شىنخۇا ئاگېنتلىقى، ئامېرىكا ۋىستېر، 21 – ئاپرېل تېلېگراممىسى. ئامېرىكىلىق ئەمەلدار 21 – ئاپرېل: ‹‹تېكساس ئىشتاتىنىڭ ۋىستېر بازىرىدا يۈز بەرگەن خىمىيەۋى ئوغۇت زاۋۇتى پارتلاش ۋەقەسىنىڭ مەركىزىي پارتلاش نۇقتىسى بېكىتىلدى››، دېدى. يەرلىك ئوت ئۆچۈرۈش تارمىقىنىڭ ئەمەلدارى كېيستېنېر شۇ كۈنى ئېچىلغان ئاخبارات ئېلان قىلىش يىغىنىدا: ‹‹مەركىزىي پارتلاش نۇقتىسىنىڭ بېكىتىلىشى ۋەقەنىڭ سەۋەبىنى تەكشۈرۈشتە ناھايىتى مۇھىم››، دېدى. ئۇ يەنە: ‹‹پارتلاش ۋەقەسى خىمىيەۋى ئوغۇت زاۋۇتىنىڭ مەركىزىي رايونىدا غايەت زور ئازگال پەيدا قىلغان››، دېدى، لېكىن ئۇ ئازگالنىڭ چوڭ – كىچىكلىكى ۋە چوڭقۇرلۇقى قاتارلىق تەپسىلاتلار ئۈستىدە توختالمىدى. كېيستېنېر: ‹‹ھازىر خىمىيەۋى ئوغۇت زاۋۇتىدىكى ئوت پۈتۈنلەي ئۆچۈرۈلدى، زاۋۇت ئىچىدە قېپقالغان سۇيۇق ئاممىياكنى زاپاس ساقلايدىغان باك تەھدىت پەيدا قىلمايدۇ››، دېدى.

    