يۈزىدىكى تەر تۆشۈكچىلىرىنىڭ چوڭىيىپ كېتىشى خانىم-قىزلارنىڭ گۈزەللىكىگە تەسىر يەتكۈزىدۇ. يۈزدىكى تەر تۆشۈكچىلىرىنىڭ يوغىناپ كېتىشىنى تەر تۆشۈكچىلىرىنىڭ توسۇلۇپ قېلىشى، دانىخورەكنى قالايمىقان سىقىش، ئۆز تېرىسىگە ماس كەلمەيدىغان گىرىم بۇيۇملىرى بىلەن دورىلارنى قالايمىقان ئىشلىتىش قاتارلىقلار كەلتۈرۈپ چىقىرىدۇ. بۇ خىل ناچار ئادەت ئۆز نۆۋىتىدە يەنە تېرىنىڭ قېرىپ بوشىشىپ كېتىشىگىمۇ سەۋەب بولىدۇ. يۈزدىكى تەر تۆشۈكچىلىرىنى كىچىكلىتىش ئۈچۈن، خانىم-قىزلار تۆۋەندىكى يېمەكلىكلەردىن پايدىلىنىپ باقسا، ئۈنۈمىنى كۆرۈشى مۇمكىن:
1. بانان، سۈت: ئاۋۋال بىر تال باناننى ئېزىپ، ئۇنىڭغا مۇۋاپىق مىقداردا سۈت قوشۇپ، يۈزگە تەكشى سۈرۈپ، 20 مىنۇت تۇرغۇزغاندىن كېيىن، يۈزىنى پاكىز يۇيۇۋەتسە، تېرىنى سىلىق ھەم پارقىراق قىلىدۇ.
2. تۇخۇم ئېقى: تۇخۇم ئېقى بىلەن ھەسەلنى تەكشى ئارىلاشتۇرغاندىن كېيىن، يۈزىگە سۈرۈپ بەرسە تېرىنى پارقىراق قىلىدۇ ھەم يۈزدىكى قورۇقلارنى ئازايتىدۇ.
3. زەرچىۋە پاراشوكى، سۈت: زەرچىۋە پاراشوكى بىلەن ھەسەلنى ئارىلاشتۇرۇپ يۈزگە سۈرۈپ بەرسە، ئاپتاپتا كۆيگەن داغنى يوقىتىپ، يۈزدىكى سېرىق تۈكلەرنى ئازايتىدۇ.
4. ئارپا، پىشلاق، پەمىدۇر شىرنىسى: ئارپا، پىشلاق، پەمىدۇر شىرنىسىنى ئارىلاشتۇرۇپ، يۈزگە تەكشى سۈرۈپ، 20 مىنۇت تۇرغۇزغاندىن كېيىن يۈزنى سوغۇق سۇدا يۇيۇۋەتسە، ئاپتاپتا كۆيۈپ كەتكەن تېرىنى ئەسلىگە كەلتۈرۈپ، تېرىنى پارقىراق قىلىدۇ.
5.بەرەڭگە پارچىسى: يۈزىدە سەپكۈن ۋە تاتۇق ئىزى بار خانىم-قىزلار خام بەرەڭگە پارچىسىنى يۈزىگە چاپلاپ بەرسە، سەپكۈن بىلەن تاتۇق ئىزىنى سۇسلاشتۇرىدۇ.
6. تەرخەمەك شىرنىسى: تەرخەمەك شىرنىسى ئەڭ ئېسىل تېرە چىڭىتىش سۇيۇقلۇقى ھېسابلىنىدۇ. ئۇنى يۈزگە تەكشى سۈرۈپ 15 مىنۇت تۇرغۇزغاندىن كېيىن يۇيۇۋەتسە، يۈزدىكى تەر تۆشۈكچىلىرىنى تارايتىدۇ.
7. چۈچۈك ئاپېلىسىن شەربىتى: چۈچۈك ئاپېلىسىن شەربىتى تەبىئىي ئاقارتقۇچى ئاگېنت بولۇپ، ئۇنى يۈزگە سۈرۈپ بەرسە، ئاپتاپتا كۆيۈپ كەتكەن تېرىنىڭ ئەسلىگە كېلىشىدە ئۈنۈمى ناھايىتى چوڭ بولىدۇ.
8. ھەسەل: ھەسەلنىڭ تېرىنى سىلىق، پاقىراق قىلىش ھەم قورۇقلارنى ئازايتىش رولى بار.
9. ماندارىن شەربىتى: ماندارىن شەربىتى مايلىق تېرىنىڭ ئەڭ ياخشى ئوزۇقلۇقى بولۇپ، تېرىسى مايلىق خانىم-قىزلار ئۇنى يۈزىگە سۈرۈپ بەرسە، تېرىدىكى ئارتۇق مايلارنىڭ ئاجرىلىپ چىقىرىلىشىنى كونترول قىلىدۇ.
10. مۇز پارچىسى: مۇز پارچىسى تەر تۈشۈكچىلىرىنى تارايتىدۇ ھەم قان ئايلىنىشنى ئىلگىرى سۈرىدۇ.
ــــ زۇلخۇمار ئوسمان تەييارلىغان
تۆۋەندىكى مەزمۇننى يانفۇنىڭىزدا دوستلىرڭىز بىلەن تەڭ بەھىرلىنىڭ !
