بىرلەشمە سەھەر گېزىتى تورىنىڭ 12-يانۋار خەۋىرى: ئىسرائىلىيە باش مىنىستىرى شارون 1-ئاينىڭ 11-كۈنى ئالەمدىن ئۆتكەندىن كېيىن، پەلەستىن ئىسلام قارشىلىق كۆرسىتىش ھەرىكىتى (خاماس) شاروننىڭ ئۆلىمى «تارىخىي پەيت» ئىكەنلىكىنى ئېيتقان.
رېيترس ئاگېنتلىقى خاماسنىڭ باياناتچىسى سەمى ئەبۇنىڭ سۆزىنى نەقىل قىلغان بولۇپ، سەمى ئەبۇ:«بۇ قەبىھ پادىشاھ ئۆلدى، بىزنىڭ غەلبە قىلىشقا تېخىمۇ ئىشەنچىمىز بار. بۇ قەبىھ جىنايەتچىنىڭ ئىككى قولى خەلقىمىز ۋە رەھبەرلىرىنىڭ ئىسسىق قېنى بىلەن بويالغان. ئۇ بۈگۈن ئۆلدى، خەلقىمىز قاتتىق خۇشال بولدى» دېگەن.
خاماسنىڭ باشقا بىر باياناتچىسى سالىھ بەداۋىينىڭ دېيىشىچە، شارون پەلەستىن خەلقىگە پەقەت «ئازاب-ئوقۇبەت، قان-ياش، قىيىن-قىستاق، سەرسانلىق» ئەسلىمىسى قالدۇرغان، شۇڭا ئۇ «دوزاخقا كىرىشى» كېرەك ئىكەن.
پەلەستىن مىللىي ئازادلىق ھەرىكىتى (فاتاخ) نىڭ يۇقىرى دەرىجىلىك ئەمەلدارى جىبرىل رەجەب شاروننى پەلەستىننىڭ سابىق پرېزىدېنتى ياسىر ئەرافاتنى قەسلەپ ئۆلتۈرۈشكە بۇيرۇق چۈشۈردى، ئۇ جىنايەتچى، خەلقئارا جىنايى ئىشلار سوتىغا تاپشۇرۇپ بېرىلىشى كېرەك دەپ قارىغان.
بىر قىسىم پەلەستىن ئاممىسى يولدىن ئۆتكەنلەرگە كەمپۈت تارقاتقان، بەزىلەر شاورننىڭ سۈرىتىنى كۆيدۈرگەن، دەسسىگەن.
لىۋاندا، ئەينى يىلى بېيرۇت مۇساپىرلار لاگىرى پاجىئەسىدە ھايات قالغانلار شاروننىڭ جىنايىتى بار، جازاغا تارتىلىشى كېرەك دەپ قارىغان.
پەلەستىن ئاممىسى دېيىشىچە، بارلىق ئەرەبلەر ھەمدە قاماقتىكى پەلەستىنلىكلەر ۋە ئۇلارنىڭ ئائىلە-تاۋابىئاتلىرى شاروننىڭ ئۆلىمىدىن خۇشال بولغان.
تەرجىمىدە: نەپرەت
