ئاۋسترالىيە يېڭى جەنۇبىي ۋېلش ئۇنىۋېرسىتېتى تەتقىقاتچىلىرىنىڭ ئەڭ يېڭى تەتقىقاتىدا كۆرسىتىلىشىچە, ئەرلەرنىڭ خىزمەت سىجىللىقى ئايالىنىڭ روھىي ھالىتىگە تەسىر كۆرسىتىدىكەن. خىزمەت ۋاقتى قانچە ئۇزۇن بولسا, ئايالىنىڭ بېسىمى شۇنچە چوڭ بولىدىكەن. تەتقىقاتچىلار ئىلگىرىكى «ئاۋسترالىيەلىكلەرنىڭ ۋاقىتتىن پايدىلىنىشىنى تەكشۈرۈش» سانلىق مەلۇماتى ئۈستىدە تەھلىل ئېلىپ بارغان. بۇ تەكشۈرۈشنىڭ ئوبيېكتى 756 جۈپ بالىسى بار ئاۋسترالىيەلىك ئەر-خوتۇن بولۇپ,بۇنىڭ ئىچىدە, تۆتتىن بىر قىسىم ئائىلىلەردە پەقەت ئەر كىشىلا خىزمەت قىلىدىكەن, يەنە تۆتتىن بىر قىسىم ئەر-خوتۇن ئىككىلىسى تەڭ خىزمەت قىلىدىكەن, قالغان يېرىم ئائىلىدە, ئېرى پۈتۈن كۈنلۈك خىزمەتچى, ئايالى قوشۇمچە خىزمەت قىلىدىكەن.
بارلىق ئەرلەر ئىچىدە, تەخمىنەن ئوندىن بىر قىسىم كىشىلەرنىڭ ھەر ھەپتىلىك خىزمەت ۋاقتى50 سائەتتىن ئېشىپ كەتكەن. تەكشۈرۈش ئوبيېكتلىرى ئايرىم-ئايرىم بەش قېتىم ئۆزلىرىنىڭ شۇ كۈنلۈك خىزمەت ئورۇنلاشتۇرۇشى ۋە بېسىم ھېس قىلىش قېتىم سانى قاتارلىقلارنى دوكلات قىلغان.
نەتىجىدە بايقىلىشىچە, ئەرلەرنىڭ خىزمەت ۋاقتى ھەر ھەپتىدە 50 سائەتتىن ئېشىپ كەتسە, ئاياللارنىڭ «ئالدىراش» ۋە «ئېغىر بېسىم» ھېس قىلىش ئېھتىماللىقى زور دەرىجىدە ئاشقان. شۇنىڭ بىلەن بىر ۋاقىتتا, ھەر خىل ئائىلە ئىشلىرىگە سەرپ بولغان ۋاقىتىمۇ كۆپەيگەن. ئاياللار خىزمەت قىلسىمۇ بۇ نەتىجە ئوخشاش بولغان. ئۇنىڭدىن باشقا, تەتقىقاتتا يەنە بايقىلىشىچە, %70 ئايال ۋە %62 ئەر داۋاملىق ئۆزلىرىنى بەك ئالدىراش ھېس قىلىدىكەن. بارلىق ئاياللار ھەر ھەپتىدە ئۆزىنى ئەركىن ھېس قىلىدىغان ۋاقتىنىڭ ئىككى سائەتتىن ئېشىپ كەتمەيدىغانلىقىنى ئېيتقان. بۇ يەردىكى ئازادە ۋاقىت ئۇلارنىڭ يالغۇز كىتاب كۆرۈش ياكى دوستلىرى بىلەن كۆرۈشۈش ۋاقتىنى كۆرسىتىدۇ.
تەتقىقاتچىلارنىڭ تەھلىل قىلىپ كۆرسىتىشىچە, يېقىندىن بېرى,ئائىلە چىقىمىنىڭ ئېشىشىغا ئەگىشىپ, كۆپ قىسىم ئائىلىلەر خىزمەت ۋاقتىنى ئۇزارتىش بېسىمغا دۇچ كەلگەن. لېكىن بۇ خىل ئەندىزە ئائىلە تۇرمۇشى ۋە ئائىلە ئەزالىرىنىڭ سالامەتلىكىگە زىيانلىق تەسىرلەرنى پەيدا قىلغان. بۇ مەسىلىنى ھەل قىلىشتا يالغۇز مەلۇم بىر ئادەمگىلا تايانسا بولمايدۇ. كۈنسېرى ئالدىراش ئۆتىۋاتقان تۇرمۇشتا, ئەر-خوتۇنلار ئۆز-ئارا پىكىر ئالماشتۇرۇشىغا مۇھتاج.
تۆۋەندىكى مەزمۇننى يانفۇنىڭىزدا دوستلىرڭىز بىلەن تەڭ بەھىرلىنىڭ !
