مۇزات بىلوگى

بۇ توغىرلىق ئەمدى گەپنى ئۈزمىسەكمۇ بولمايدىغان يەرگە كېلىپ قالدى . تور بەتلەردە ئالىمجان توغىرلىق مۇنازىرىلەر قايناپ ، ئىلمى كەيپىيات بۇزۇلۇپ ، فىزىكىغا سۆگەل چىقىش ئالدىدا تۇرغاندەك قىلىدۇ . يېقىندا ئىچكىردىكى بىر ئەلپەنچى خەننىڭ ياسىغان ماتورى توغىرلىق خەۋەر تارقىلۋىدى ، نۇرغۇن تورداشلار بىزنىڭ ئالىمجان ئالىمجان ئاۋۋال ياساپ بولغان دەپ مەغرۇرلىنىشىپ كېتىشىپتۇ .
تورداشلارنىڭ ئېسىدە بولسا كېرەك ئالىمجاننىڭ ماتورىنىڭ قانداق پىرىنسىپ ئاساسىدا ھەركەتلىدىغانلىقى ۋە ئىشلىتىش قىممىتى ھەققىدە ئالىمجاننىڭ ماتورى VS ئۇيغۇرنىڭ IQ سى دىگەن تېمىدا توختىلىپ ئۆتكەن ئىدىم . قىسقىسى ئالىمجاننىڭ بۇ ماتورىنىڭ ھاۋانى يېقىلغۇ قىلمايدىغانلىقى ، ھاۋانىڭ سىقىش كۈچىدىن پايدىلىندىغانلىقى ۋە بۇنىڭ ئىشلىتىش قىممىتىنىڭ يوقلىقىنى كۆرسىتىپ ئۆتكەن ئىدىم . ئالىمجاننىڭ ئاتالمىش «كەشپىيات» ىغا مەستخۇش بولۇپ ، ئۇيغۇرغا بېرىلدىغان نوبىل مۇكاپاتىنى ساقلاۋاتقانلار ئەمدى ئۇيقۇڭلارنى ئېچىڭلار . بىلىپ – بىلمەي جۆيلۈپ يۈرۈپ ئالىمجانغا زىيانكەشلىك قىلمايلى . بۇ «كەشپىيات»نىڭ ماڭىمۇ ، پالانىغىمۇ ، پوكونىغىمۇ ھىچقانداق زىيىنى ياكى پايدىسى يوق . پەقەت ئالىمجانغىلا زىيىنى بار . فىزىكىدىن ھىچقانچە خەۋىرى يوق بىر دېھقان ئۆندەرەپ قوپوپ ھاۋانى يېقىلغۇ قىلىدىغان ماتور ياسىدىم دېسە ، ئاق – قارىسىنى سۈرۈشتۈرمەيلا ماختىغىلى چۈشتۇق . ھەتتا نوبىل مۇكاپاتى توغىرلىق خام – خىياللارنى قىلىپ ئۈلگۈردۇق . «ئۈرۈمچى كەچلىك گېزىتى» ۋە «قەشقەر ۋىلايەتلىك تېلىۋېزىيە ئىستانىسسى» دەك ئاخبارات ۋاستىلىرىدىكى خىزمەتچى خادىملارمۇ ، قانداق گەپ ئىكەنلىكىنى سۈرۈشتۈرمەيلا گېزىتلەرگە بېسىپ ، خەۋەرلەردە ئېلان قىلىپ يۈرۈشتى . بۇنىڭ بىلەن ئۆزى ياسىغان ماتورنىڭ ئىشلەش پىرىنسىپىنىمۇ چۈشەنمەيدىغان ئالىمجان ئۆزىنى راستىنلا «كەشپىياتچى» ئوخشايمەن دەپ ئويلاپ قالدى .ئۆزىنىڭ ۋاقتى ۋە بىر مۇنچە پۇلىنى مۇشۇ تاينى يوق ئىشلارغا سەرپ قىلىپ يۈردى . ھازىر بولسا ئۆزىنى كاتتا ئالىم ساناپ يۈرەرەمىش . دىمەكچىمەنكى ئالىمجان ئۆزى ئەڭ ياخشى قىلالايدىغان ئىشنى قىلسۇن . ۋاقتىنى ۋە ئىقتىسادىنى تاينى يوق ئىشلارغا سەرپ قىلمىسۇن . ئالىمجاننىڭ ئائىلىىسى ۋە باقىدىغان باللىرى باردۇر ، يەرمەنكىگە قاتنىشىمەن دەپ خەقنىڭ ئالدىدا ئۆزىنى بىچارىلاشتۇرۇپ يۈرمىسۇن . باشقىلارنىڭ ئالدىدا بىزنى يەرگە ئۇرمىسۇن . ئەتە ئۆگۈن ئىقتىسادى تۈگەپ بىر يەرگە بارغاندا ياكى پىشانىسىگىچە قەرىزگە پاتقاندا ، ئۇنى قارا – قۇيۇق ماختىغانلار قۇيرۇقىنى خادا قىلىدۇ . ئاخىردا بار جاپا ۋە دەرت – ئەلەمگە ئۆزى قالىدۇ .
ئالىمجاننى ئالداپ يۈرمەيلى ، ئۆزىنىڭ ياساپ چىققان نەرسىسىنىڭ قانداق نەرسە ئىكەنلىكىنى بىلدۈرۈپ قويايلى . خام – خىيال بىلەن ئۆزىنى ئەللەيلەپ يۈرىۋەرمىسۇن . رىئاللىققا يۈزلەنسۇن . قۇرۇق ھاياجىنىمىز بەدىلىگە قېرىندىشىمىزنى ۋەيران قىلمايلى . ئەگەر مۇشۇنداقلا كېتىۋېردىغان بولساق ئالىمجان چىققىلى بولمايدىغان پاتقاققا كىرىپ كېتىدۇ ھەتتا يۇرتىدىكىلەرنىڭ ئالدىدا كىشلىك ھۆرمىتىمۇ قالمايدۇ . ماختاشنى بىز ماختاپ ، قۇرۇق ھاياجاننى ئۆزىمىز قىلىپ ئاقىۋەتكە ئالىمجان يۈزلىنىدۇ . شۇڭا دەيمەنكى بولدى بەس ! ئالىمجانغا زىيانكەشلىك قىلمايلى !!!!
مۇشۇ ئىشتىن كىيىن رايونىمىزدىكى ئاخبارات خىزمەتچىلىرىنىڭ ئۇنۋېرسال ساپاسىنىڭ قانچىلىك ئىكەنلىكى بىلىنىپ قالدى . ئىلىم – پەنگە توغىرلىق خەۋەر يا ئۇلارنىڭ ئىچى پۇشقاندا يازىدىغان كۈندىلىك خاتىرسى بولمىسا يا . شۇنىڭغا مۇناسىۋەتلىك ئىلىم ئىگىسىدىن سوراپ بېقىپراق بىر نەرسە قىلماي ، باشباشتاقلىق بىلەن ، مەسئۇلىيەتسىزلىك قىلىپ ئىلىم پەنگە ساۋاتسىز قارا- قورساقلارچە مۇئامىلە قىلدى . ئاشۇ مەسئۇل خادىملارنىڭ مۇشۇ مەسئۇلىيىتى سۇرۇشتۈرۈلىشى كىرەك ھەم ئۇلارنى قاتتىق ئاگاھلاندۇرۇش كىرەك . ئاخبارات دىگەن ھىكايە – چۆچەك ئەمەس خالىغانچە توقۇيدىغان . ۋە ياكى كارتون فىلىم ئەمەس خالىغانچە ئىشلەيدىغان . ئاخبارات دىگەن چىن بولۇشى ، ئىلمى ئاساسقا ئىگە بولۇشى كېرەك . بولۇپمۇ پەن – تېخنىكا خەۋەرلىرىگە بولغان مەسئۇلىيەت تېخىمۇ يۈكسەكلەشتۈرۈلۈشى كېرەك .
«ئۈرۈمچى كەچلىك گېزىتى» ۋە «قەشقەر ۋىلايەتلىك تېلىۋېزىيە ئىستانىسسى» دىكى ئاشۇ خادىملار مۇشۇ قىلمىشىدىن يۈزى قىزىرىشى ، ئىبرەت ئېلىشى لازىم . كىچىككىنە قەلەم ھەققىنى دەپ ئىلىم پەنگە ھۆرمەتسىزلىك قىلغىنىغا نومۇس قىلىشى كىرەك . بىلىپ قويسۇنكى ، تەبئىي پەن ئۇلارنىڭ ھىكايە – چۆچىكى ياكى كارتون فىلىمى ئەمەس . ئىلىم پەنگە ئەمدى بۇنداق قالايمىقان چاقچاق قىلمىسۇن .