شۇ يەر ۋاقتى 5-ئاينىڭ 15-كۈنى كەچقۇرۇن، بېنگالنىڭ 200 دەك يولۇچى ئولتۇرغان كېچىكتىن ئۆتكۈزۈش پاراخوتى قارا بوراننىڭ تەسىرىگە ئۇچراپ، بېنگال پايتەختى-داككاغا 27 كىلومىتىر كېلىدىغان يەردىكى مېھنا دەرياسى (Meghna River) غا چۆكۈپ كەتكەنىكەن. نۆۋەتتە چۆكۈپ كەتكەن پاراخوتتىن ئەڭ ئاز بولغاندىمۇ 12 يولۇچىنىڭ جەسىتى تېپىلغان بولۇپ، نۆۋەتتە چۆكۈپ كەتكەن پاراخوتنى ئىزدەش خىزمىتى داۋاملاشماقتا.
بېنگالنىڭ مۇنشىگانج رايونى (Munshiganj District) غا تەۋە ساقچى ئىدارىسىنىڭ مەسئۇلى-ھۈسەيىننىڭ شىنخۇا ئاگېنتلىقى مۇخبىرىغا ئېيتىپ بېرىشىچە، چۆكۈپ كەتكەن بۇ پاراخوتتا ئەڭ ئاز دېگەندىمۇ 250 تىن 300 گىچە يولۇچى بار بولۇپ، نۆۋەتتە بېنگالنىڭ قۇتقۇزۇش پاراخوتى ئاللىقاچان ۋەقە يۈز بەرگەن دېڭىز رايونىغا قاراپ يولغا چىققانىكەن، ھازىرچە ئەڭ ئاز دېگەندىمۇ 12 ئادەمنىڭ جەسىتى تېپىلغانىكەن.
بۇ قېتىملىق قۇتقۇزۇش خىزمىتىگە قاتناشقان بىر خادىمنىڭ ئاشكارىلىشىچە، نۆۋەتتە چۆكۈپ كەتكەن پاراخوتتىكى يوقاپ كەتكەن يولۇچىلار سانىنى جەزىملەشتۈرۈش مۇمكىن بولمايدىغان بولۇپ، چۈنكى ۋەقە يۈز بەرگەندىن كېيىن پاراخوتتىكى نۇرغۇن يولۇچىلار ئۆزلىرى سۇدا ئۈزۈپ قىرغاققا چىقىۋالغانىكەن.
بېنگال دۆلىتىدە 250 تىن ئارتۇق دەريا-كۆللەر بار بولۇپ، پاراخوت ۋە كېمە بولسا بېنگاللىقلارنىڭ ئاساسلىق قاتناش قورالى بولۇپ ھېساپلىنىدىكەن. بەزى پاراخوت ۋە كېمىلەرنىڭ ئۇزۇن يىللاردىن بېرى رىمونت قىلىنماي قالغانلىقى، شۇنداقلا ئولتۇرغان يولۇچىلارنىڭ نورمىدىن ئېشىپ كەتكەنلىكى تۈپەيلىدىن، بېنگالدا پاراخوت ۋە كېمىلەرنىڭ چۆكۈپ كېتىش ۋەقەسى دائىم يۈز بېرىپ تۇرىدىكەن.
