يۈرەك ئىنسانلارنىڭ ھاياتى ئۈچۈن ئىنتايىن مۇھىم ئەزا، ئۇ ھاياتلىقنىڭ تۈۋرۈكى. يۈرەكنىڭ چوڭلۇقى ئادەمنىڭ ئوڭ مۇشتۇمى بىلەن تەڭ بولىدۇ، ئۇ بەدەندىكى قان تومۇرلار ئارقىلىق پۈتۈن بەدەننى قان بىلەن تەمىنلەيدۇ، يۈرەك ئادەم بەدىنىدىكى باشقا ئەزالارغا قارىغاندا ناھايىتى قۇۋۋەتلىك ۋە كۈچلۈك ئەزا بولۇپ، زاپاس كۈچكە ئىگە. ئۇ ئېھتىياج چۈشكەندە ئادەتتىكىدىن 5-6ھەسسە ئارتۇق كۈچ چىقىرىپ، ئادەم ھاياتىنى ساقلاپ قالالايدۇ، بەزىدە ئادەم بەدىنىدىكى قان ئايلىنىش مەلۇم سەۋەبلەر تۈپەيلى توسقۇنلۇققا ئۇچرىسا، ئۇ توسقۇنلۇقنى يېڭىپ، ئۆز خىزمىتىنى ئادا قىلىۋېرىدۇ، يۈرەكنىڭ بۇنداق ئالاھىدە خۇسۇسىيەتكە ئىگە بولۇشى، يۈرەك ھەركىتىنى كۈچەيتىش بىلەن مۇۋاپىق مىقداردىكى قاننى قان ئايلىنىش سىستېمىسىغا چىقىپ بېرىش ئارقىلىق ئەمەلگە ئاشىدۇ. بۇ چاغدا يۈرەكنىڭ ھەرىكىتى تېزلىشىپ، يۈرەك مۇسكۇلنىڭ قىسقىرىش كۈچى ئاشىدۇ، يۈرەك بوشلۇقى كېڭىيىپ ئۆزىگە تېخىمۇ كۆپ مىقداردىكى قاننى سىغدۇرۇپ، ھەر قېتىم قىسقارغاندا تېخىمۇ كۆپ قاننى يۈرەكتىن قان ئايلىنىش سىستېمىسىغا چىقىرىپ بېرىدۇ، زۆرۈر بولغاندا قىسقىراش مىقدارىنى كۈچەيتىدۇ، يۈرەك مۇسكۇلىمۇ قېلىنلاش ئارقىلىق قىسقىراش كۈچىنى ئۆستۈرىدۇ، يۈرەكنىڭ بۇ ئالاھىدە خۇسۇسىيەتلىرى نېرۋا سىستېمىسى بىلەن مۇناسىۋەتلىك. ئەگەر قان ئايلىنىشتىكى بۇزۇلۇشنى كەلتۈرۈپ چىقارغان سەۋەبلەرنى بىر تەرەپ قىلغىلى بولمىسا، شۇنىڭدەك بەدەننىڭ ئەمگەك مىقدارى يۈرەكنىڭ ئىشلەش ئىقتىدارىدىن ئېشىپ كەتسە، يۈرەك ئۆز پائالىيىتىنى كۈچەيتكەن بىلەنمۇ ئورگانىزىمنى قان بىلەن تەمىنلەش ئېھتىياجىغا ماسلىشالماي قالىدۇ، كۈچى ئاجىزلىشىدۇ.
قانداق ئەھۋالدا يۈرەك ئاجىزلىقى كېلىپ چىقىدۇ؟
بىرىنچى، يۈرەك كلاپانلىرىنىڭ شەكلى ئۆزگەرگەندە، مەسىلەن، ئىككى قاپقاقلىق كلاپان تارايغاندا قان راۋان ئېقىپ ئۆتەلمەيدۇ ياكى سول يۈرەكنىڭ خىزمىتى كۆپىيىپ، يۈرەكنىڭ يۈكى ئېغىرلىشىپ كېتىدۇ.
ئىككىنچى، يۈرەك مۇسكۇلىدا ئوزۇقلۇق يېتىشمىگەندە، مەسىلەن ئاشقازان كېسەللىكىگە گىرىپتار بولۇپ، يۈرەكنى يېتەرلىك ئوزۇقلۇق بىلەن تەمىنلىيەلمىگەندە يۈرەك كىچىكلەپ كېتىدۇ.
ئۈچىنچى، يۈرەكنىڭ قان ئايلىنىشى بۇزۇلغاندا تاجىسىمان ئارتېرىيەدە قان ئىمبولىسى پەيدا بولۇپ، توسۇلۇپ قالىدۇ ھەم يۈرەك قېپىغا سۇ يىغىلىپ قالىدۇ.
تۆتىنچى، ھەرخىل يۇقۇملۇق كېسەللىكلەرنىڭ باكتېرىيىلىرى قان ئايلىنىش يولى بىلەن يۈرەككە بېرىپ تەسىر قىلىدۇ.
بەشىنچى، قان بېسىمى ئۇزۇن مۇددەت يۇقىرى بولغان كېسەللەردە يۈرەكنىڭ ھەددىدىن ئارتۇق كېڭىيىپ كېتىشى سەۋەبىدىن يۈرەك ئاجىزلىشىش كېلىپ چىقىدۇ.
ئومۇمەن، يۈرەك ئاجىزلىقى كېسەللىكى بەزىدە ئۆتكۈر خاراكتېرلىك باشلىنىدۇ، بەزى سوزۇلما خاراكتېرلىك بولۇپ، يۇقىرىقىدەك تۈرلۈك كېسەللىكلەرنىڭ سەۋەبىدىن بولىدۇ.
دېمەك، يۈرەك كېسەللىكىنىڭ ئالدىنى ئېلىش ئۈچۈن ئالدى بىلەن يۈرەك كېسەللىكنى كەلتۈرۈپ چىقىرىدىغان ھەر خىل كېسەللىكلەرنىڭ ئالدىنى ئېلىش لازىم.
تۆۋەندىكى مەزمۇننى يانفۇنىڭىزدا دوستلىرڭىز بىلەن تەڭ بەھىرلىنىڭ !
