بېسىم كۆپ مۇھىتتا ياشىغان ئاياللارنىڭ ھامىلىدار بولۇش نىسبىتى %40 تۆۋەنلەپ كېتىدۇ
دوختۇرلار ھامىلىدار ئاياللارغا دائىم كەيپىياتنى ياخشى تۇتۇشنى، ئۆزىگە ھەرقانداق ئىشنى بېسىم قىلىۋالماسلىقنى تەكىتلەيدۇ. ئۇنداقتا ئاياللار ئۇچرايدىغان بېسىمنىڭ ھامىلىدار بولۇشقا بولغان تەسىرى قانچىلىك؟ ئامېرىكا لۇئىسۋىل ئۇنىۋېرسىتېتى يېقىندا بىر تۈرلۈك تەكشۈرۈش نەتىجىسىنى ئېلان قىلغان بولۇپ، دوكلاتتا كۆرسىتىلىشىچە، تۇخۇم چىقىرىش مەزگىلىدە ئۆزىدە بېسىم ھېس قىلغان ئاياللارنىڭ شۇ ئايدىكى ھامىلىدار بولۇش نىسبىتى %40 تۆۋەنلەپ كېتىدىكەن. ئۇزۇن مۇددەت ھەرخىل بېسىم ئاستىدا ياشىغان ئاياللارنىڭ ھامىلىدار بولۇش نىسبىتى باشقا ئاياللاردىن %45 تۆۋەن بولىدىكەن. تەتقىقاتچىلار 400 نەپەر 40 ياشتىن تۆۋەن، نورمال جىنسىي تۇرمۇش بىلەن شۇغۇللىنىدىغان ئاياللارنى تەكشۈرۈش ئارقىلىق، ئۇلارنىڭ 8 ھەيز مەزگىلىدىكى ئۇچرىغان بېسىملىرىغا قارىتا تۈرلۈك تەكشۈرۈشلەرنى ئېلىپ بارغان. ھەيز مەزگىلىدىكى تۇرمۇش ئادىتى، تاماكا چېكىش چەكمەسلىكى، ھاراق ئىچىش-ئىچمەسلىكى، قەھۋە ئىچىش ئىچمەسلىكى، ھامىلىدارلىقتىن ساقلىنىش تەدبىرلىرى قاتارلىق ئۇچۇرلارنى توپلاپ، ئۇلارنىڭ سۈيدۈكىدىن ئەۋرىشكە ئېلىپ، يېشى، ئېگىزلىكى، بەدەن ئېغىرلىقى، ھاراق ئىچىش ئىچمەسلىكى، جىنسىي تۇرمۇش قېتىم سانىنىڭ ئاز كۆپلۈكى قاتارلىق ئامىللارنى چىقىرىۋەتكەندىن كېيىن يۇقىرىقى يەكۈننى كەلتۈرۈپ چىقارغان. ھەم مۇناسىۋەتلىك دوكلات نەتىجىسى ئامېرىكىدىكى «ئېپىدېمىئولوگىيە خاتىرىسى» ئايلىق ژۇرنىلىدا ئېلان قىلغان.
ماقالىنىڭ ئاساسلىق ئاپتورى، ئېپىدېمىئولوگىيە (تارقىلىشچان كېسەللىكلەر) مۇتەخەسسىسى تايلور: «تەتقىقات نەتىجىسى شۇنى ئىسپاتلاپ بېرىدۇكى، ھامىلىدار بولۇشنى ئويلىغان ئاياللار چوقۇم مۇۋاپىق ھالدا ئۆزىدىكى بېسىمنى يەڭگىللىتىشى كېرەك. مەسىلەن كۆپ ھەرىكەت قىلىش، بېسىمنى يەڭگىللىتىش دەرسلىكلىرىگە قاتنىشىش ئارقىلىق بېسىمدىن خالىي بولۇشى كېرەك» دېدى.
تۆۋەندىكى مەزمۇننى يانفۇنىڭىزدا دوستلىرڭىز بىلەن تەڭ بەھىرلىنىڭ !
