جۇڭگو ئاخبارات تورى خەۋىرى: ئۈرۈمچى شەھىرىدە 31-مارتتىن باشلاپ ياغقان قار 2-ئاپرېل چۈشكىچە توختىماي يېغىپ، ئۈرۈمچىنىڭ ھەممىلا يېرىنى كۈمۈش تونغا ئورىدى، شەھەر قايتىدىن ‹‹قىش پەسلى››گە كىردى. ھەم قاتتىق سوغۇق ھەم قېلىن قار ئاھالىلەرنىڭ تۇرمۇشىغا نۇرغۇن قولايسىزلىقلارنى ئېلىپ كەلدى، ئالدىنقى ھەپتە نۆلدىن يۇقىرى ℃20 ئەتراپىدا بولۇۋاتقان تېمپېراتۇرا بۇ ھەپتە تۇيۇقسىز ناھايىتى تېز تۆۋەنلەپ، نۆلدىن تۆۋەن ℃8 قا چۈشۈپ قالدى. بۇنچىۋالا زور تېمپېراتۇرا پەرقىدە كىشىلەر ئامالسىز ئاللىقاچان رەتلەپ تىقىۋەتكەن قىشلىق كىيىملىرىنى تارتىپ چىقىرىپ كىيىشكە مەجبۇر بولدى، ئاپتوموبىل چاقلىرىنى يازلىق چاققا ئالماشتۇرىۋالغان نۇرغۇن ئاپتوموبىل ئىگىلىرىمۇ ئامالسىز ئاممىۋى ئاپتوبۇسقا ئولتۇرۇشنى تاللىدى، يول تېيىلغاق بولغانلىقتىن، ئەتىگەنلىك ۋە كەچلىك قاتناشنىڭ بېسىق ۋاقتىدا قاتناش ھادىسىسى ئادەتتىكىدىن كۆپەيدى، چوڭ تىپتىكى قار تازىلاش ئاپتوموبىللىرىمۇ قايتىدىن خىزمەتكە چۈشۈپ، يول يۈزىدىكى قارلارنى تازىلاش كۈرىشىگە ئاتلاندى.