ئەمچەكنىڭ ئەڭ مۇھىم فىزىيولوگىيەلىك ئىقتىدارى بالا ئېمىتىشتۇر، ئۇنىڭ تەرەققىي قىلىپ يېتىلىشى پەرزەنتنى بېقىش ئۈچۈندۇر. ئەمچەك سۈت چىقىرىشقا باشلىغاندا، تولۇق يېتىلىپ بولغان بولىدۇ. ھامىلىدارلىق مەزگىلىدە، سۈت بەزلىرى ئانىلىق ھورمۇن بىلەن ھامىلىدارلىق ھورمۇنىنىڭ تەسىرىدە سۈت نەيچىسى ۋە بەز پۈۋەكچىلىرى ئېپىتېلىيەسى ئۆسۈپ، ئەمچەك يوغىناپ، سۈت ئاجرىتىش ئۈچۈن تەييارلىنىدۇ. ھامىلىدارلىقنىڭ كېيىنكى مەزگىلىدە، پىرولاكتىننىڭ تەسىرىدە، ئەمچەك سۈت چىقىرىشقا باشلايدۇ. تۇغۇتتىن كېيىن پرولاكتىننىڭ ئېشىشى، بولۇپمۇ بالىنىڭ ئېمىشى بىلەن غىدىقلىنىپ، سۈت بەزلىرىنىڭ ئۇششاق ياپراقچىلىرى بىرىكىدۇ ۋە كۆپ مىقداردا سۈت ئاجرىتىپ چىقىرىپ، بالىنىڭ ئېھتىياجىنى قامدايدۇ.

 

  ئەمچەك-ئاياللارنىڭ ئىككىنچى جىنسىي بەلگىسى ھېسابلىنىدۇ. تولغان، كۆرۈنۈشى كۆركەم ئەمچەك ئاياللارنىڭ جەزىبىدارلىقىنى ئاشۇرۇپ، جىنسىي جەھەتتىن يېتىلگەنلىكىنى نامايان قىلىدۇ.

 

  ئەمچەك سۈت ئاجراتقۇچى ئەزا بولۇپلا قالماستىن، يەنە جىنسىي پائالىيەتكىمۇ قاتنىشىدۇ، ئۇ جىنسىي ئىنكاستا كەم بولسا بولمايدىغان ئەزادۇر. يۇقىرىدا ئەمچەك تۈگمىسى، ئەمچەك دېغىدا مۇسكۇل توقۇلمىلىرى بولىدىغانلىقىنى، سىلىغاندا، سۆيۈشكەندە ياكى سوغۇقنىڭ تەسىرىگە ئۇچرىغان چاغدا، ئەمچەك تۈگمىسىنىڭ قېتىپ تىكلىشىدىغانلىقىنى؛ ئەمچەك تېرىسى ئاستىدىكى ۋېنالار كېڭىيىپ، قان تولىدىغانلىقىنى؛ ئەمچەكنىڭ تولۇپ، تويۇنغان ھالەتكە كېلىپ جىددىيلىشىشتەك ئىنكاس بولىدىغانلىقىنى ئېيتىپ ئۆتكەنىدۇق. جىنسىي ھېسسىياتنىڭ يۇقىرى پەللىسىگە يېتىپ بولغاندىن كېيىن، ئەمچەك ئاستا-ئاستا نورمال ھالىتىگە قايتىدۇ. نۇرغۇن ئاياللارنىڭ ئەمچىكى غىدىقلانغاندا جىنسىي ھېسسىياتى ئۆرلەيدۇ. بەزى ئاياللارنىڭ ئەمچىكى جىنسىيەتكە سەزگۈر بولۇپ، ئەمچىكى غىدىقلانسىلا جىنسىي ھېسسىياتنىڭ يۇقىرى پەللىسىگە يېتىدۇ. بەزىلەر ئەمچەكنىڭ غىدىقلىنىشىنى ياقتۇرمايدۇ. ھەر ئىككىلىسى نورمال ئەھۋال، ھەربىر ئادەمنىڭ جىنسىي تەلىپى ئوخشاش بولمىغاچقا، غىدىقلىنىشقا بولغان ئىنكاسىمۇ ئوخشاش بولمايدۇ.