ئادەمنىڭ كۆزىنى ئالماشتۇرۇش دېگەندە، كۆزنىڭ مۈڭگۈز پەردىسىنى ئالماشتۇرۇش نەزەردە تۇتۇلىدۇ، كۆزنىڭ مۈڭگۈز پەردىسىدە كېسەللىك پەيدا بولۇپ، كۆرۈش ئىقتىدارىنى يوقاتسا، ئۇنى ئوپېراتسىيە قىلىپ ئېلىپ تاشلاپ، ئەمدىلا ئۆلگەن كىشىنىڭ ياكى تۇغۇلۇپلا ئۆلگەن بوۋاقنىڭ كۆز مۈڭگۈز پەردىسىنى ئېلىپ ئالماشتۇرۇپ، ئەما كىشىنىڭ كۆرۈش قۇۋۋىتىنى ئەسلىگە كەلتۈرگىلى بولىدۇ.
مۈڭگۈز پەردە كۆز ئالمىسىنىڭ ئەڭ مۇھىم قىسمى بولۇپ، دېرىزىنىڭ ئەينىكىگە ئوخشاش سۈزۈك كېلىدۇ، بۇ كۆز ئالمىسىنى ئاسراش ۋەزىپىسىنى ئادا قىلىپلا قالماي، ئەڭ مۇھىمى نۇرنى كۆز ئالمىسىغا كىرگۈزۈش ۋەزىپىسىنى ئورۇندايدۇ. ئەگەر كۆز مۈڭگۈز پەردە مەلۇم سەۋەبلەر تۈپەيلىدىن تورلىشىپ قالسا، نۇر مۈڭگۈز پەردىدىن ئۆتۈپ كۆزگە كىرەلمەيدۇ-دە، كۆزنىڭ كۆرۈش قۇۋۋىتى ئاجىزلايدۇ ياكى پۈتۈنلەي يوقىلىدۇ.
مۈڭگۈز پەردە كۆزنىڭ ئالدى پەردىسى بولغاچقا، سىرتقى زەخىملىنىش، ياللۇغلىنىش قاتارلىق سەۋەبلەر تۈپەيلىدىن، ئۇنىڭدا ئاسانلا ئاق چۈشۈش، جاراھەتلىنىش، يۇمشاپ كېتىش قاتارلىق كېسەللىكلەر پەيدا بولىدۇ، بۇنداق كېسەللىكلەرنى دورا بىلەن داۋالاش مۇمكىن بولماي قالغاندا، مۈڭگۈز پەردىنى ئالماشتۇرۇش ئوپېراتسىيىسى قىلىپ، كۆزنىڭ كۆرۈش قۇۋۋىتىنى مەلۇم دەرىجىدە ئۆستۈرگىلى بولىدۇ.
20-ئەسىرنىڭ باشلىرىدىن تارتىپ ھەرقايسى ئەل ئالىملىرىنىڭ تىرىشىشى ۋە ئىزدىنىش ئارقىسىدا، ئالماشتۇرۇش ماتېرىيالى ۋە ئۇنى ساقلاش، ئوپېراتسىيىدىن كېيىنكى بەزى كېسەللىكلەرنىڭ قوشۇلۇپ كېلىشىنى ساقلىنىشىغا ئوخشاش قىيىن مەسىلىلەر ھەل قىلىندى. مەملىكىتىمىزدە كۆز مۈڭگۈز پەردىسىنى ئالماشتۇرۇش ئوپېراتسىيىسى بەزى جايلاردا خېلى ياخشى نەتىجىگە ئېرىشكەن بولسىمۇ، لېكىن كونا ئادەت كۈچىنىڭ تەسىرى تۈپەيلىدىن، ئۆلگەنلەرنىڭ كۆزىنى بېرىشكە قوشۇلىدىغان كىشىلەر ئاز، مۈڭگۈز پەردىسىنىڭ مەنبەسىمۇ ئاز بولماقتا. بۇ مەملىكىتىمىزدە مۈڭگۈز پەردىسىنى ئالماشتۇرۇش تېخنىكىسىنىڭ تەرەققىياتىغا تەسىر يەتكۈزمەكتە، ئەگەر كەلگۈسىدە مەملىكىتىمىزدە سىرلانكىدىكىگە ئوخشاش كۆز ئامبىرى قۇرساق، نۇرغۇن ئەمالارنىڭ دۇنيانى يېڭىباشتىن كۆرۈشىگە ئىمكانىيەت ياراتقىلى بولىدۇ.
تۆۋەندىكى مەزمۇننى يانفۇنىڭىزدا دوستلىرڭىز بىلەن تەڭ بەھىرلىنىڭ !
