش جەريانىدا دىيارىمىزدىكى كارخانىچىلار ۋە مەملىكىتىمىزنىڭ ئىچكىرى ئۆلكىلەردىكى كارخانىچىلىرى ھەمدە چەتئەل كارخانىچىلىرى ئوتتۇرىسىدا زور پەرقنىڭ بارلىقىنى ھېس قىلغان. شۇنىڭ بىلەن ئۇ دىيارىمىزدىكى كارخانىچىلارنىڭ مەملىكىتىمىز ۋە چەتئەللەردىكى كارخانىچىلارنىڭ ئوتتۇرىسىدىكى پەرقنى تۈگىتىش ئۈچۈن كۈچ چىقىرىشنى ئۆزىنىڭ بۇرچى ۋە مەسئۇلىيىتى دەپ قارىغان. ئۇنىڭدىكى كۈچلۈك مەسئۇلىيەتچانلىق ۋە ئۇنىڭ دادىسىنىڭ جان ئۈزۈش ئالدىدا قالدۇرغان نەسھىيىتىنىڭ تەسىرىدە 2006-يىلغا كەلگەندە بارلىق ساغلاملىق مەھسۇلاتلىرىنى سېتىش دۇكانلىرىنى تاقاپ، شانئال ئىگىلىك تىكلەش كەسپىي تەربىيەلەش مەكتىپىنى قۇرغان. 

ھەر بىر قارار تەربىيەلەشكە چىڭخۇا ئۇنىۋېرسىتېتىدىن 4 نەپەر ئوقۇتقۇچى كېلىپ دەرس ئۆتىدۇ. دەرسلىك ئۇيغۇرچىنى ئاساس قىلىپ ئۆتىلىددىغان بولۇپ، ھازىرغا قەدەر تەربىيەلەنگەنلەر 25 مىڭدىن ئاشقان. تەربىيەلەش مەزمۇنى ئاساسەن ئىگىلىك تىكلەش، كارخانا باشقۇرۇش، سودا باشقۇرۇش ماگىستېرلىقى، ئاياللارغا قارىتىلغان بەختىيار ھايات، شىركەت خادىملىرىنى تەربىيەلەش قاتارلىق مەزمۇنلارنى ئۆز ئىچىگە ئالىدۇ. 
2009-يىلى ئۇ ب د ت نىڭ «17-نۆۋەتلىك ئۈزلۈكسىز تەرەققىيات يىغىنى»غا قاتناشقان.