”شاھىنشاھ“نىڭ يېڭى يىللىق سوۋغىتى

    زىمىستان قىش باغرىنى يېرىپ، ئاجايىپ سەلتەنەتى بىلەن زېمىن شاھىنشاھى يېڭى يىلنىڭ دەرۋازىسىنى ئۆز قولى بىلەن ئاچماقچى بولۇپ ئەرىشتىن چۈشتى. ئۇ ئىنسانلارغا يېڭى يىلدىن بىشارەت بەردى ھەمدە ”يىل بېشى،ئىشنىڭ بېشى“دىدى- ياڭراق ئاۋازدا.

    بىراق، بۇ تۇپراقتا ياشاۋاتقان ئىنسانلارنىڭ ئىنكاسىغا قاراپ سەل تەئەجۈپلەندى. ئاڭلىماي قالغان بولسا دەپ ”يېڭى يىل كەلدى“دىگەن خەتنى يوغان قىلىپ كۆرسەتتى. بۇ ئىنسانلار غەپلەتتە ئۇخلاۋاتامدۇ قانداق؟ ئۇ بۇ خاسىيەتلىك كېچىدە روھىي قاتلاملارغىچە قايتا كۈزىتىپ بېقىشنى زۆرۈر تاپتى.
    ئۇنىڭ كۆز ئالدىدا ئاجايىپ چۈشكۈن ھالەتلەر پەيدا بولۇشقا باشلىدى. ئەنە بەزمىخانىلاردىكى چىرىكلىشىۋاتقان بەندىلەر،ئىسراچىلىقلار؛يېقىن دوست ۋە ئۇرۇق-تۇققانلار ئارىسىدىكى ئالدامچىلىق،مېھرى-مۇھاببەتكە يات قىلىقلار؛ ئېلىم-بېرىمدىكى ھايانكەشلىك ۋە ئالدامچىلىقلار؛ كوچا-كويلاردىكى يالىڭاچ بەدەن ئادىمىي شايتانلار؛ رېستۇرانلاردىكى دوۋزاقنىڭ ئېلانىغا ئوخشاپ كېتىدىغان نەغمە ناۋالار…زىمىن شاھىنشاھى يەنە داۋاملىق بۇ مەنزىرىنى كۈزىتىشنى بۇ تۇپراققا قىلىنغان ھاقارەت دەپ ئويلىدى . بۇ ئادەملەرنىڭ مەينەتچىلىكلىرىنى كۆتۈرۈپ كېلىۋاتقان زېمىنغا ئىچى ئاغرىدى. ئازراق ئاپەت بېرىپ بۇ ئىنسانلارنى سەگىتىپ، قىلمىشلىرىدىن ھامىنى ھىساپ بېرىدىغانلىقىنى بىلدۈرۈپ قويۇشنىمۇ ئويلىدى.
    زىمىن شاھىنشاھى مۇرەككەپ روھىي زىددىيەت ئىچىدە بىر ئۆينىڭ دەرىزىسى ئىچىدىن مۇنداق مەنزىرىنى كۆردى. بىر ئەر باللىرىنىڭ كارۋىتىدا ئولتۇرۇپ ئۇلارغا كىتاپ ئوقۇپ بېرىۋاتاتتى. ئوماق بالىلارنىڭ بېرى دادىسىغا يۆلىنىپ ئۇيقۇغا كەتكەن،يەنە بىرى بىغۇبار كۆزلىرىنى دادىسىدىن ئۈزمەي خىيالىدا كىتاپتىكى ۋەقەلىككە كىرىپ كەتكەن ئىدى، نېرىدىكى ئۆيدە باللارنىڭ ئاپىسى قېينى ئانىسىنىڭ تەرىتىنى مىھرىبانلىق بىلەن تازىلاۋاتاتتى ….
    شاشىنشاھ مەمنۇنلۇق بىلەن كۈلدى، ۋە بۇ ئۆيگە نۇرغۇن پەرىشتىلەرنى قالدۇرۇپ،ئۆزى يەنە بىر زالنىڭ ئالدىغا كېلىپ توختىدى.
    ئۇ بۇ زالنىڭ ئىچىگە كىرىپ ئوماق سەبىي باللار توپىغا قوشىلىۋالغان ئىدى. بىر ئۇستاز پۈتۈن ۋۇجۇدى بىلەن ئۆز ئوقۇغۇچىلىرىنىڭ دىلىنى ئىلىم ھىكمەتلىرى بىلەن يۇرۇتماقتا ئىدى. قانداق ئادەم بولۇش يوللىرىنى،قانداق ياشاشنى،بۇ تۇپراقنى گۈللەندۈرۈش يوللىرىنى ئۆگىتىۋاتاتتى. زىمىن شاھىنشاھى بارا-بارا بۇ يۇرتنى،بۇ ئادەملەر توپىنى ياقتۇرۇپ قېلىشقا باشلىدى.
    ئەسلى باشتا بۇ يۇرتقا ئاپەت ياغدۇرۇپ ، ئادەملەر توپىدىن ھىساپ ئالماقچى بولغان بولسىمۇ ئەمدىلىكتە ئۇ نىيىتىدىن يانغان ئىدى. بۇنداق ئىلىم –ھىكمەتلىك ئۇستازلار مەۋجۇت ئەلدە يەنىلا ئۈمۈت بارلىقىنى كۆرگەن ئىدى.
    شاھىنشاھ ئەرىشكە كۆتۈرىلگەچ ئىلىم- ھىكمەت بۇلاقلىرى ئەتراپىغا نۇرغۇن پەرىشتىلەرنى چۈشۈردى. بۇ يۇرتقا يەنىلا خوشاللىقنى ،بەرىكەت، مول ھۇسۇلنى، ئۈمۈدلەرنى يېڭى يىللىق سوۋغا قىلدى، يېڭى يىل ئاسمىنى شۇنچە سۇزۇك ھەم پارلاق ئىدى!