ئۇنىڭ سىزگە ئىلگىرىكىدەك «كۆيمەيۋاتقان» لىقىنى ھېس قىلامسىز؟ ئاراڭلاردىكى ھېسىياتتىن چاتاق چىقىۋاتامدۇ؟ ئۇنىڭ بارغانسېرى ... ئۇنداقتا، سىز ئۆزىڭىزنى تەكشۈرۈپ كۆرۈڭكى، ئويلىماي ئۇنىڭ غورۇرىغا تەگكۈدەك بىرەر ئېغىز گەپ ياكى ئىش-ھەرىكەتتە بولۇپ قالدىڭىزمۇ-يوق؟ ئۇنى ئۆزىڭىز «سوۋۇتۇپ» قويدىڭىزمۇ قانداق؟

بىرىنچى، باشقىلار تەرىپىدىن يۈرەكسىز، ئاجىز دەپ مەسخىرە قىلىنىش

ئەزەلدىن تارتىپلا ئەرلەر قەھرىمانلىق، باتۇرلۇق، قەيسەرلىك، قورقۇمسىزلىقنىڭ نىشانىسى بولۇپ كەلگەن. يۈرەكسىز، قورقۇنچاق، زەئىپ ئەرلەر ئەل ئارىسىدا يەكلىنىپ، قىز-ئاياللارنىڭ ياخشى كۆرۈشىگە ئېرىشەلمىگەن. شۇڭا، ھەرقانداق بىر ئەر باشقا قىز-ئاياللار ھەۋەس قىلغۇدەك ئەركەك بولۇشنى ئارزۇ قىلىشىدۇ.
ئەمما، بۈگۈنكى بۇ مەدەنىي جەمئىيتىمىزدە ئەرلەرگە قويۇلىدىغان تەلەپلەر يۇقىرىقىدەك قاتتىق بولمىسىمۇ، ئەمما باشقىلار تەرىپىدىن، بولۇپمۇ قىز-ئاياللار تەرىپىدىن يۈرەكسىز، قورقۇنچاق، ئاجىز دەپ مەسخىرە قىلىنىش ئەرلەرنىڭ ئەرلىك غورۇرىغا قىلىنغان چوڭ ھاقارەت بولۇپ، مەلۇم نۇقتىدىن شۇ ئەرنىڭ ئەرەنلىكىنى سۇندۇرۇپ، ئۆزىگە بولغان ئىشەنچىنى بىتچىت قىلىپ تاشلايدۇ.

ئىككىنچى، تەقى-تۇرقىدىن ئىۋەن ئىزدەش

بىزنىڭ قارىشىمىزدا، پەقەت ئاياللارلا ئۆزىنىڭ تاشقى قىياپىتىگە، گۈزەللىكىگە ئەھمىيەت بېرىدۇ. ئەمما، ئەرلەرمۇ ئوخشاشلا ئۆزىنىڭ تەقى-تۇرقى، سالاپىتىگە ئالاھىدە ئېتىبار بېرىشىدۇ. بولۇپمۇ قىز-ئاياللارنىڭ ئۆز تاشقى قىياپىتى، بەدەن ساپاسىغا بېرىدىغان باھاسىغا بەكرەك كۆڭۈل بۆلىشىدۇ.