گارتنېر: Windows Phone 7 مىكروسوفتنى قۇتۇلدۇرالمايدۇ

چەتئەلدىكى ئاخبارات ۋاستىلىرىنىڭ پەيشەنبە كۈنى خەۋەر قىلىشىچە، نوپۇزلۇق تەكشۈرۈش ئورگىنى Gartner يېقىندا مىكروسوفتنىڭ يېڭى بىر ئەۋلاد ئەقلىي يانفۇن سۇپىسى Windows Phone 7 نىڭ يەنىلا مىكروسوفتنى قۇتۇلدۇرالمايدىغانلىقىنى ئېيتقان.

Gartnerنىڭ تەھلىلچىلىرىى ئۆز ئىچىگە ئالغان نۇرغۇن زاتلارنىڭ قارىشىچە، Windows Phone 7 مىكروسوفتنىڭ ئەقلىي يانفۇن بازىرىدىكى ئۈلۈشىگە ھېچقانداق تەسىر كۆرسىتەلمىگەن. Gartner مۆلچەرىچە، Windows Phone سۇپىسىنىڭ بۇ يىللىق بازار ئۈلۈشى %4.7 بولۇپ، Windows Phone 7 بازارغا چىققاندىن كېيىن، مىكروسوفتنىڭ 2011-يىلىدىكى بازار ئۈلۈشى %5.2 كە ئۆرلەيدىكەن، لېكىن 2014-يىلىغا بارغاندا يەنىلا %3.9 كە چۈشۈپ، ھەر قانداق ئاساسلىق زاۋۇتنىڭكىدىن تۆۋەن بولىدىكەن.

Gartner مۆلچەرلەپ، 2014-يىلىغا Symbian OS نىڭ بازار ئۈلۈشى %30.2، Android نىڭ %29.6 بولىدىكەن. 2009-يىلى Androidنىڭ بازار ئۈلۈشى ئاران %3.9 بولغان، 2010-يىلىدا بولسا %17.7 كە چىقىشى مۆلچەرلەنمەكتە.

ئامېرىكىنىڭ شەرقىي قىسىم ۋاقتى 10-ئاينىڭ 11-كۈنى چۈشتىن كېيىن سائەت 3 تە، مىكروسوفت نىيۇ يوركتا Windows Phone 7 نى ئېلان قىلىش يىغىنى ئاچىدۇ، T-Mobile تۇنجى ئېلان قىلشتىكى ھەمكارلاشقۇچى بولىدۇ.

10-ئاينىڭ 21-كۈنى، Windows Phone 7 ئاساسىدىكى ئەقلىي يانفۇنلار ئەنگلىيە، فرانسىيە، گېرمانىيە، ئىتالىيە ۋە ئىسپانىيەلەردە بازارغا سېلىنىدۇ. تۇنجى ھەمكارلاشقۇچىلاردىن LG، خۇڭدا ئېلېكترۇنى بىلەن سامسۇڭ، دېل بىلەن Toshiba قاتارلىقلار بار.

( تەھرىر : ئاقيول تورى )