شەخسي كومپيۇتېر دەۋرىدە، Adobe رەسىم ۋە سىن (ۋىدېئو) تەھرىرلەش ساھەسىدىكى بىرىنچى ئورۇندا تۇرىدىغان چوڭ شىركەتكە ئايلانغان بولۇپ، «رەسىم بىر تەرەپ قىلىش» دېگەن سۆز تىلغا ئېلىنسا، كىشىلەرنىڭ ئېسىگە بىرىنچى بولۇپ بۇ شىركەت ياساپ چىققان Photoshop دېتالى كېلەتتى. بىراق، كومپيۇتېر يۇمشاق دېتاللىرىدىن يانفون ئەپلىرىگە كۆچۈشتە، Adobe شىركىتىنىڭ قەدىمى بەكلا ئاستا بولۇپ قالغان. تۈنۈگۈن Adobe شىركىتى ئاخىرى ئاندىرويىد ئابونتلىرىغا يۈزلەنگەن سىن تەھرىرلەش قورالى «Premiere Clip» نى ئېلان قىلغان.

      Premiere Clip بولسا Photoshop بىلەن ئوخشاش مۇھىم ئورۇندا تۇرىدىغان سىن بىر تەرەپ قىلىش قورالى، بۇ قېتىم Adobe شىركىتى بۇ يۇمشاق دېتالنىڭ ئاندىرويىد نۇسخىسىنى ئوتتۇرىغا چىقارغان بولۇپ، ئۇنى Premiere نىڭ ئىقتىدارى ئاددىيلاشتۇرۇلغان نۇسخىسى دەپ قاراشقا بولىدىكەن.

      ئامېرىكا تاراتقۇسىنىڭ خەۋىرىدە دېيىلىشىچە، Adobe شىركىتى ئىلگىرى ئالما iOS سۇپىسىغا يۈزلەنگەن «Premiere Clip» نى ئوتتۇرىغا چىقىرىپ بولغان، بۇ قېتىم داۋاملىق تۈردە ئۇنىڭ ئاندىرويىد نۇسخىسىنى ئېلان قىلغان. ئاندىرويىد نۇسخىسىدىكى «Premiere Clip» ئەپ دېتالىنى ئىشلىتىش ئىنتايىن ئاسان بولۇپ، ئۇنىڭغا يانفوندىكى سىن ھۆججەتلىرىنى كېسىپ تەھرىرلەش، مۇزىكا قىستۇرۇش ۋە كۆرۈنۈشلەرنى تەڭشەش قاتارلىق كۈچلۈك ئىقتىدارلار قوشۇلغان.

     ئىشلىتىش تەلىپى ئانچە يۇقىرى بولمىغانلارغا قارىتا، بۇ دېتالغا يەنە «مېخانىك مەشغۇلات ئۇسۇلى» مۇ قوشۇلغان بولۇپ، ئاددىي ئۇسۇل بىلەن بىر قانچە قىسقا سىن ھۆججىتىنى بىرلەشتۈرۈپ قىسقا فىلىم ئىشلىگىلى، ئاپتوماتىك ھالدا مۇزىكا قىستۇرغىلى بولىدىكەن.