ﺋﯩﺪﺍﺭﯨﻤﯩﺰﺩﻩ ﺑﯩﺮ «ﺋﯘﺯﯗﻥ ﻗﯘﻻﻕ» ﺧﯩﺰﻣﻪﺗﺪﯨﺸﯩﻤﯩﺰ ﺑﻮﻟﯘﭖ ، ﮬﯧﭽﻜﯩﻢ ﺋﺎﯕﻠﯩﻤﯩﻐﺎﻥ ﻳﯧﯖﯩﻠﯩﻘﻼﺭﻧﻰ ﺷﯘ ﺋﺎﯕﻼﻳﺘﺘﻰ. ﻛﯩﻤﻨﯩﯔ ﻣﻪﻧﺴﯩﭙﻰ ﺋﯚﺳﺘﻰ ، ﻛﯩﻤﻨﯩﯔ ﭼﯜﺷﺘﻰ ، ﻗﺎﻳﺴﻰ ﺑﺎﺷﻠﯩﻖ ﻧﻪﮔﻪ ﻳﯚﺗﻜﻪﻟﺪﻯ ، ﻛﯩﻢ ﭘﯩﻨﺴﯩﻴﮕﻪ ﭼﯩﻘﺘﻰ ، ﻗﻪﻳﻪﺭﺩﻩ ﻧﯧﻤﻪ ﺋﯩﺶ ﺑﻮﻟﺪﻯ ، ﺩﯗﻧﻴﺎ ﯞﻩﺯﯨﻴﺘﯩﺪﻩ ﻗﺎﻧﺪﺍﻕ ﺋﯚﺯﮔﯩﺮﯨﺶ ﺑﺎﺭ... ﺋﯩﺸﻘﯩﻠﯩﭗ ﮬﻪﻣﻤﯩﺴﻰ ﺋﯘﻧﯩﯔ ﻧﻪﺯﯨﺮﺩﯨﻦ ﻗﯧﭽﯩﭗ ﻗﯘﺗﯘﻻﻟﻤﺎﻳﺘﺘﻰ. ﮬﻪﺭ ﺩﯛﺷﻪﻧﺒﻪ ﻛﯜﻧﻰ ﺑﯩﺰﻧﻰ ﺑﯩﺮ ﻳﯧﯖﻰ ﺧﻪﯞﻩﺭ ﺑﯩﻠﻪﻥ ﺗﻪﻣﯩﻨﻠﻪﭖ ﺗﯘﺭﺍﺗﺘﻰ. ﺋﺎﯕﻠﯩﺴﺎﻡ ، ﺋﯘ ﻣﻪﮬﻪﻟﻠﯩﺴﯩﺪﯨﻤﯘ ﻣﻪﻳﻠﻰ ﭼﻮﯓ ، ﻣﻪﻳﻠﻰ ﻛﯩﭽﯩﻚ ﺩﯦﻤﻪﻱ ، ﺗﯚﺕ ﺋﺎﺩﻩﻡ ﻳﯩﻐﯩﻠﯩﭗ ﭘﺎﺭﺍﯕﻼﺭﺷﻘﺎﻥ ﻳﻪﺭﮔﻪ ﺑﯧﺮﯨﯟﺍﻟﯩﺪﯨﻜﻪﻥ . ﺑﯩﺰﻣﯘ ﺋﯘﻧﯩﯔ ﺑﯘ ﻣﯩﺠﻪﺯﯨﮕﻪ ﻛﯚﻧﯜﻙ ﺑﻮﻟﻐﺎﭼﻘﺎ ، ﮬﻪﺭ ﺩﯛﺷﻪﻧﺒﻪ ﻛﯜﻧﻰ ﺋﯘﻧﯩﯔ ﺋﺎﻏﯩﺰﯨﻨﻰ ﺗﺎﺗﯩﻼﭖ ، ﺑﯩﺮﻩﺭ ﻳﯧﯖﻰ ﮔﻪﭖ ﺋﺎﯕﻠﯩﻤﺎﻱ ﻗﺎﻟﻤﺎﻳﺘﺘﯘﻕ . ﻣﯘﻧﺪﺍﻗﭽﻪ ﺋﯧﻴﺘﻘﺎﻧﺪﺍ، ﺋﯘ ﺑﯩﺰﻧﯩﯔ ﺋﯘﭼﯘﺭ ﺋﺎﻣﺒﯩﺮﯨﻤﯩﺰ ﺋﯩﺪﻯ.
      ﻳﯧﻘﯩﻨﺪﺍ ، ﺑﯘ ﺧﯩﺰﻣﻪﺗﺪﯨﺸﯩﻤﻨﯩﯔ ﺋﺎﻏﯩﺰﯨﺪﯨﻦ ﻳﻪﻧﻪ ﻣﯘﻧﺪﺍﻕ ﺑﯩﺮ ﻳﯧﯖﻰ ﺧﻪﯞﻩﺭﻧﻰ ﺋﺎﯕﻼﭖ ﻗﺎﻟﺪﯨﻢ . ﺑﯘ ، ﻣﻪﻟﯘﻡ ﺷﻪﮬﻪﺭﺩﯨﻜﻰ ﺧﯧﻠﻰ ﺩﺍﯕﻘﻰ ﺑﺎﺭ ﺑﯩﺮ ﺭﯦﺴﺘﯘﺭﺍﻧﺪﺍ ﻳﯜﺯ ﺑﻪﺭﮔﻪﻥ ﺋﯩﺶ ﺋﯩﻜﻪﻥ :
   ﺭﯦﺴﺘﯘﺭﺍﻧﺪﺍ 45 ﻳﺎﺷﺘﯩﻦ ﺋﺎﺷﻘﺎﻥ ﺋﺎﻟﺘﻪ ﺋﻪﺭ ﺑﯩﺮ ﺷﯩﺮﻩﺩﻩ ﺋﻮﻟﺘﯘﺭﯗﭖ ﮬﺎﺭﺍﻗﻨﯩﯔ ﻛﯜﭼﻰ ﺑﯩﻠﻪﻥ ﺭﺍﺳﺎ ﻗﯩﺰﯨﭙﺘﯘ ﯞﻩ ﻳﻪﻧﻪ ﺑﯩﺮ ﺷﯩﺮﻩﺩﯨﻜﻰ ﻗﯩﺰﻻﺭﻏﺎ ﻗﺎﺭﺍﭖ ، ﺋﯘﻻﺭ ﺑﯩﻠﻪﻥ ﺗﺎﻧﺴﺎ ﺋﻮﻳﻨﺎﭖ ﻛﯚﯕﯜﻝ ﺋﯧﭽﯩﺸﻨﯩﯔ ﭘﯩﻼﻧﯩﻨﻰ ﺗﯜﺯﯛﭘﺘﯘ . ﺋﯘﻻﺭ ﺑﯩﺮ - ﺑﯩﺮﯨﻨﻰ :«ﺳﻪﻥ ﺑﯧﺮﯨﭗ ﺩﻩﭖ ﺑﺎﻕ ، ﺳﻪﻥ ﺑﯧﺮﯨﭗ ﺩﻩﭖ ﺑﺎﻕ » ﺩﯦﻴﯩﺸﯩﭗ ، ﺋﺎﺧﯩﺮ ﺋﺎﺭﯨﺪﯨﻦ ﻗﯩﺰ - ﺋﺎﻳﺎﻟﻼﺭﻏﺎ ﮔﻪﭖ ﻗﯩﻠﯩﺸﺘﺎ ﺋﯚﺯﯨﻨﻰ «ﻳﯜﺭﻩﻛﻠﯩﻚ» ﺳﺎﻧﺎﻳﺪﯨﻐﺎﻥ ﺑﯩﺮﻯ ﻗﯩﺰﻻﺭﻧﯩﯔ ﻳﯧﻨﯩﻐﺎ ﺑﯧﺮﯨﭗ ، ﺋﯚﺯﯨﻨﯩﯔ ﻣﻪﻗﺴﯩﺘﯩﻨﻰ ﺋﯧﻴﺘﯩﭙﺘﯘ . ﺋﯘ ﺷﯩﺮﻩﺩﯨﻜﻰ ﻗﯩﺰﻻﺭﻣﯘ ﺋﻮﻳﯘﻥ ﺩﯦﺴﻪ ﺟﯧﻨﯩﻨﻰ ﺑﯧﺮﯨﺪﯨﻐﺎﻧﻼﺭﺩﯨﻦ ﺑﻮﻟﻐﺎﭼﻘﺎ ، ﺑﯘ ﭘﯘﺭﺳﻪﺗﻨﻰ ﻗﻮﻟﺪﯨﻦ ﺑﻪﺭﮔﯜﺳﻰ ﻛﻪﻟﻤﻪﭘﺘﯘ . ﻟﯧﻜﯩﻦ ﺋﻪﺭﻟﻪﺭﻧﯩﯔ ﺋﺎﻟﺘﻪ، ﺋﯚﺯﻟﯩﺮﯨﻨﯩﯔ ﺑﻪﺵ ﺋﯩﻜﻪﻧﻠﯩﻜﯩﻨﻰ ﻛﯚﺭﯛﭖ ﺩﻩﺭﮬﺎﻟﻼ ﺑﯩﺮ ﻧﯧﻤﻪ ﺩﯦﻴﻪﻟﻤﻪﻱ ، ﮬﯧﻠﯩﻘﻰ ﺋﻪﺭﻧﯩﯔ ﺗﯧﻠﯧﻔﯘﻧﯩﻨﻰ ﺋﯧﻠﯩﭗ ﺑﯩﺮ ﻗﯩﺰﻏﺎ ﺩﻩﺭﮬﺎﻝ ﺋﯚﺯﻯ ﺋﻮﻟﺘﯘﺭﻏﺎﻥ ﺭﯦﺴﺘﯘﺭﺍﻧﻐﺎ ﻛﯧﻠﯩﺸﻨﻰ ﺋﯧﻴﺘﯩﭗ ﺗﯧﻠﯧﻔﯘﻥ ﺋﯘﺭﯗﭘﺘﯘ . ﺋﻪﺭ ﺗﯧﻠﯧﻔﯘﻧﻨﻰ ﺋﯧﻠﯩﭗ ﺋﺎﻏﯩﻨﯩﻠﯩﺮﯨﻐﺎ ﺋﯩﺸﻨﯩﯔ ﭘﯜﺗﻜﻪﻧﻠﯩﻜﯩﻨﻰ ﺋﯧﻴﺘﯩﭗ ، ﺋﯚﻳﯩﮕﻪ ﺗﯧﻠﯧﻔﯘﻥ ﻗﯩﻠﯩﺶ ﺋﯜﭼﯜﻥ ﺷﺎﯞﻗﯘﻧﻠﯘﻕ ﺭﯦﺴﺘﯘﺭﺍﻧﺪﯨﻦ ﮬﺎﺟﻪﺗﺨﺎﻧﯩﻐﺎ ﻛﯩﺮﯨﭗ ﺗﯧﻠﯧﻔﯘﻧﻨﻰ ﺋﺎﭼﺴﺎ ، ﺑﺎﻳﺎ ﮬﯧﻠﯩﻘﻰ ﻗﯩﺰ ﺋﯘﺭﻏﺎﻥ ﺗﯧﻠﯧﻔﯘﻧﻨﯩﯔ ﺋﯚﺯﯨﻨﯩﯔ ﺋﯚﻳﯩﻨﯩﯔ ﺗﯧﻠﯧﻔﯘﻧﻰ ﺋﯩﻜﻪﻧﻠﯩﻜﯩﻨﻰ ﺑﺎﻳﻘﺎﭘﺘﯘ ﯞﻩ ﺩﻩﺭﮬﺎﻝ ﺋﯚﻳﮕﻪ ﺗﯧﻠﯧﻔﯘﻥ ﺋﯘﺭﯗﭖ ، ﺋﺎﻳﺎﻟﯩﺪﯨﻦ ﻗﯩﺰﯨﻨﯩﯔ ﺋﯚﻳﺪﻩ ﺑﺎﺭ - ﻳﻮﻗﻠﯘﻗﯩﻨﻰ ﺳﻮﺭﺍﭘﺘﯘ . ﺋﺎﻳﺎﻟﻰ ﮬﯧﻠﻰ ﺑﯩﺮ ﺩﻭﺳﺘﯩﺪﯨﻦ ﺗﯧﻠﯧﻔﯘﻥ ﻛﯧﻠﯩﭗ ﭼﯩﻘﯩﭗ ﻛﻪﺗﻜﻪﻧﻠﯩﻜﯩﻨﻰ ﺋﯧﻴﺘﯩﭙﺘﯘ . ﮬﯧﻠﯩﻘﻰ ﺋﻪﺭ ﮬﺎﺟﻪﺗﺨﺎﻧﯩﺪﯨﻦ ﭼﯩﻘﯩﭗ ﻗﺎﺭﯨﺴﺎ ، ﺋﯚﺯﯨﻨﯩﯔ ﻗﯩﺰﻯ ﻛﯜﻟﻜﻪ - ﭼﺎﻗﭽﺎﻕ ﺑﯩﻠﻪﻥ ﮬﯧﻠﯩﻘﻰ ﻗﯩﺰﻻﺭﻧﯩﯔ ﺋﺎﺭﺳﯩﺪﺍ ﺋﻮﻟﺘﯘﺭﻏﯘﺩﻩﻙ . ﺋﻪﺭ ﻧﯧﻤﻪ ﻗﯩﻠﯩﺸﻨﻰ ﺑﯩﻠﻪﻟﻤﻪﻱ ، ﻗﺎﺗﺘﯩﻖ ﺋﯩﺰﺍ- ﺋﺎﮬﺎﻧﻪﺕ ﯞﻩ ﯞﯨﺠﺪﺍﻥ ﺋﺎﺯﺍﺑﻰ ﺑﯩﻠﻪﻥ ﺭﯦﺴﺘﯘﺭﺍﻧﺪﯨﻦ ﭼﯩﻘﯩﭗ ﻛﯧﺘﯩﭙﺘﯘ . ﺋﺎﺭﻗﯩﺴﯩﺪﯨﻦ ﻧﯧﻤﻪ ﺋﯩﺶ ﺑﻮﻟﻐﺎﻧﻠﯩﻘﯩﻨﻰ ﺑﯩﻠﯩﺶ ﺋﯜﭼﯜﻥ ﺑﯩﺮ ﺋﺎﻏﯩﻨﯩﺴﻰ ﭼﯩﻘﯩﭗ ﺳﻮﺭﯨﻐﺎﻧﺪﺍ ، ﮬﯧﻠﯩﻘﻰ ﺋﻪﺭ ﺩﻩﻣﺎﻟﻠﯩﻘﻘﺎ ﺑﺎﺷﻘﺎ ﮔﻪﭖ ﺗﺎﭘﺎﻟﻤﺎﻱ ﺭﺍﺳﺖ ﮔﻪﭘﻨﻰ ﺋﯧﻴﺘﯩﭙﺘﯘ .
<< ﺋﯘﺯﯗﻥ ﻗﯘﻻﻕ >> ﺧﯩﺰﻣﻪﺗﺪﯨﺸﯩﻤﻨﯩﯔ ﺗﯧﭙﯩﭗ ﻛﻪﻟﮕﻪﻥ ﺑﯘ ﺧﻪﯞﯨﺮﻯ ﻣﻪﻳﻠﻰ ﺭﺍﺳﯩﺖ ﻳﺎﻛﻰ ﻳﺎﻟﻐﺎﻥ ﺑﻮﻟﺴﯘﻥ ، << ﺭﻩﯕﻠﯩﻚ ﺋﻮﻟﺘﯘﺭﯗﺵ >> ﺋﻪﯞﺝ ﺋﯧﻠﯩﭗ ﻛﯧﺘﯩﯟﺍﺗﻘﺎﻥ ، ﺑﯩﺮ ﻗﯩﺴﯩﻢ ﺋﻪﺭﻟﻪﺭ ﺋﯚﺯﯨﻨﯩﯔ ﻗﯩﺰﻯ ﺑﯩﻠﻪﻥ ﺗﻪﯓ ﺩﯦﻤﻪﺗﻠﯩﻚ ﻗﯩﺰﻻﺭ ﺑﯩﻠﻪﻥ ﻛﯚﯕﯜﻝ ﺋﯧﭽﯩﯟﺍﺗﻘﺎﻥ ، ﺋﺎﻟﯩﻲ ﻣﻪﻛﺘﻪﭘﺘﻪ ﺋﻮﻗﯘﯞﺍﺗﻘﺎﻥ ﺋﺎﻳﺮﯨﻢ ﻗﯩﺰ ﺋﻮﻗﯘﻏﯘﭼﯩﻼﺭ ﭘﯘﻟﻨﻰ ﺩﻩﭖ ﺩﺍﺩﯨﺴﻰ ﺩﯦﻤﻪﺗﻠﯩﻚ ﺋﻪﺭﻟﻪﺭ ﺑﯩﻠﻪﻥ ﺋﯩﭻ- ﭘﻪﺵ ﺗﺎﺭﺗﯩﺸﯩﯟﺍﺗﻘﺎﻥ ﺑﯜﮔﯜﻧﻜﻰ ﻛﯜﻧﺪﻩ ، ﺑﯘ ﺧﻪﯞﻩﺭﻧﯩﯔ ﺭﯨﺌﺎﻝ ﺋﺎﺳﺎﺳﻰ ﺑﺎﺭﻟﯩﻘﯩﻐﺎ ﺋﯩﺸﻪﻧﻤﻪﻱ ﺑﻮﻟﻤﺎﻳﺪﯗ. ﭼﯜﻧﻜﻰ ، ﺑﯩﺰ ﺟﻪﻣﺌﯩﻴﻪﺗﺘﻪ ﺑﯘﻧﺪﺍﻕ ﺋﯩﺸﻼﺭﻧﻰ ﺋﯚﺯ ﻛﯚﺯﯨﻤﯩﺰ ﺑﯩﻠﻪﻥ ﻛﯚﺭﯛﭖ ﺗﯘﺭﯨﻤﯩﺰ ﯞﻩ ﻛﯚﭖ ﻳﻮﻟﯘﻗﯘﭖ ﺗﯘﺭﯨﻤﯩﺰ. ﺑﯩﺰﻩ : << ﻗﺎﺷﻘﺎ ﺳﺎﻧﯩﺴﺎﯓ ﻛﯚﺯﯛﯕﮕﻪ ، ﻛﯩﺸﯩﮕﻪ ﺳﺎﻧﯩﺴﺎﯓ ﺋﯚﺯﯛﯕﮕﻪ >> ﺩﯦﮕﻪﻥ ﻣﺎﻗﺎﻝ ﺑﺎﺭ. ﮬﻪﻣﻤﯩﻤﯩﺰﻧﯩﯔ ﺋﺎﺋﯩﻠﯩﺴﯩﺪﻩ ﻗﯩﺰ ﯞﻩ ﺋﺎﻳﺎﻝ ﺯﺍﺗﻰ ﺑﻮﻟﻐﺎﻧﯩﻜﻪﻥ ، ﺟﻪﻣﺌﯩﻴﻪﺗﻨﯩﯔ ﻗﺎﻧﭽﯩﻠﯩﻚ << ﻣﻪﺩﻩﻧﯩﻴﻪﺗﻠﯩﺸﯩﭗ >> ﻛﯧﺘﺸﯩﺪﯨﻦ ﻗﻪﺗﺌﯩﻴﻨﻪﺯﻩﺭ ، ﺋﯚﺯﯨﻤﯩﺰﻧﯩﯔ ﺋﻪﺧﻼﻗﯩﻨﻰ ﺳﺎﻗﻼﭖ ﻳﯜﺭﻩﻳﻠﻰ ، ﭼﯜﻧﻜﻰ ﮬﻪﺭ ﻛﯩﻢ ﻗﯩﻠﺴﺎ ﺋﯚﺯﯨﮕﻪ ﻗﯩﻠﯩﺪﯗ.
        ---------------------------------------
(ﺋﺎﭘﺘﻮﺭ : ﺋﺎﺗﯘﺵ ﺷﻪﮬﻪﺭ ﻛﺎﺗﺘﺎﻳﻼﻕ ﻳﯧﺰﺍ ﺗﯧﺠﻪﻥ ﺋﻮﺗﺘﯘﺭﺍ ﻣﻪﻛﺘﻪﭘﺘﻪ )