جۇڭگو ئاخبارات تورى 27-ئىيۇن تېلگىراممىسى. چەتئەل تاراتقۇلىرىنىڭ ئونۋېرسال خەۋىرىگە قارىغاندا، 26-ئىيۇن، بولىۋىيە پايتەختى لاپاستىكى خەلقئارا ئايرودورومدا ئادەملەرنى چاناش ۋەقەسى يۈز بېرىپ، روھىي ھالىتى تۇراقسىز بىر ئەر پىچاق كۆتۈرۈپ 11 ئادەمنى يارىلاندۇرغان.
دوختۇرخانا خىزمەتچى خادىمى، يارىلانغۇچىلارنىڭ يارىسىنىڭ ئۇلارنىڭ ھاياتىغا خەۋىپ ئېلىپ كەلمەيدىغانلىقىنى، لېكىن سەككىز ئادەمنىڭ دوختۇرخانىدا يېتىپ داۋالىنىشىغا توغرا كېلىدىغانلىقىنى، بۇنىڭ ئىچىدىكى قورساق قىسمى يارىلانغان بىر ئايالنىڭ ئوپېراتسىيە قىلىنغانلىقىنى، يەنە بىر ئادەمنىڭ جىگىرىگە پىچاق تېگىپ زەخمىلەنگەنلىكىنى، يەنە بىر ساقچىنىڭ قاتىلنى بويسۇندۇرۇش جەريانىدا يارىلانغانلىقىنى بىلدۈرگەن.
خەۋەردە ئېيتىلىشىچە، قاتىل 41 ياشلىق جاۋېر ئىسىملىك ئەر بولۇپ، ئەسلىدە تاغلىق رايوندىكى بىر دېھقان ئىكەن. بولىۋىيە ئىچكى ئىشلار مىنىستىرلىقىنىڭ مۇئاۋىن مىنىستىرىنىڭ بىلدۈرىشىچە، بۇ ئەر ساقچىلارغا ئۆزىنىڭ «ئاۋازنى ئاڭلىغان»لىقىنى، باشقىلارنىڭ ئۆزىگە زىيانكەشلىك قىلىشىدىن ئەندىشە قىلغانلىقتىن، پىچاقنى ئېلىپ ئۆزىنى قوغدىغانلىقىنى ئېيتقان. خەۋەردە ئېيتىلىشىچە، ئۇنىڭ سۆزلىرى تاققا-تۇققا بولۇپ، روھىي ھالىتى روشەن ھالدا بىنورمال ئىكەن. يارىلانغۇچىلارنىڭ ھەممىسى بولىۋىيەلىك بولۇپ، ئاياللار كۆپ سالماقنى ئىگىلەيدىكەن.
