رۇسىيە <<كوممۇنىستىك ياشلار ئىتتىپاقى ھەقىقەت گېزىتى>>نىڭ 21-دېكابىردىكى خەۋىرىگە قارىغاندا، رۇسىيەنىڭ لېنىنگراد يادرو ئېلېكتىر ئىستانسىسىدا يېقىندا رادىيو ئاكتىپلىق ماددا ئېقىپ كېتىش ۋەقەسى يۈز بەرگەن، ئارقىدىنلا ئاتوم قازىنى ئايلىنىشتىن توختاپ قالغان. نۆۋەتتە ئالاقىدا تەرەپلەر ۋەقەنى جىددىي تەكشۈرمەكتە.   خەۋەردە دېيىلىشىچە، ۋەقە 18-دېكابىر چۈشتىن بۇرۇن يۈز بەرگەن بولۇپ، لېنىنگراد يادرو ئېلېكتىر ئىستانسىسىنىڭ 2-نومۇرلۇق گۇرۇپپا پار تۇرۇبا يولى يېرىلىپ كەتكەنلىكتىن رادىيو ئاكتىپلىق ماددىلار ئېقىپ چىققان. بۇ يادرو ئېلېكتىر ئىستانسىسى تەرەپنىڭ دېيىشىچە، قويۇپ بېرىلگەن رادىيو ئاكتىپلىق ماددىلارنىڭ خەتىرى يوقكەن.

   ئەمما ئېكولوگىيە مۇتەخەسسىسلىرى بۇ ئىشقا نىسبەتەن تولىمۇ ھۇشيار بولغان. فىزىكىشۇناس، ئېكولوگىيە مۇتەخەسسىسى ئوليېگ پودلوفنىڭ خىزمەت نۇقتىسى سوسنۇۋى بورغا جايلاشقان بولۇپ، ئاتوم قازىنى بىلەن بولغان ئارىلىقى بەش كىلومېتىرلا كېلىدىكەن. ئۇنىڭ دېيىشىچە، ئېقىپ كەتكەن پار بەلبېغىنىڭ رادىيو ئاكتىپلىق خۇسۇسىيىتى باركەن، ئەمما ئېقىپ كېتىش كۆلىمى ئېنىق ئەمەسكەن. يېرىلىپ كەتكەن تۇرۇبا يولى ئاساسىي تۇرۇبا يولى ئەمەس بولۇپ، نۆۋەتتە ئەتراپتنىڭ رادىياتسىيا قىممىتى نورمال سەۋىيەدە ئىكەن.

  ئىگىلىنىشىچە، ۋەقە يۈز بەرگەندىن كېيىن خىزمەتچى خادىملار تېزلىكتە يۆتكەلگەن، ئاتوم قازىنىمۇ ئايلىنىشتىن توختىغان. لېنىنگراس ئوبلاستلىق سەھىيە كومىتېتىنىڭ خەۋىرىگە قارىغاندا، شۇ كۈنى سائەت 15:00 لەردە، يادرو ئېلېكتىر ئىستانسىسىنىڭ ئايال خىزمەتچىسى يۇقىرى قان بېسىمى تۈپەيلىدىن دوختۇرخانىغا ئاپىرىلغان، ئەمما يادرو ئېلېكتىر ئىستانسىسى بۇ ئايالنىڭ كېسىلىنىڭ بۇ ۋەقە بىلەن ئالاقىسى يوقلۇقىنى بىلدۈرگەن.

  لېنىنگراد يادرو ئېلېكىتىر ئىستانسىسىنىڭ باشلىقى شۇ كۈنى بايانات ئېلان قىلىپ، يادرو ئېلېكتىر ئىستانسىسىنىڭ ئەھۋالىنىڭ نورمال ئىكەنلىكىنى، كىشىلەرنىڭ ئالاقزادە بولماسلىقىنى ئۈمىد قىلغان. شۇنداقتىمۇ بۇ قېتىمقى ۋەقە سوسنۇۋى بور ۋە ساينت پېتېربۇرگدا ئولتۇراقلاشقان كىشىلەرنى ساراسىمگە سېلىپ قويغان. خەۋەردە دېيىلىشىچە، سوسنۇۋى بور رايونىدا يودنىڭ سېتىلىشى ئىنتايىن يۇقىرى ئىكەن. بىر قىسىم پېتېربۇرگلىقلار ماشىنىلىرى بىلەن شەھەرنىڭ يەنە بىر چېتىگە بېرىۋالغان، ھەتتا يوللاردا قىستاڭچىلىقنى كەلتۈرۈپ چىقارغان. بەزىلەر بۇ قېتىمقى ۋەقەدىن 1986-يىلىدىكى چېرنوبىل ۋەقەسىنى ئەسكە ئالغان.

  سوسنۇۋى بور فىنلاندىيە قولتۇقى بويىغا جايلاشقان بولغاچقا، بۇ ۋەقە قوشنا دۆلەتلەرنىڭمۇ دىققىتىنى قوزغىغان. فىنلاندىيە نازارەتچى تارماقلىرى رۇسىيە تەرەپتىن بۇ ۋەقەگە ئالاقىدار ئۇچۇرلار بىلەن تەمىنلەشنى تەلەپ قىلغان. ئېستونىيە مۇھىت ئاسراش تارماقلىرى رادىياتسىيە قىممىتىنىڭ نورمال ئىكەنلىكىنى بىلدۈرگەن.

  ئىگىلىنىشىچە، لېنىنگراد يادرو ئېلېكتىر ئىستانسىسى ساينتپېتېربۇرگنىڭ غەربىدىن 80 كىلومېتىرلىق ئورۇندىكى سوسنۇۋى بورغا جايلاشقان بولۇپ، 1973-يىلى قۇرۇلغان، تۆت يادرو ئاتوم قازىنى ئايلىنىدىكەن.