26- يانۋار، U23 ياشلىقلار ئاسىيا پۇتبول لوڭقىسى يەنى رىئودى ژانېيرو ئولىمپىك تەنھەرىكەت مۇسابىقىسى ئاسىيا رايونى تۇنجى مەيدان يېرىم ھەل قىلغۇچ مۇسابىقىسىدا، ياپونىيە ئولىمپىك كوماندىسى ئىراق كوماندىسى بىلەن ئۇچراشتى. ئەڭ ئاخىرىدا ياپونىيە ئولىمپىك كوماندىسى تولۇقلاپ بېرىلگەن ۋاقىتتا ئىراق ئولىمپىك كوماندىسىنى بوغۇزلاپ تاشلاپ، بۇ قېتىملىق ئاسىيا پۇتبول لوڭقىسى ھەل قىلغۇچ مۇسابىقىسىگە كىردى، شۇنىڭ بىلەن بىر ۋاقىتتا ئاسىيادىن تۇنجى بولۇپ رىئودى ژانېيرو ئولىمپىك تەنھەرىكەت مۇسابىقىسىنىڭ كىرىش بېلىتىگە ئېرىشكەن كوماندا بولۇپ قالدى.

      مۇسابىقە باشلىنىپلا ئىككى كوماندىنىڭ ھۇجۇم ۋە مۇداپىئەسى ئىنتايىن كەسكىن بولدى، مۇسابىقە 26- مىنۇتقا قەدەم قويغاندا، ياپونىيە كوماندىسى تۇنجى بولۇپ ۋاراتاغا توپ كىرگۈزدى. بۇ توپنى كۇبو خىرويا  ئۇرۇپ، ياپونىيە 1 گە قارشى 0 نەتىجە بىلەن ۋاقىتىنچە ئالدىغا ئۆتتى. يېرىم مەيدان ئاخىرلىشىش ئالدىدا، مۇسابىقە 43 مىنۇتقا قەدەم قويغاندا، ياپونىيە ئارقا سەپ مۇداپىئەچىسى مۇساشى سۇزۇكى كاللا توپ بىلەن مۇھاسىرىدىن قۇتۇلماقچى بولغاندا خاتالىق كۆرۈلدى، ئىراق كوماندىسىكى ئاساد چەكلەنگەن رايوندا ئارقا- ئارقىدىن ئىككى قېتىم كاللا توپ ئۇرۇپ بۇ توپنى كىرگۈزۈپ، ئىراق كوماندىسى ئالدىنقى يېرىم مەيدان ئاخىرلىشىشتىن بۇرۇن نومۇر پەرقىنى 1 دە 1 قىلىپ تەڭلەشتۈرۋالدى.

       كېيىنكى يېرىم مەيداندا ئىككى تەرەپ نومۇر پەرقىنى زورايتالمىدى، 90 مىنۇتلۇق كەسكىن جەڭ ئارقىلىق مۇسابىقە نەتىجىسى 1 دە 1 بولۇپ ئاياقلاشتى، قوشۇپ بېرىلگەن مۇسابىقىگە ئاز قالغان پەيتتە، ياپونىيە كوماندىسىدىن رىكى خاراكاۋا تولۇقلاپ بېرىلگەن ۋاقىت 3- مىنۇتقا قەدەم باسقان ۋاقىتتا ھالقىلىق توپنى كىرگۈزۈپ بوغۇزلاپ تاشلاپ، ياپونىيە ئولىمپىك كوماندىسى ئەڭ ئاخىرىدا 2 گە قارشى 1 نەتىجە بىلەن ئىراق ئولىمپىك كوماندىسىنى يېڭىپ بۇ قېتىملىق مۇسابىقىنىڭ ھەل قىلغۇچ مۇسابىقىسىگە كىردى، شۇنىڭ بىلەن بىر ۋاقىتتا ئاسىيادىن تۇنجى بولۇپ رىئودى ژانېيرو ئولىمپىك تەنھەرىكەت مۇسابىقىسىنىڭ كىرىش بېلىتىگە ئېرىشكەن كوماندا بولۇپ قالدى.