قىزلارنىڭ كۆڭلى زىيادە نازۇك كېلىدۇ.
شۇڭا قىزلار بىلەن ئارىلاشقاندا چوقۇم ئېھتىياتچان بولۇش كېرەك. مەقسەتسىز سادىر قىلغان بىرەر ئىشىڭىز ياكى دەپ سالغان بىرەر گېپىڭىزمۇ، قىزلارنىڭ بىر مۇنچە ھەسرەت ياشلىرىنىڭ تۆكۈلۈشىگە سەۋەب بولۇشى مۇمكىن. ئەكسىچە دەل جايىدا ئېيتىلغان بىر ئېغىز سۆز ئۇلارغا باھار ئاپتىپىدەك ئىللىقلىق يەتكۈزۈشىمۇ مۇمكىن. پەقەت چىن يۈرەكتىن چىققان مېھىر-مۇھەببەتلا قىزلارنىڭ كۆڭلىنى ئالالايدۇ.
قىزلارنىڭ ئىنتىلدىغىنى يىگىتلەردىكى جەسۇرلۇق، قەتئىيلىك، سېخىيلىق.
پىسخىلوگلار قىزلارنىڭ كۆڭلىدە يىگىتلەرنى باشقۇرۇشقا بولغان تەقەززالىق ئەمەس، بەلكى باشقۇرۇلۇشقا بولغان ئىنتىزارلىقنىڭ كۈچلۈكلىكىنى ئىسپاتلىدى. شۇڭا سىز مىس - مىس، سۆرەلمە بولماي، ۋۇجۇدىڭىزدا ئەركەكلەرگە خاس جەسۇرلۇقنى يېتىلدۈرۈپ خاسلىقىڭىزنى ۋە مۇستەقىل كۆز قارىشىڭىزنى ساقلاپ قېلىڭ؛ ھەرگىزمۇ «يۇمىلاق تاۋۇز» بولۇپ قالماڭ، بۇ قىزلار ئەڭ يىرگىنىدىغان ناچار قىلىق. ھەر ئىشنىڭ ئۆز يولى بار، زىيادە سېخىي بولماڭ، لېكىن بەك بېخىللىقمۇ قىلماڭ.
قىزلار يۇمۇرىستىك خاراكتېرگە ئىگە يىگىتلەرنى ياخشى كۆرىدۇ.
قىزلار مۇھەببەتنى ھەممىدىن ئەلا بىلىدۇ. ئۇلارنىڭ ئىزدەيدىغىنى خۇشاللىق، خاتىرجەملىك. پەقەت يۇمۇرىستىك خاراكتېرىگە ئىگە يىگىتلەرلا بۇ خىل ئېھتىياجنىڭ ھۆددىسىدىن چىقالايدۇ. شۇڭا ئۈمىدۋارلىق بىلەن ھاياتنى تۇرمۇشنى قىزغىن سۆيۈپ، غەم قايغۇنى ئۆزىڭىزگە يۈك قىلىۋالماڭ؛ جاپا مۇشەققەت ئالدىدا قەيسەرلىك بىلەن باتۇرلارچە ياشاڭ.
قىزلار گۈزەللىككە ئىنتىلىدۇ. گۈزەللىك تاشقى گۈزەللىك ۋە قەلىب گۈزەللىكىنى ئۆز ئىچىگە ئالىدۇ. قەلب گۈزەللىكى بىر ئادەمنىڭ ئىدىيىسى ۋە دۇنيا قارشى، غايىسى، مىجەز-خاراكتېرى، ئەخلاق پەزىلىتى قاتارلىقلارنى ئۆز ئىچىگە ئالىدۇ.
سىز بۇ ئىككى خىل گۈزەللىككە ئوخشاشلا ئەھمىيەت بېرىشىڭىز كېرەك. دۇنيادا مۇكەممەل ئادەم بولمايدۇ. لېكىن سىز ئۆزىڭىزنى ئۈزلۈكسىز ھالدا مۇكەممەللەشتۈرۈشكە تىرىشىڭ. ناچار قىلىق-ئادەتلىرىڭىزنى تاشلاپ زامانغا لايىق مەدىنيەتلىك يىگىت بولۇڭ. ئەي جەسۇر يىگىت، شۇنى بىلىشىڭىز كېرەككى، مۇھەببەت سىرلىق ھەم غايىۋى بولىدۇ. ئۇ سىزدىن مەسئۇليەتچانلىقنى، ئەستايىدىللىقنى ۋە سەۋىرچانلىقنى تەلەپ قىلىدۇ.
ئەسلى مەنبە: http://uy.ts.cn/life/content/2016-02/29/content_503282.htm
تۆۋەندىكى مەزمۇننى يانفۇنىڭىزدا دوستلىرڭىز بىلەن تەڭ بەھىرلىنىڭ !
