2010-يىلى 6-ئايدا مەن ئۆزبېكىستانغا بارغاندا ئۆزبېكچە لاتىن ۋە سىلاۋىيان ئېلىپبەسىنى سېتىۋالغان ئىدىم، يەرمەنكە جەريانىدا ئۆزبېكچە لاتىن ۋە سىلاۋىيان يېزىقلىرىنى ئۆز-ئارا ئالماشتۇرىدىغان پىروگرامما يازغان ئىدىم، كېيىن ئۇنى يەنى 2011-يىلى 3-ئايدا ھەقسىز قورال قىلىپ تارقاتتىم. مانا بىرنەچچە كۈن ئىلگىرى شۇ پىروگراممىنى 8 Windows دۇكىنىغا لايىق ئۆزگەرتىپ يوللاپ باقسام، نەچچە سائەت ئىچىدە جاۋاب كەلدى، شۇنداق قىلىپ بۇ 2-ئۇيغۇرچە ئەپ بىرلا قېتىمدا تەستىقلاندى. بۇمۇ ئەلۋەتتە ھەقسىز، ئەتىدىن باشلاپ رەسمىي چۈشۈرۈشكە تەمىنلىنىدۇ، خاتىرجەم ئىشلىتىڭلار.

بۇ پىروگرامما بەكلا ئاددىي، زاڭلىق قىلماڭلار. مەن Windows دۇكىنىغا ئەپ ياساشنى ۋە يوللاشنى مەشىق قىلىۋاتىمەن. لېكىن ۋاقتىدا كەلگەندە سىلاۋىيان يېزىقى ئاساسىدىكى ئۆزبېكچىنى بۇ قورال ئارقىلىق ئۇيغۇرچە ھەرپلەرگە ئالماشتۇرۇپ كۆرسىڭىز، تېخىمۇ راۋان ئوقۇيالايسىز.

بەلكىم يەنە بىرنەچچە سائەت ئىچىدە چۈشۈرۈش ئۇلانمىسىنى تەمىنلىشى مۇمكىن، ئارايۈزىنى مەن خەنزۇچە قىلدىم، كېيىن يەنە ئىنگلىزچە ئارايۈزلۈك ئەپ يوللاپ، ئاندىن 3 تىل ئارىسىدا خالىغانچە ئۆزگەرتىشكە بولىدىغان ئىقتىدارلارنى پىششىق ئۆگەنگەندىن كېيىن، ئاندىن كۆپچىلىك دېگەندەك باشقا ئەپلەرنىمۇ ئېلان قىلىشقا تىرىشىمىز. بۇ ھازىرچە مەشىق ئەپ بولۇپ، تەكلىپ-پىكىر بېرىشىڭلارنى قارشى ئالىمەن.

دىققەت بۇ ئەپ ھەرگىزمۇ ئۇيغۇرچىغا تەرجىمە قىلمايدۇ، پەقەت ئۆزبېكچە ھەرپلەرنى ئۇيغۇرچە ماس ھەرپلەرگە ئالماشتۇرۇپ بېرىدۇ، بۇ يەنىلا ئۇيغۇرچە ھەرپلەر بىلەن يېزىلغان ئۆزبېكچە ھېسابلىنىدۇ، ئەمما ئۇيغۇرچە-ئۆزبېكچە ئارىسىدا ماشىنا تەرجىمانى ياساش باشقا تىللارغا قارىغاندا ھەقىقەتەنمۇ كۆپ ئاددىي.

بۇ ئەپنى چۈشۈرۈش ئۈچۈن Windows دۇكىنىدىن «قوراللار»غا كىرىپ، ئەڭ يېڭى ئېلان قىلىنغان ئەپلەر تىزىملىكىگە قارىسىڭىزلا بولىدۇ، ياكى ئىزدەش ئۈچۈن ھالقىلىق سۆزلەرگە Uyghur, Uzbek, ئۇيغۇر، ئۇيغۇرسوفت، 维吾尔،…دېگەندەك سۆزلەرنى كىرگۈزۈپمۇ تاپالايسىز.

• يازما كۆرۈلۈشى: 7,339 قېتىم
• يوللانـغان ۋاقىت:2013-يىلى 07-ئاينىڭ 19-كۈنى pm 23:19
• ئالدىنقى يازما :Windows دۇكىنىدا تۇنجى ئۇيغۇرچە ئەپ ئېلان قىلىندى
• كېيىنكى يازما :مىكروسوفت ھېيتلىق ئەۋەتىپتۇ