مايۈننىڭ ئىگىلىك تىكلەش دەرسخانىسى

ئون ئىككىنچى دەرس 1-پارىگىراپ

ئىگىلىك تىكلەش-خىرىس ئىچىدىن ھايات قېلىشتۇر

نۇرغۇنلىغان كىشىلەر ئىگىلىك تىكلەپ مۇۋەپپەقىيەت قازانغان كىشىلەرگە ھەۋەس قىلىدۇ، ئۇلارنىڭ قارىشىچە، ئۇنداق كىشىلەر ئادەتتە ھېچقانداق ئىش قىلماي ئېغىزىنى مىدىرلىتىپلا قويسا قول ئاستىدىكىلەر ھەممە ئىشلارنى ناھايىتى تەرتىپلىك قىلالايدۇ. ھالبۇكى ئۇلار پەقەت ئىگىلىك تىكلەپ مۇۋەپپەقىيەت قازانغان كىشىلەرنىڭ نەتىجىدىن ھوزۇرلانغان ۋاقىتتىكى ھالىتىنىلا كۆرۈپ، ئۇلارنىڭ سودا مەيدانلىرىدا قاتتىق كۆرەش قىلغان ۋاقىتلىرىغا، ئۇلارنىڭ «مىڭ ئۆلۈپ، مىڭ تىرىلگەن» ۋاقىتلىرىغا سەل قارىغان.

بەزىلەر مۇنداق دەيدۇ: «ئىگىلىك تىكلەش خىرىس ئىچىدىن ھايات قېلىشتۇر.» بۇ سۆز ناھايىتى توغرا ئېيتىلغان، ئىگىلىك تىكلەش ھەرگىزمۇ ئاسان ئىش ئەمەس، ئىگىلىك تىكلەش خىرىسقا تولغان، ئېھتىيات قىلمىغاندا ھالاك بولىدىغان گەپ.

مايۈننى ئېلىپ ئېيىتقاندا، خەيبو تەرجىمانلىق جەمئىيىتىنى قۇرغاندا، باشقىلارغا تەرجىمانلىق قىلىپ ئامېرىكىغا قەرز سۈيلەشكە بارغان، نەتىجىدە جۇڭگوغا قايتىپ كېلەلمىگىلى تاس قالغان. ئىنېرنېت بىلەن ئۇچراشقاندىن كېيىن، جۇڭگو ئۇچۇر بېتى قۇرۇشقا بەل باغلىغان، ئەمما خېرىدارلارنىڭ ئىشەنچىسىگە ئېرىشەلمەي ئالدامچى دەپ قارالغان؛ كېيىن ناھايىتى تەسلىكتە جۇڭگوغا ئىنتېرنېتنى تونۇشتۇرۇپ، ئۆزىنىڭ ئالدامچى ئەمەسلىكىنى ئىسپاتلىغان، بىراق رىقابەتچىلەرنىڭ بېسىم قىلىشى بىلەن يەنە ناھايىتى تەس كۈنگە قالغان؛ چوڭ دەرەخنىڭ سايىسىدە سەگىدەش ئۈچۈن، ئۇ رىقابەتچىلىرى بىلەن ھەمكارلىشىشنى تاللىغان، بىراق كېيىن بۇنىڭ ئالدامچىلىق ئىكەنلىكىنى ھېس قىلغان.

گەرچە نۇرغۇنلىغان ئوڭۇشسىزلىقلارغا دۇچار بولغان بولسىمۇ، مايۈن ئەزەلدىن ۋاز كەچمىگەن. جۇڭگو ئۇچۇر بېتىدىن ئايرىلغاندىن كېيىن، ئۇ ئىككىنچى قېتىم ئىگىلىك تىكلەپ بۈگۈنكى ئالى بابانى قۇرۇش ئۈچۈن ئاتلانغان. ئۈچ يىللىق تىرىشىش ئارقىلىق ئاخىرىدا ياخشى نەتىجىلەرنى قولغا كەلتۈرگەن. گەرچە قارىماققا ئالى بابا بارغانسېرى زورىيىۋاتقان بولسىمۇ، بىراق كېيىن يەنە نېمە ئىشلارنىڭ يۈز بېرىدىغانلىقىنى كىم بىلسۇن؟

ئىنتېرنېت ناھايىتى ئۆزگىرىشچان كەسپ، دائىم «سەن تەختتە بەش كۈن ئولتۇرساڭ ئارقاڭدىن مەن چىقىمەن» دېگەندەك ئىشلار يۈز بېرىدۇ. گەرچە ھازىر ئىلگىرىكىگە ئوخشاش قانچە تىرىشسىمۇ مۇۋەپپەقىيەت قازىنالمايدىغان ئەھۋال بولمىسىمۇ، بىراق «ئىگىلىك تىكلەش خىرىس ئىچىدىن ھايات قېلىشتۇر.» دېگەن بۇ قائىدىنىڭ ۋاقتى ئۆتكىنى يوق. بىر كارخانا ھەر قانداق ۋاقىتتا ئۆزىنى كۈچلەندۈرۈپ، باشقىلارنىڭ رىقابىتىنى قوبۇل قىلىشقا تەييار تۇرۇشى كېرەك.

ئىگىلىك تىكلەش ھەرگىزمۇ ئاسان ئىش ئەمەس، بىراق بىر قىسىم مۇنەۋۋەر كارخانىچىلارنىڭ قارىشىچە، ئىگىلىك تىكلەش ناھايىتى يۈكسەك ئىش. ئومۇمەن ئېيىتقاندا، مۇنەۋۋەر كارخانىچىلارنىڭ بەدىنىدە خۇددى مەلۇم خىل ئالاھىدە ماددا باردەك، ئۇلارنىڭ ئىگىلىك تىكلەش قىزغىنلىقى، خەتەرگە تەۋەككۈل قىلىشتىكى جاسارىتى ئۇرغۇپ تۇرىدۇ. ئۆز ئارزۇسىنى ئەمەلگە ئاشۇرۇش ۋە ئۆزىنى ئىسپاتلاش ئۈچۈن، ئۇلار ئىگىلىك تىكلەش يولىنى تاللىغان. ئۇلارغا نىسبەتەن ئېيىتقاندا، ئىگىلىك تىكلەش بىر خىل كۆڭۈللۈك ئىش، قانچىلىك ئوڭۇشسىزلىق ۋە قىيىنچىلىققا دۇچ كېلىشىدىن قەتئىينەزەر، ئۇلار ئىزچىل ۋاز كەچمەيدۇ، داۋاملىق تىرىشىدۇ.

«جۇڭگودىكى غەلبە» پىروگراممىسىغا قاتناشقان جۇڭ فەنچېڭ باھالىغۇچى سالاھىيىتىدىكى مايۈن ئەڭ زوقلانغان ماھىر بولۇپ ھېسابلىنىدۇ. ئۇنىڭ ئىگىلىك تىكلەش يولى ئەگرى-توقايلىقلارغا تويۇنغان، ئەمما ئۇ ئەزەلدىن ۋاز كەچمىگەن، قايتا-قايتا ئىگىلىك تىكلەش جەريانىدا ئۇ توختىماستىن تەجرىبە ۋە كاپىتال جۇغلاپ، «خىرىس ئىچىدە تۇرمۇش كەچۈرۈشتەك» روھنى ئۆزىگە مۇجەسسەملىگەن.

1994-يىلى ئوپتېكا ئېلېكترون كەسپىنى پۈتۈرگەن جۇڭ فەنچېڭ «ياشلىق باھارىدىن ھالقىپ چوڭ ئىشلارنى قىلىش» ئويىنىڭ تۈرتكىسىدە، ئەسلىدىكى يۇقىرى مائاشلىق خىزمىتىدىن ۋاز كېچىپ، بىر دوستى بىلەن بىرلىكتە گۇاڭجۇدا زاۋۇت قۇرۇپ ئويۇنچۇق، تېلېفون ئاپپاراتى قاتارلىقلارنى ئىشلەپچىقىرىشنى باشلاپ، مۇشەققەتلىك ئىگىلىك تىكلەش يولىغا قەدەم باسقان.

فەنچېڭنىڭ تۇنجى ئىگىلىكى 20 مىڭ يۈەندىن باشلانغان، گەرچە قىسقىغىنە سەككىز ئاي بەرداشلىق بېرەلىگەن بولسىمۇ، بىراق يەنىلا بىر ئاز پۇل تاپقان. فەنچېڭ بۇلارنى ئەسلەپ مۇنداق دېگەن: «دەسلەپتە بىز ئىشلەپچىقارغان مەھسۇلاتلار ناھايىتى بازار تاپتى، كېيىن ئوخشاش مەھسۇلات ئىشلەپچىقىرىدىغان زاۋۇتلارنىڭ بارغانسېرى كۆپىيىشىگە ئەگىشىپ، رىقابەت بارغانسېرى كەسكىنلەشتى-دە، پۈتكۈل كەسپتە باھانىڭ تۆۋەنلىشىنى كەلتۈرۈپ چىقىرىپ، ئاخىرىدا ئالىدىغان پايدا قالمىدى.»

ھالبۇكى، فەنچېڭ ئىگىلىك تىكلەشنىڭ قىيىنچىلىقلىرىدا تاۋلىنىۋاتقان چاغدا، ئارقىدىنلا يۈز بەرگەن بىر ئىش ئەمدىلا بىخلىنىۋاتقان بۇ ياش نوتىنى سۇندۇرۋەتكىلى تاسلا قالدى. ئەسلىدە فەنچېڭنىڭ ھەمكارلاشقۇچىسى باھانىڭ تۆۋەنلەپ پايدىنىڭ ئازلاپ كەتكەنلىكىنى كۆرۈپ، ئۇلار يېرىم يىلدىن بۇيان جاپادا يىغقان 80 مىڭ يۈەن پۇلنى ئېلىپ ئۈن-تىنسىز قېچىپ كەتكەن ئىدى.

1995-يىلى، فەنچېڭ ئىككىنچى قېتىم ئىگىلىك تىكلەشنى باشلاپ، ئالىي مەكتەپتىكى ساۋاقدىشى بىلەن بىرلىكتە ئېلېكترونلۇق ئەسۋابلار ۋاكالەتچىلىك شىركىتى قۇرۇپ، ئاساسلىقى ئۆزەك ۋە توپلاشتۇرۇلغان توك يولى تاختىسىغا ۋاكالەتچى بولغان. ئۇلارنىڭ قولىدىكى پۇل ئاز، چوڭ بازار ۋە چوڭ خېرىدارلار بىلەن ئۇچرىشىش پۇرسىتى بولمىغاچقا، بۇ قېتىمقى ئىگىلىكىمۇ مەغلۇبىيەت بىلەن تۈگەللەنگەن.

1996-يىلى 7-ئايدا، فەنچېڭ ئۆزى يالغۇز شياڭگاڭغا بېرىپ، ئىشلەمچىلىك ھاياتىنى باشلىغان. ئۇ شياڭگاڭدىكى كۈزىتىش قۇرۇلۇشى شىركىتىدە خىزمەت قىلغان، بۇ جايدا تۆت يىل خىزمەت قىلىپ سېتىش بۆلۈمىنىڭ مەسئۇلىغا ئايلانغان.

2000-يىلى ئىگىلىك تىكلەش ئارزۇسى تېخىچە يالقۇنجاۋاتقان فەنچېڭ خىزمىتىدىن يەنە ئىستىپا بېرىپ، شياڭگاڭدىن گۇاڭجۇغا قايتىپ كەلگەن، ھەمدە دوستى بىلەن بىرلىشىپ ئېنژېنىرلىق شىركىتى قۇرغان. تۆت يىللىق كۈزىتىش قۇرۇلۇشى تەجرىبىسىنى جۇغلىغاچقا، شىركەتنىڭ پايدىسىمۇ ياخشى بولغان. بىراق ۋاقىت ئۇزارغانسېرى، فەنچېڭ ئېنژېنىرلىق خىزمىتىنىڭ يوشۇرۇن كۈچىنىڭ بەك چوڭ ئەمەسلىكىنى ھېس قىلغان. 2003-يىلىنىڭ كېيىنكى يېرىمىدا، فەنچېڭ تىجارەت قىلغىلى ئۈچ يىل بولغان شىركەتنى سېتىۋېتىپ، جۇغلىغان مەبلىغى بىلەن قايتىدىن ئىگىلىك تىكلەپ ئېلېكترونلۇق مەھسۇلاتلار شىركىتىنى قۇرغان.

2003-يىلى 10-ئايدا، فەنچېڭنىڭ شىركىتى بىلەن گۇاڭجۇدىكى بىر شىركەت توختام ئىمزالاپ، ئۇ شىركەتنىڭ مەھسۇلاتلىرىنىڭ جۇڭگودىكى باش ۋەكىلىگە ئايلانغان، توختامنىڭ ئۈنۈملۈك مۇددىتى بىر يىل بولغان. فەنچېڭ ۋاكالەتچىلىك قىلىپ ئونىنچى ئايغا كەلگەندە، مەزكۇر مەھسۇلاتنىڭ سېتىش كۆلىمى تۇيۇقسىز ئۇچقاندەك ئۆرلىگەن، ئۇ زاۋۇتنىڭمۇ خېرىدارلارغا بولغان چۈشەنچىسى چوڭقۇرلاپ توختامنى ئەمەلدىن قالدۇرغان. شۇنداق قىلىپ، فەنچېڭنىڭ شىركىتى يەنە قىيىن ئەھۋالغا چۈشۈپ قالغان.

ئۇ مۇنداق دېگەن: «بۇ ۋاقىتتا نۇرغۇنلىغان كىشىلەر مېنى ئاگاھلاندۇرۇپ شىركەتنى تاقاپ، ئۆزىمىزنى رۇسلىۋېلىشىمىز لازىملىقىنى ئېيىتتى. مەن بۇنداق گەپلەرنى ئاڭلىغاندا دائىم < داجەي ئىشىكى > دىكى بەي جىڭيىنىڭ ئاتىسى دېگەن مۇنۇ سۆزلەر ئېسىمگە كېلەتتى: مېنىڭ ئىلگىرلىمىكىم ناھايىتى تەس تۇرسا، مەن نېمىشقا بىر قەدەم چېكىنگۈدەكمەن؟»

ئىگىلىك تىكلەشنىڭ جاپا-مۇشەققەتلىرىدە، فەنچېڭ ئەزەلدىن ۋاز كەچمەي داۋاملاشتۇرغان.

2004-يىلى فەنچېڭ گۇاڭجۇ مىڭشى رەقەم تېخنىكىسى چەكلىك شىركىتىنى قۇرۇپ چىققان. توختىماستىن تىرىشىش ئارقىلىق، ئۇ ئۆزىنىڭ شىركىتىنى توپلاشتۇرۇلغان توك يولى تەتقىقاتى ۋە سېتىش بىر گەۋدىلەشكەن كۆپ ۋاستىلىك كارخانىغا ئايلاندۇرۇپ، زور غەلبىنى قولغا كەلتۈرگەن.

«جۇڭگودىكى غەلبە» پىروگراممىسىنىڭ سەھنىسىدە، فەنچېڭ ئۆزىنىڭ ئىگىلىك تىكلەش ھەققىدىكى قاراشلىرىنى سۆزلەپ مۇنداق دېگەن: «ئىگىلىك تىكلەش بىر تەجرىبە توپلاش جەريانى. مېنىڭچە ئىگىلىك تىكلەشتە تۆۋەندىكى ئىككى نوقتىغا دېققەت قىلىش كېرەك: بىرىنچىدىن ئۆزگىرىشكە، ئىككىنچىدىن ئىزچىل داۋاملاشتۇرۇشقا دېققەت قىلىش لازىم. بۇلار قارىماققا زىددىيەتنىڭ ئىككى تەرىپىدەك كۆرۈنىدۇ، ئەمما ماسلىشىپ بىرلىككە كېلەلەيدۇ.»

ئۆزگىرىشكە نىسبەتەن ئېيىتقاندا، كىشىلەر مەلۇم شىركەتنى قۇرغاندا نۇرغۇنلىغان ئىشلارنى قىلالمىغاچقا ئۆگىنىشكە ئېھتىياجلىق بولىدۇ. خېرىدار، شىركەتنىڭ پايچېكى ۋە خىزمەتچىلەر بىلەن بولغان مۇناسىۋەتنى قانداق بىر تەرەپ قىلىشنى ئۆگىنىدۇ، شىركەتنى قانداق باشقۇرۇشنى ئۆگىنىدۇ، بىر كارخانىچى ئادەم باشقۇرۇش، مالىيە جەھەتلەردىن ئاز-تولا نەرسىلەرنى بىلىشى، يەنە توختىماستىن ئۆگىنىشى كېرەك.

ئىككىنچىدىن ئىزچىل داۋاملاشتۇرۇش كېرەك. نۇرغۇنلىغان ۋاقىتتا بىز قىيىنچىلىق ئالدىدا ئازراقلا داۋاملاشتۇرالىساق، بىز ئاخىرقى غالبىيەتچىگە ئايلىنالايمىز.

فەنچېڭنىڭ تەجرىبىسى بىلەن مايۈننىڭ تەجرىبىسى ئوتتۇرىسىدا نۇرغۇنلىغان ئوخشاشلىقلار بار، مەسىلەن، ئۆزگىرىش ۋە داۋاملاشتۇرۇش جەھەتتە. ياش ئىگىلىك تىكلىگۈچىلەر چوقۇم ئۇلاردىن ياخشى ئۆگىنىشى، ئۆز تەغدىرىنىڭ خوجايىنى بولۇشى، ئۆزىنىڭ يوشۇرۇن كۈچىنى ئەڭ يۇقىرى چەكتە جارى قىلدۇرۇشى كېرەك. گەرچە ئىگىلىك تىكلەش قىيىنچىلىققا تولغان بولسىمۇ، ئەمما سىزدە پەقەت جاپا-مۇشەققەتلەردىن ھالقىپ ئۆتەلەيدىغان يۈرەك بولسىلا، سىز چوقۇم مۇۋەپپەقىيەتنىڭ قىرغاقلىرىغا بارالايسىز.

*******************

مەنبە : چىڭدۇ دەۋر نەشىرياتى 2014-يىلى 7-ئايلىق تۇنجى نەشىرى

<< مايۈننىڭ ئىگىلىك تىكلەش دەرسخانىسى >> ناملىق كىتاب

تەرجىمە قىلغۇچى : ئەقىدە قاشگەرلىكى  شىركىتى– ئۇيغۇر قاشتېشى تورى

WWW.UYHQT.CN

تەرجىمان : ئابدۇللا ئۆمەر

تەرجىمە تەھرىرى : رەيھانگۈل نىزام

2015-يىلى