ئەسلىدە كەسپىي ساھەدە مۇۋاپىقىيەت قازىنالمايدۇ دەپ قارالغان مەھسۇلات iPad مۇ بازارغا سېلىنغاندىن كېيىن ئىزچىل ياشلارنىڭ ياخشى كۆرىشىگە ئېرىشتى، بۇنىڭ ئارىسىدا ھەتتا ئوقۇغۇچىلارمۇ بار. ئوقۇغۇچىلارنىڭ تەتىلىمۇ توشتى، بەلكىم بىر قىسىم ئوقۇغۇچىلار تەتىلدە ئىشلەپ تاپقان، ئاتا-ئانىسى بەرگەن پۇللارنى يىغىپ iPad ،iPhone دېگەندەك مەھسۇلاتلارنى سېتىۋالماقچى بولۇۋاتقان بولۇشى مۇمكىن. يېقىندا، چەتئەل ئاخبارات ۋاستىلىرىنىڭ باياناتىدا كۆرسىتىلىشىچە، iPad ئوقۇغۇچىلارغا ماس كەلمەيدىكەن، بۇنىڭ سەۋەبى تۆۋەندىكىدەك…

1. ئۇنىڭ باھاسى قىممەت

ئەڭ ئەرزان 16G لىق WiFi قوللايدىغان iPad نىڭ باھاسى 499 ئامېرىكا دوللىرى(جۇڭگودىكى باھاسى 3400 سوملار ئەتراپىدا)، 64G لىق 3G قوللايدىغان نۇسخىسى بولسا 829 ئامېرىكا دوللىرى. بۇ باھا خېلى كىشىلەر ئۈچۈن ئۇنچە ئاسان قوبۇل قىلغىلى بولىدىغان باھا ئەمەس، بولۇپمۇ ئوقۇغۇچىلارغا تېخىمۇ شۇنداق.

2. ئۇ خاتىرە قالدۇرۇشتا ياكى ماتېرىيال تەھرىرلەشتىكى ئەڭ ياخشى تاللاش ئەمەس

iPad تە تەمىنلەنگىنى مەۋھۇم كۇنۇپكا تاختىسى، تېز سۈرئەتتە خەت كىرگۈزۈش ياكى ماتېرىيال بىر تەرەپ قىلىشقا ماس كەلمەيدۇ.

3. ئۇ ئاسانلا زېھنىڭىزنى بۆلىۋېتىدۇ

iPad تە ھەرخىل پەيزى ئويۇن، كىنو، ناخشا-مۇزىكا، پاراڭلىشىش قوراللىرى، مىكروبلوگ دېگەندەك نەرسىلەر بولىدۇ، سىز ناھايىتى تېزلا بۇ ئەسلىدە سىزنىڭ ئۆگىنىش ۋە باشقا خىزمەت ئىشلىرىڭىز بىلەن قىلچە مۇناسىۋىتى يوق ئىشلارغا باغلىنىپ قېلىشىڭىز مۇمكىن.

4. ئۇنى ئېلىپ يۈرۈش بەك قولاي، شۇ سەۋەپتىن ئاسانلا بۇزۇلۇپ كېتىشى مۇمكىن

iPad ئىنتايىن نېپىز ۋە ئېلىپ يۈرۈش قولاي بىر نەرسە، شۇڭا دائىم ئۇنى يېنىڭىزدا ئېلىپ يۈرگىڭىز كېلىشى ئېنىق. بىراق، دەل شۇ سەۋەپتىن ئۇنىڭ سۈركىلىش، ئۇپراش ۋە چۈشۈپ كېتىشتەك سەۋەپلەر تۈپەيلى بۇزۇلۇش پۇرسىتى كۆپ بولىدۇ، ناۋادا شۇنداق بولۇپ قالسا، بىر مۇنچە ئىقتىسادى ۋە روھىي زىيان تارتىۋېلىشىڭىز مۇمكىن.

5. iPad ناھايىتى ئاسانلا ئوغرىلىنىدۇ

iPad نىڭ ئوغرىلارغا بولغان سېھرى كۈچى، ئادەتتىكى كىشىلەرنىڭ iPad كە بولغان قىزىقىشىدىن ھەرگىزمۇ كەم ئەمەس، ھەتتا ئۇنىڭدىنمۇ كۈچلۈك. شۇڭا iPad سېتىۋالسىڭىز، مەكتەپ، ئىشخانا ياكى كوچىلار دېگەندەك ئادەم جىق توپلاشقان جايدا، ئۇنىڭ بىخەتەرلىكى ئېغىر تەھدىتكە ئۇچرايدۇ، سىز تېخىمۇ كۆپ زېھىن سەرپ قىلىپ ئۇنى قوغدىشىڭىز كېرەك.

6. iPad سىزنى يالغۇز قويۇشى مۇمكىن

iPad كە مەپتۇن بولۇپ كىرىپ كەتكەن شۇ چاغلىرىڭىزدا، بەلكىم باشقا دوستلىرىڭىز سىرتلاردا تېخىمۇ مۇھىم ئىشلار بىلەن ئالدىراش بولۇشى ياكى مەلۇم جايدا كۆڭۈل ئېچىۋاتقان بولۇشى مۇمكىن، iPad بىلەن ھەپىلىشىپ يۈرۈش ياندىكى دوستلىرىڭىزنى نەزەردىن ساقىت قىلىپ قويۇشىڭىزمۇ مۇمكىن. ناۋادا بۇ ئەھۋال داۋاملاشسا، سىزدە بارغانسىرى ئادەم خالىمايدىغان، رېئاللىقتىن ئايرىلىپ ياشايدىغان خاراكتېر شەكىللىنىپ قالىدۇ.

7. iPad تىكى ماتېرىياللارنىڭ ھەممىسى ھەقسىز ئەمەس

iPad نى سېتىۋالغاندىن كېيىن، گەرچە سىزنىڭ خىزمەت ۋە ئۆگىنىشىڭىزگە نۇرغۇن جەھەتتىن قولايلىقلارنى ئېلىپ كەلسىمۇ، ئەمما ئۇنىڭ ئىچىدىكى قوللانمىلار، كىتابلار، ئوقۇشلۇقلار ھەرگىزمۇ ھەقسىز ئەمەس. سىز يەنە ئاز بولمىغان ئىقتىساد سەرپ قىلىپ ئۆگىنىش ۋە خىزمەت ئېھتىياجىڭىزنى قامدىشىڭىز كېرەك.

8. ئۇ بىر خىل شۆھرەتپەسلىكنىڭ سىموۋولى بولۇپ قالدى

iPad نى سېتىۋالغان نۇرغۇن كىشىلەر ئۇنىڭ ئەمەلىي قوللىنىشچانلىقىغا قارىغاندا، iPad ئىشلىتىشنى بىر خىل نوپۇز ۋە ئىمتىياز دەپ قاراپ، مودا قوغلىشىپ سېتىۋالىدىغان ئەھۋال شەكىللەندى. سىز iPad نى ھەقىقەتەن قوللىنىش قىممىتى يۇقىرى مەھسۇلات دەپ قارامسىز؟

9. سىز سېتىۋالغان iPad قولىڭىزغا تەگكەندە ئاللىقاچان ۋاقتى ئۆتكەن بولۇشى مۇمكىن

ئالما مەھسۇلاتلىرىنىڭ يېڭىلىنىش سۈرئىتىنىڭ تېزلىكىگە قارىماي، بىر يېڭى مەھسۇلاتنى زاكاس قىلىپ سېتىۋېلىش ئۈچۈنمۇ خېلى ساقلايدىغان گەپ. بۇنى ئەلۋەتتە، يەرشارىدىكى ئالما قىزغىنلىقى كەلتۈرۈپ چىقارغان بىر ئامىل دېيىشكە بولىدۇ. شۇ سەۋەپتىن، بەلكىم سىز يېڭى بىر iPad سېتىۋالسىڭىز، ئاللىقاچان يېڭى ئەۋلاد iPad بازارغا سېلىنىش ئالدىدا تۇرغان بولۇشى مۇمكىن.

10. iPad سېتىۋالغاندىن كېيىن، سىز يەنىلا بىر دانە كومپيۇتېرغا ئېھتىياجلىق بولىسىز

iPad سېتىۋالغاندىن كېيىن شۇنى بايقايسىز، گەرچە سىزدە iPad بولسىمۇ، سىز يەنىلا بىر كومپيۇتېرغا ئېھتىياجلىق بولىسىز، چۈنكى نۇرغۇن خىزمەتلەرنى قىلىشتا iPad ماس كېلىپ كەتمەيدۇ.

تورداش «زۇليار»نىڭ تەمىنلىگەن ئەسىرىگە كۆپتىن كۆپ رەھمەت ئېيتىمەن! ناۋادا، سىزمۇ تورخۇمارغا ئۆزىڭىزنىڭ ھەرخىل ئەسەرلىرىنى چىقارماقچى بولسىڭىز، بۇ يەرنى بېسىڭ.

تەدبىركاردىن قوشۇمچە:

يۇقارقى كۆز قاراشلار گەرچە ئورۇنلۇقتەك بىلىنسىمۇ، بىراق ئۆز-ئۆزىگە تەسەللىي بېرىش، قەستەن كەمسىتىشتەك كۆز-قاراشلارمۇ يوق ئەمەس. تەدبىركارمۇ كۆپچىلىكنىڭ ئەمەلىي ئېھتىياجىغا ئاساسەن سېتىۋېلىش سېتىۋالماسلىقنى ئويلىشىشىنى تەۋسىيە قىلىدۇ. ئەگەر ماڭا iPad سېتىۋالماسلىققا بىر باھانە كۆرسەت دېسە، ئۇنداقتا مەن 11-سەۋەپ قىلىپ، ئەتراپىمدا تېخى قويۇق سىمسىز تورغا چىقىش مۇھىتى(WiFi) ھازىرلانمىغانلىقىنى كۆرسىتىشىم مۇمكىن.